Skanda Purana · Verses 7.12-4

// sārasvata uvāca // //
gaṃgodakaṃ madhughṛte kuṃkumāgurucaṃda nam //
guggulaṃ bilvapatrāṇi bakapuṣpaṃ ca yo vahet

padacārī śucitanurbhāraṃ skandhe nidhāya ca //
tīrthe snātvā śivaṃ viṣṇuṃ brahmāṇaṃ śaṃkaraṃ priyam

dṛṣṭvā nivedayedyastu sa muktaḥ sarvabandhanaiḥ //
sa naro gaṇatāṃ yāti yāvadābhūtasaṃplavam

kalatramitraputrairvā bhrātṛbhiḥ svajanairnaraiḥ //
sahito vā narairyāti tīrthe devaṃ viciṃtya ca

devamūrtiṃ śubhāṃ kṛtvā rathasthāṃ supratiṣṭhitām //
candanāgurukarpūrairarcitāṃ kuṃkumena ca

pūjayanvividhaiḥ puṣpairdhūpadīpādikairnṛpa //
gītanṛtyaiḥ savāditrairhāsyalāsyairanekadhā

dharitrīṃ kāṃcanaṃ gāśca jalānnavasanāni ca //
tṛṇendhane priyāṃ vāṇīṃ yacchanyāti naro yadi

devāṃganākaragrāhagṛhīto nandanaṃ vanam //
prāpya bhuṃkte śubhānbhogānyāvadācandratārakam

tīrthe saṃcaritaḥ puruṣo rogaiḥ prāṇānvimuñcati //
adṛṣṭvā daivataṃ tīrthe dṛṣṭatīrthaphalaṃ labhet

saṃsāradoṣānvividhānvicintya strīputramitreṣvapi baṃdhamuktaḥ //
vijñāya baddhaṃ puruṣaṃ pradhānaiḥ sa sarvatīrthāni karoti deham

ājanmajanmāṃntarasaṃcitāni dagdhvā sa pāpāni naro narendra //
tejomayaṃ sarvagataṃ purāṇaṃ bhavodbhavaṃ paśyati mucyate saḥ

tīrthe vipravaco grāhyaṃ snātvā saṃdhyārcanādikam //
darbhāstilā haviṣyānnaṃ prayogāḥ śraddhayā kṛtāḥ

agastyaṃ bhṛṅgarājaṃ ca puṣpaṃ śatadalaṃ śubham //
karpūrāguruśrīkhaṃḍaṃ kuṃkumaṃ tulasīdalam

bilvapramāṇapiṃḍeṣu dīpoddyotitabhūmiṣu //
tāṃbūla phalanaivedyaṃ tiladarbhodakena ca

tīrthe saṃkalpitaṃ martyaistadanaṃtaṃ prajāyate //
ayane viṣuve caiva saṃkrāṃtau grahaṇeṣu ca

māsāṃte'para pakṣe tu kṣayāhe pitṛmātṛke //
gajacchāyāṃ trayodaśyāṃ dravye prāptau dvijottamaḥ

gṛhe śrāddhaṃ prakurvīta pitṝṇāmṛṇamuktaye //
gṛhācchataguṇaṃ nadyāṃ yā nadī yāti sāgaram

prabhāse puṣkare rājangaṃgāyāṃ piṃḍatārake //
prayāge nṛpagomatyāṃ bhavadāmodarāgrataḥ

narmadādiṣu tīrtheṣu kuryācchrāddhaṃ naro yadi //
sarvapāpavinirmuktaḥ pitaro yāṃti sadgatim

saṃtānamuttamaṃ labdhvā bhuktvā bhogānanuttamān //
divyaṃ vimānamāruhya prānte yāti surālayam

jātakarmādiyajñeṣu vivāhe yajñakarmaṇi //
devapratiṣṭhāprāraṃbhe vṛddhiśrāddhaṃ prakalpayet

tṛpyanti devatāḥ sarvā stṛpyaṃti pitaro nṛṇām//
vṛddhiśrāddhakṛto gehe jāyate sarvamaṃgalam

kāmaḥ krodhaśca lobhaśca moho madyamadādayaḥ //
māyā mātsaryapaiśunyamaviveko vicāraṇā

ahaṃkāro yadṛcchā ca cāpalyaṃ laulyatā nṛpa //
atyāyāsopyanāyāsaḥ pramādo drohasāhasam

