Skanda Purana · Verses 7.12-2

// prahlāda uvāca // //
tato gaccheddvijaśreṣṭhā gopracāramataḥ param //
yatra snātvā naro bhaktyā labhedgodānajaṃ phalam

yatra snāto jagannātho nabhasye daivatairvṛtaḥ //
kaṭadānaṃ ca tatproktaṃ dvādaśyāṃ dvijasattamāḥ

// ṛṣaya ūcuḥ // //
kathaṃ tu tatra daityendrā'bhavadvai gopracārakam //
tīrthaṃ kathaya tattvena yatra snāto janārddanaḥ

// prahlāda uvāca // //
hate kaṃse bhojarāje kṛṣṇenāmitatejasā //
ugrasene cābhiṣikte madhupuryyāṃ mahātmanā

uddhavaṃ preṣayāmāsa gokule gokulapriyaḥ //
suhṛdāṃ priyakāmārthaṃ gopagopījanasya ca

namaskṛtya ca govidaṃ prayayau naṃdagokulam //
sa tatsadṛśaveṣeṇa vastrālaṃkārabhūṣaṇaiḥ

taṃ dṛṣṭvā divasasyāṃte goviṃdānucaraṃ priyam //
uddhavaṃ pūjayāmāsa vastrālaṃkārabhūṣaṇaiḥ

taṃ bhuktavaṃtaṃ viśrāṃtaṃ yaśodā putravatsalā //
ānaṃdabāṣpapūrṇākṣī papracchānāmayaṃ hareḥ

kacciddhi staḥ sukhaṃ putrau rāmakṛṣṇau yadūttamau //
kaccitsmarati goviṃdo vayasyāngopabālakān

kaccideṣyati goviṃdo gokulaṃ madhureśvaraḥ //
tārayiṣyati putro'sau gokulaṃ vṛjinārṇavāt

ityuktvā bāṣpapūrṇākṣau yaśodā naṃda eva ca //
dīrghaṃ rurudaturdīnau putrasnehavaśaṃgatau

uddhavastau tato dṛṣṭvā prāṇasaṃśayamāgatau //
madhuraiḥ kṛṣṇasaṃdeśaiḥ snehayuktairajīvayat

namaskaroti bhavatīṃ bhavaṃtaṃ ca sahāgrajaḥ //
anāmayaṃ pṛṣṭavāṃśca tau ca kṣemeṇa tiṣṭhataḥ

kṣiprameṣyati dāśārho rāmeṇa sahito vibhuḥ //
atrāgatya jagannātho vidhāsyati ca vo hitam

ityevaṃ kṛṣṇasaṃdeśaiḥ samāśvāsyoddhavastadā //
sukhaṃ suṣvāpa śayane nandādyairabhinaṃditaḥ

gopyastadā rathaṃ dṛṣṭvā dvāre naṃdasya vismitāḥ //
ko'yaṃ ko'yamiti prāhuḥ kṛṣṇāgamanaśaṃkayā

gopālarājasya gṛhe rathenādityavarcasā //
samāgato mahābāhuḥ kṛṣṇaveṣānugastathā

parasparaṃ samāgamya sarvāstā vrajayoṣitaḥ //
vivikte kṛṣṇadūtaṃ taṃ papracchuḥ śokakarṣitāḥ

//
śrīgopya ūcuḥ // //
kasmāttvamiha saṃprāptaḥ kiṃ te kāryyamihādya vai //
dasyurūpapraticchanno hyasmānsaṃhartumicchasi

pūrvameva hataṃ tena kṛṣṇena hṛdayādikam//
pāyayitvā'dharaviṣaṃ yoṣidvrātaṃ palāyitaḥ

ityevamuktvā tā gopyo mumuhuḥ śokavihvalāḥ //
īkṣaṃtyaḥ kṛṣṇadāsaṃ taṃ nipeturdharaṇītale

uddhavastaṃ janaṃ dṛṣṭvā kṛṣṇasnehahṛtāśayam //
āśvāsayāmāsa tadā vākyaiḥ śrotrasukhāvahaiḥ

