Skanda Purana · Chapter 7.12

// pulastya uvāca // //
tato gacchennṛpaśreṣṭha rūpatīrthamanuttamam //
sarvapāpaharaṃ nṝṇāṃ rūpasaubhaṇyadāyakam

tatra pūrvaṃ vapurnāmnā loke khyātā varāpsarāḥ //
siddhiṃ gatā mahārāja yathā pūrvaṃ nigadyate

purā''sītkācidābhīrī virūpā vikṛtānanā //
lambodarī ca kugrīvā sthūladaṃtaśiroruhā

ekadā phalamādātuṃ bhramamāṇā'rbudācale //
māghaśuklatṛtīyāyāṃ patitā girinirjhare

divyamālyāṃbaradharā divyairaṃgaiḥ samanvitā //
padmanetrā sukeśāṃtā sarvalakṣaṇalakṣitā

sā saṃjātā mahārāja tīrthasyāsya prabhāvataḥ //
etasminneva kāle tu śakrastatra samāgataḥ

krīḍārthaṃ parvataśreṣṭhe tāṃ dadarśa śubhekṣaṇām //
tataḥ kāmaśarairviddhastāmuvāca sumadhyamām

// indra uvāca // //
kā tvaṃ vada varārohe kimarthaṃ tvamihāgatā //
devī vā nāgakanyā vā siddhā vidyādharī tu vā

mano me'pahṛtaṃ subhrūstvayā ca padmanetrayā //
śakro'haṃ sarvadeveśo bhaja māṃ cāruhāsini

// nāryuvāca // //
ābhīrī tridaśādhīśa tathāhaṃ bahubhartṛkā //
phalārthaṃ tu samāyātā patitā girinirjhare

snātvā rūpamidaṃ prāptā surūpaṃ ca śubhaṃ mayā //
durllabhastvaṃ hi devānāṃ kiṃ punarmartyajanmanām

vaśagāste surāḥ sarve mayi kiṃ kriyate spṛhā //
bhaja māṃ tridaśādhīśa yathākāmaṃ surādhipa

// pulastya uvāca // //
evamuktastayā śakraḥ kāmayāmāsa tāṃ tadā //
nivṛttamadano bhūtvā tāmuvāca sumadhyamām

// indra uvāca // //
varaṃ varaya kalyāṇi yatte manasi varttate //
vinayāttava tuṣṭo'haṃ dāsyāmi varamuttamam

// nāryuvāca // //
māghaśuklatṛtīyāyāṃ naro vā vanitā tathā //
snānaṃ yaḥ kurute bhaktyā prītāḥ syuḥ sarvadevatāḥ

surūpaṃ jāyatāṃ teṣāṃ durllabhaṃ tridaśairapi //
māṃ naya tvaṃ sahasrākṣa surāvāsaṃ surādhipa

// pulastya uvāca // //
evamastviti tāmuktvā gṛhītvā tāṃ surādhipaḥ //
vimāne ca tayā sārddhaṃ jagāma tridivaṃ prati

vapuḥ prāptaṃ tayā yasmāttasmātpā rthivasattama //
nāmnā vapuriti khyātā sā babhūva varāpsarāḥ

māghaśuklatṛtīyāyāṃ devāstasmiñjalāśaye //
snānaṃ sarve prakurvaṃti prabhāte bhaktisaṃyutāḥ

tatrānyā devakanyāśca siddhayakṣāṃganāstathā //
yastatra kurute snānaṃ tasminkāle narādhipa

rūpaṃ ca labhate tādṛgyādṛglabdhaṃ tayā purā //
sarve tatra bhaviṣyaṃti siddhavidyādharoragāḥ

tasyaiva pūrvadigbhāge bilamasti suśobhanam //
yatrāgatya prakurvaṃti snānaṃ pātālakanyakāḥ/

tatra snātvā gṛhītvāpo bile tasminvrajaṃti tāḥ //
tatra vaināyake pīṭhe mahatpāṣāṇajaṃ jalam

tenodakena saṃyuktaḥ siddho bhavati mānavaḥ //
gṛhītvā tajjalaṃ yastu yatra yatrābhigacchati

svarge vā bhūtale vāpi na kenāpi pradhṛṣyate //
tatrāsti vivaradvāre tilakonāma pādapaḥ

tasya puṣpaiḥ phalaiścaiva sarvaṃ kāryaṃ prasiddhyati //
bhakṣaṇāddhāraṇādvāpi siddho bhavati mānavaḥ

tasminbile tu pāṣāṇāḥ samantācchaṃkhasannibhāḥ //
tenodakena saṃspṛṣṭā bhavaṃti ca hiraṇmayāḥ

vandhyā nārī jalaṃ tatra yā pibettilakānvitam //
api varṣaśatābdā ca sadyo garbhavatī bhavet//

vyādhigrasto'pi yo marttyaḥ snānaṃ tatra samācaret //
nīrogo jāyate sadyo grahagrasto vimucyate

bhūtapretapiśācānāṃ doṣaḥ sadyaḥ praṇaśyati //
tenodakena saṃspṛṣṭe sarvaṃ naśyati duṣkṛtam

api kīṭapataṃgā ye piśācāḥ pakṣiṇo mṛgāḥ //
tenodakena ye spṛṣṭāḥ sadyo yāsyaṃti sadgatim

// yayātiruvāca // //
apyadbhutamidaṃ brahmanmāhātmyaṃ bhavatā mama //
kathitaṃ rūpatīrthasya na bhūtaṃ na bhaviṣyati //

kimatra kāraṇaṃ brahmansarvebhyo'pyadhikaṃ smṛtam //
sarvaṃ vistarato brūhi paraṃ kautūhalaṃ hi me

// pulastya uvāca // //
tatra pūrvaṃ tapastaptamadityā nṛpasattama //
indre rājyaparibhraṣṭe balau trailokyanāyake //
avatīrṇaścaturbāhuradityāṃ nṛpasattama

tasmiñjāte mahāviṣṇāvadityā cāsurāntake //
guptayā vivaradvāre bhayāddānavasaṃbhavāt

jātamātro haristasminsthāpito nirjhare tayā //
tasmātpavitratāṃ prāptaṃ tīrthaṃ nṝṇāmabhīṣṭadam

na cānyatkāraṇaṃ rājansatyametanmayoditam //
māghaśuklatṛtīyāyāṃ tatra jātastrivikramaḥ

tilakaḥ sarva vṛkṣāgryaḥ putravatparipālitaḥ //
adityā sevito nityaṃ svahastena jalaiḥ śubhaiḥ

etatte sarvamākhyātaṃ tīrthamāhātmyamuttamam //
tasmātsarvaprayatnena snānaṃ tatra samācaret //
sarvakāmapradaṃ nṝṇāmiha loke paratra ca

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṇḍe rūpatīrthamāhātmyavarṇanaṃnāma dvādaśo'dhyāyaḥ