ālasyaṃ dīrghasūtratvaṃ paradāropasevanam //
alpāhāro nirāhāraḥ śokaścauryaṃ nṛpottama

etāndoṣāngṛhe nityaṃ varjayanyadi vartate //
sa naro maṇḍanaṃ bhūmerdeśasya nagarasya ca

śrīmānvidvānkulīno'sau sa eva puruṣottamaḥ //
sarvatīrthābhiṣekaśca nityaṃ tasya prajāyate

tadā tīrthaphalaṃ samyaktyaktadoṣasya jāyate //
snānaṃ sandhyā japo homaḥ pitṛdevarṣitarpaṇam //
śrāddhaṃ devasya pūjā ca tyaktadoṣasya jāyate

prayāge vā kurukṣetre sarasvatyāṃ ca sāgare //
gayāyāṃ vā rudrapade naranārāyaṇāśrame

prabhāse puṣkare kṛṣṇe gomatyāṃ piṃḍatārake //
vastrāpathe girau puṇye tathā dāmodare nṛpa

bhīmeśvare narmadāyāṃ skāṃde rāmeśvarādiṣu //
ujjayinyāṃ mahākāle vārāṇasyāṃ ca bhūrbhuvaḥ

kāliṃdyāṃ mathurāyāṃ ca sakṛdyāti naro yadi //
sadoṣo mucyate doṣairbrahmahatyādibhiḥ kṛtaiḥ //

api kīṭaḥ pataṃgo vā pakṣī vā sūkaro'pi vā //
kharoṣṭrakuṃjarā vājimṛgasiṃhasarīsṛpāḥ

jñānato'jñānato rājaṃsteṣu sthā neṣu ye mṛtāḥ //
sarve te puṇyakarmāṇaḥ svargaṃ bhuktvā sukhaṃ bahu

caturvarṇeṣu sarve te jāyaṃte karmabaṃdhanāt //
karmabaṃdhaṃ vihāyāśu muktiṃ yāṃti narāḥ punaḥ

modaṃte tīrthamaraṇātsvargabhogāvasānataḥ //
saṃprāpya bhārate khaṃḍe karmabhūmiṃ mahodayam

anekāścaryasaṃyuktaṃ bahuparvatamaṃḍitam //
gaṃgāyāḥ saritaḥ sarvāḥ samudraiḥ saha saṃgatāḥ

padepade nidhānāni saṃti tīrthānyanekaśaḥ //
yeṣāṃ smaraṇamātreṇa sarvapāpakṣayo bhavet

pātālamārgā bahavaḥ svargamārgaśca dṛśyate //
gagane dṛśyate sūryo hṛdaye dṛśyate haraḥ

dhyānena jñānayogena tapasā vacasā guroḥ //
satyena sāhasenaiva dṛśyate bhuvanatrayam

vedasmṛtipurāṇaiśca ye na paśyaṃti bhūtalam //
pātālaṃ svargalokaṃ ca vaṃcitāste narā iha

ye virajyaṃti na strīṣu kāmāsaktā vicetasaḥ //
dehonyathā varastrīṇāmanyathā taiśca ciṃtitam

janmabhūmiṣu te raktā janyaṃte jaṃtavaḥ punaḥ //
muktimārgātpunarbhraṣṭā jāyaṃte paśuyoniṣu

dhanāni saṃprāpya varāṭikāṃ ye dvijātimukhyāya vidhāya pūjām //
yacchaṃti no nirmalacetanā ye narādhamā daivahatā mṛtāste

dehaṃ supuṣṭaṃ vijaraṃ ca yauvanaṃ labdhvā na gaṃgādiṣu yāṃti ye narāḥ //
mātā pitā no na suto na bāṃdhavo bhāryā svasā no duhitā na vidyate

ekastu yo yāti kathaṃ na kliśyate mūrkho na jānāti bhavaṃ maheśvaram //
snātvā na paśyaṃti haraṃ maheśvaraṃ daivena te vai muṣitā narādhamāḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe dvitīye vastrāpathakṣetramāhātmye yātrā vidhivarṇanaṃnāma dvādaśo'dhyāyaḥ