// uddhava uvāca // //
bhagavānapi dāśārhaḥ kandarpaśarapīḍitaḥ //
na bhuṃkte na svapiti ca cintayanvastvaharniśam

tacchrutvā vacanaṃ tasya lalitā krodhamūrchitā //
uddhavaṃ tāmranayanā provāca rudatī tadā

// lalitovāca // //
asatyo bhinnamaryyādaḥ krūraḥ krūrajanapriyaḥ //
tvaṃ mā kṛthā naḥ purataḥ kathāṃ tasyā'kṛtātmanaḥ

dhigdhikpāpasamācāro dhigdhigvai niṣṭhurāśayaḥ //
hitvā yaḥ strījanaṃ mūḍho gato dvāravatīṃ hariḥ

//
// śyāmalovāca // //
kiṃ tasya mandabhāgyasya alpapuṇyasya durmateḥ //
mā kurudhvaṃ kathāḥ sādhvyaḥ kathāṃ kathayatā'parām

//
// dhanyovāca // //
kenāyaṃ hi samānīto dūto duṣṭajanasya ca //
yātu tena pathā pāpaḥ punarnāyāti yena ca

// viśākhovāca // //
na śīlaṃ na kulaṃ yasya nāsti pāpakṛtaṃ bhayam //
tasya strīhanane sādhvyo jñāyate janma karma ca //
hīnasya puruṣārthena tena saṃgo nirarthakaḥ

//
// rādhovāca // //
bhūtānāṃ ghātane yasya nāsti pāpakṛtaṃ bhayam //
tasya strīhanane sādhvyaḥ śaṃkā kāpi na vidyate

// śaibyovāca // //
satyaṃ brūhi mahābhāga kiṃ karoti yadūttamaḥ //
saṃgato nāgarastrībhirasmākaṃ kiṃ kathāṃ smaret

// padmovāca // //
kadoddhava mahābhāga nāgarījanavallabhaḥ //
sameṣyatīha dāśārhaḥ padmapatrāyatekṣaṇaḥ

// bhadrovāca // //
hā kṛṣṇa hā gopavara hā gopījanavallabha //
samuddhara mahābāho gopīḥ saṃsārasāgarāt

// prahlāda uvāca // //
iti tā vividhairvākyairvilapaṃtyo vrajastriyaḥ //
ruruduḥ susvaraṃ devyaḥ smaraṃtyaḥ kṛṣṇa ceṣṭitam

tāsāṃ tadruditaṃ śrutvā bhaktisnehasamanvitaḥ //
vismayaṃ paramaṃ gatvā sādhusādhviti cābravīt

// uddhava uvāca // //
yaṃ na brahmā na ca haro na devā na maharṣayaḥ //
svabhāvamanugacchaṃti sarvā dhanyā vrajastriyaḥ

sarvāsāṃ saphalaṃ janma jīvitaṃ yauvanaṃ dhanam //
yāsāṃ bhavedbhagavati bhaktiravyabhicāriṇī

// gopya ūcuḥ // //
sādhu darśaya goviṃdaṃ sādhu darśaya vallabham //
nayāsmānsādhu tatraiva yatra tiṣṭhati so'cyutaḥ

// prahlāda uvāca // //
tāsāṃ tadbhāṣitaṃ śrutvā tathā vilapitaṃ bahu //
bāḍhamityeva tā ūca uddhavaḥ snehavihvalāḥ

uddhavena samaṃ sarvāstatastā vrajayoṣitaḥ //
anujagmurmudā yuktāḥ kṛṣṇadarśanalālasāḥ

gāyantyaḥ priyagītāni tadbālacaritāni ca //
jagmuḥ sahaiva śanakairuddhavena vrajāṃganāḥ

yadupuryyāṃ tato dṛṣṭvā udyānavipināvalīḥ //
adya devaṃ prapaśyāmaḥ kṛṣṇākhyaṃ naṃdanaṃdanam //

dvāravatyāṃ tu gamanāddhyānāllakṣmīpatestadā //
aśeṣakalmaṣānmuktā vidhvastākhilabandhanāḥ

saṃprāptāstāstataḥ sarvāstīre mayasarasya ca //
praṇipatyoddhavaḥ prāha gopikāḥ kṛṣṇadevatāḥ

sthīyatāṃ mātaraścātrātraiveṣyati mahābhujaḥ //
kṛṣṇaḥ kamalapatrākṣo vidhāsyati ca vo hitam

// gopya ūcuḥ // //
kasyoddhava idaṃ cātra saraḥ sārasaśobhitam //
saṃpūrṇaṃ paṃkajaiścitraiḥ kalhārakumudotpalaiḥ

//
// uddhava uvāca // //
mayo nāma mahādaityo māyāvī lokaviśrutaḥ //
kṛtaṃ tena saraḥ śubhraṃ tasya nāmnā ca viśrutam

// śrīgopya ūcuḥ // //
śīghramānaya goviṃdaṃ sādhu darśaya cācyutam//
nayanānaṃdajananaṃ tāpatrayavināśanam

tacchrutvā vacanaṃ tāsāṃ gopikānāṃ tadoddhavaḥ //
dūtaiḥ samānayāmāsa śrīkṛṣṇaṃ śīghrayāyibhiḥ

āyāṃtaṃ śīghrayānena dṛṣṭvā devakinaṃdanam //
bhrājamānaṃ suvapuṣā vanamālāvibhūṣitam //

jvalatkirīṭamukuṭaṃ sphuranmakarakuṇḍalam//
śrīvatsāṃkaṃ mahābāhuṃ pītakauśeyavāsasam

ātapatrairvṛtaṃ mūrdhni saṃvṛtaṃ vṛṣṇipuṃgavaiḥ //
saṃstutaṃ baṃdimukhyaiśca gītavāditranisvanaiḥ

paurajānapadairlokairvaiṣṇavaiḥ sarvato vṛtam //
paśyantaṃ haṃsamithunaiḥ saraḥ sārasaśobhitam

taṃ dṛṣṭvā'cyutamāyāṃtaṃ lokakāṃtaṃ manoharam //
priyaṃ priyāścirāddṛṣṭvā mumuhustā vrajāṃganāḥ

cirāya saṃjñāṃ saṃprāpya vilepuśca suduḥkhitāḥ //
hā nātha kāṃta hā kṛṣṇa hā vrajeśa manohara

saṃvardhito'si yairbālye krīḍito vatsapālakaiḥ //
te'pi tvayā parityaktāḥ kathaṃ duṣṭo'si nirghṛṇaḥ

na te dharmo na sauhārddaṃ na satyaṃ sakhyameva ca //
pitṛmātṛparityāgī kathaṃ yāsyasi sadgatim

svāminbhaktaparityāgaḥ sarvaśāstreṣu garhitaḥ //
tyajatā'smānvane vīra dharmo nāvekṣitastvayā

// prahlāda uvāca // //
śrutvā tāsāṃ vilapitaṃ gopīnāṃ naṃda naṃdana/
ananyaśaraṇāḥ sarvā bhāvajño bhagavānvibhuḥ//
sāṃtvayāmāsa vacanairvrajeśastā vrajāṃganāḥ

adhyātmaśikṣayā gopīḥ prabhustā anvaśikṣayat

śrībhagavānuvāca//
bhavatīnāṃ viyogo me na hi sarvātmanā kvacit//
vasāmi hṛdaye śaśvadbhūtānāmaviśeṣataḥ

ahaṃ sarvasya prabhavo matto devāḥ savāsavāḥ //
ādityā vasavo rudrāḥ sādhyā viśve marudgaṇāḥ

brahmā rudraśca viṣṇuśca sanakādyā maharṣayaḥ //
iṃdriyāṇi mano buddhistathā sattvaṃ rajastamaḥ

kāmaḥ krodhaśca lobhaśca moho'haṃkāra eva ca //
etatsarvamaśeṣeṇa matto gopyaḥ pravarttate

etajjñātvā mahābhāgā mā sma kṛdhvaṃ manaḥ śuci //
sarvabhūteṣu māṃ nityaṃ bhāvayadhvamakalmaṣāḥ

// prahlāda uvāca // //
tāḥ kṛṣṇavacanaṃ śrutvā gopyo vidhvastabandhanāḥ //
vimuktasaṃśayakleśā darśanānandasaṃplutāḥ//
ūcuśca gopavadhvastāḥ kṛṣṇaṃ nirmalamānasāḥ

//
// gopya ūcuḥ // //
adya naḥ saphalaṃ janma adya naḥ saphalā dṛśaḥ //
yattvāṃ paśyāma govinda nāgarījanavallabham

puṇyahīnā na paśyaṃti kṛṣṇākhyaṃ puruṣaṃ param //
vākyairhetvarthasaṃyuktairyadi saṃbodhitā vayam //
tathāpi māyā hṛdayānnāpaiti madhusūdana

// śrīkṛṣṇa uvāca // //
darśanātsparśanāccāsya vimuktā'śeṣabandhanāḥ //
snātvā ca sakalānkāmānavāpsyatha vrajāṃganāḥ

// gopya ūcuḥ // //
adbhuto hi prabhāvaste saraso'sya udāhṛtaḥ //
vidhiṃ brūhi jagannātha vistarādvṛṣṇinandana

// śrīkṛṣṇa uvāca // //
bhavatīnāṃ mayā sārddhaṃ sañjātamatra darśanam //
tasmānmayā sadā hyatra snātavyaṃ niyamena hi

yaḥ snātvā parayā bhaktyā pitṝnsantarpayiṣyati //
śrāvaṇasya site pakṣe dvādaśyāṃ niyataḥ śuciḥ

dattvā dānaṃ svaśaktyā ca māmuddiśya tathā pitṝn //
labhate vaiṣṇavaṃ lokaṃ pitṛbhiḥ parivāritaḥ

maya tīrthaṃ samāsādya kṛtvā ca karayoḥ kuśān //
phalamekaṃ gṛhītvā tu mantreṇārghyaṃ pradāpayet !/ ७४ //
gṛhāndhakūpe patitaṃ māyā pāśaśatairvṛtam //
māmuddhara mahīnātha gṛhāṇārghyaṃ namo'stu te

// arghyamantraḥ // //
snātvā yaḥ parayā bhaktyā pitṝnsaṃtarpya bhāvataḥ //
kuryācchrāddhaṃ ca parayā pitṛbhaktyā samanvitaḥ

dakṣiṇāṃ ca tato dadyādrajataṃ rukmameva ca //
viśeṣataḥ pradātavyaṃ pāyasaṃ ca saśarkaram

navanītaṃ ghṛtaṃ chatraṃ kaṃbalājinameva ca //
bhavatībhiḥ samaṃ yasmātsaṃjātaṃ mama darśanam //
āgaṃtavyaṃ mayā tasmātsadā hyasmiñjalāśaye

yo'tra snānaṃ prakurute mayasya sarasi priyāḥ //
gaṃgāsnānaphalaṃ tasya viṣṇulokastathā'kṣayaḥ

muktiṃ prayāṃti tasyaiva pitarastrikulodbhavāḥ //
putrapautrasamāyukto dhanadhānyasamanvitaḥ //
yāvajjīvaṃ sukhaṃ bhuktvā cānte haripuraṃ vrajet

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe caturthe dvārakāmāhātmye mayanirmitasaromāhātmyavarṇanaṃnāma dvādaśo'dhyāyaḥ