Skanda Purana · Verses 7.11-4

// īśvara uvāca // //
sārasvatasya viprasya śrutvā bhojanṛpo vacaḥ //
vivarṇavadano bhūtvā pragṛhyāṃghrī vaco'bravīt

mune naivaṃ tvayā vācyaṃ gaṃtavyaṃ niścitaṃ mayā //
narāṇāṃ puṇyadā yātrā kathayasva kathaṃ bhavet

kiṃ grāhyaṃ kiṃ ca moktavyaṃ kiṃ deyaṃ kiṃ na dīyate //
tīrthopavāsaḥ snānaṃ ca saṃdhyāsnānavidhikramaḥ //
pūjā nidrā japo rātrau sarvaṃ saṃkṣepato vada

// sārasvata uvāca // //
surāṣṭradeśe gantavyaṃ girau raivatake yadi //
nṛpa yātrāvidhiṃ vakṣye tvamekāgramanāḥ śṛṇu //

bṛhaspatibalaṃ gṛhya sūryaṃ saṃtarpya cottamam //
vāmataḥ pṛṣṭhataḥ sarvaṃ vṛtvā saṃśodhya vāsaram

caṃdralagnaṃ grahājjñātvā baliṣṭhājjanmarāśitaḥ//
śakunaṃ ca śubhaṃ labdhvā prasthātavyaṃ nṛpairnṛpa

tīrthe sadaiva gaṃtavyaṃ sarve māsāśca śobhanāḥ //
tithayaścottamāḥ sarvāḥ snānadānārcanādiṣu

aṣṭamyāṃ ca caturdaśyāṃ māsāṃte pūrṇimādine //
saṃkrāṃtau grahaṇe kālā ete proktā bhavārcane

kailāsaṃ parvataṃ tyaktvā devīṃ devāṃśca saṃgatān//
vaiśākhe paṃcadaśyāṃ tu bhūmiṃ bhittvā bhavo'bhavat

tasminneva dine devī svarṇarekhā nadī talāt //
paṃthānaṃ vāsukiṃ prāpya sarvapāpapraṇāśanī

/
airāvatapadākrāṃta ujjayanto mahāgiriḥ //
susrāva toyaṃ bahudhā gajapādodbhavaṃ śuci

devā brahmādayaḥ sarve gaṃgādyāḥ saritastathā //
vastrāpathe mahākṣetre bhavabhāvena saṃgatāḥ

vastrāpathasya kṣetrasya pramāṇaṃ śṛṇu bhūpate //
harasya tyajato bhūmau patitaṃ vastrabhūṣaṇam

tāvanmātraṃ smṛtaṃ kṣetraṃ devairvastrāpathaṃ kṛtam //
uttareṇa nadī bhadrā pūrvasyāṃ yojanadvayam

dakṣiṇena baleḥ sthānamujjayanto nadīmanu //
aparasyāṃ paraṃ nadyo saṃgamaṃ vāmanātpurāt

etadvastrāpathaṃ kṣetraṃ bhuktimuktipradāyakam //
kṣetrasya vistaro jñeyo yojanānāṃ catuṣṭayam

vaiśākhapaṃcadaśyāṃ tu bhavo bhāvena bhūpate //
pūjyate śivaloke tu sthīyate brahmavāsaram

ato vasaṃte saṃprāpte prayāṇaṃ kuru bhūpate //
nigṛhya niyamānbhūtvā śuciḥ snāto jitendriyaḥ

gajavājirathāṃstyaktā padābhyāṃ yāti yo naraḥ //
puṣpakeṇa vimānena sa yāti śivamaṃdiram

ekabhaktena naktena tathaivāyācitena ca //
bhikṣāhāreṇa toyena phalāhāreṇa vā yadi

upavāsena kṛcchreṇa śākāhāreṇa yāti yaḥ //
sa yāti sundarīvṛndairvījyamāno gaṇairdivi

malasnānaṃ vinā mārge pādābhyaṃgavivarjitaḥ //
maladhārī kṣīṇatanuryaṣṭihasto jitendriyaḥ

śītātapajalakliṣṭaḥ śivasmaraṇatatparaḥ //
yadi yāti naro yāti sa bhittvā sūryamaṃḍalam

narakasthānapi pitṝnmātṛtaḥ pitṛto nṛpa //
akṣayaṃ sapta saptaiva nayedevaṃ śivālaye

luṇṭhanbhūmau yadā yāti mṛgacarmāvaguṃṭhitaḥ //
daṇḍapramāṇabhūmervā saṃkhyāṃ kurvannaro yadi

araṇye nirjale sthāne jalāṃtaḥparipīḍitaḥ //
śaraṇyaṃ śaṃkaraṃ kṛtvā mano niścalamātmanaḥ

saptadvīpavatīṃ pṛthvīṃ samudravasanāṃ nṛpa //
sa labdhvā bahubhiryajñairyajñe dattvā ca medinīm

saptabhaumavimānastho divyadeho harākṛtiḥ //
nirīkṣya medinīṃ maṃdaṃ kṛta maṃgalamaṇḍanam

mṛganetrābhujasparśalagnapīnapayodharaḥ //
gītavādyavinodena satyalokaṃ vrajennaraḥ

vidhāya bhujavegaṃ vā pādau baddhvā śanaiḥ śanaiḥ //
maunena mānuṣo māyāṃ tyaktvā yāti śivālaye

brahmaghno vā surāpo vā steyī vā gurutalpagaḥ //
kṛtaghno mucyate pāpairmṛto muktimavāpnuyāt

mātaraṃ pitaraṃ deśaṃ bhrātaraṃ svajanabāṃdhavān //
grāmaṃ bhūmiṃ gṛhaṃ tyaktvā kṛtvā ceṃdriyasaṃyamam

gṛhītvā śivasaṃskāraṃ naro bhrāmyati bhūtale //
draṣṭuṃ tīrthānyanekāni puṇyānyāyatanāni ca

kasmiṃstīrthe śubhe sthāne chittvā saṃsārabandhanam //
abhayāṃ dakṣiṇāṃ dattvā śivaśiveti bhāṣakaḥ

ekāṃte nirjane sthāne śivasmaraṇatatparaḥ //
yadi tiṣṭhati taṃ yānti namaskartuṃ narādhipa

āyāṃti devatāḥ sarve cihnaṃ tasya nirīkṣitum //
vimānavṛndairnetavyaḥ kadāsau puruṣottamaḥ

yadā tu pañcatvamupaiti kāle kalevaraṃ skandhakṛtaṃ naraiśca //
nirīkṣyamāṇaḥ surasundarībhiḥ sa nīyamāno madavihvalābhiḥ

surendrasūryāgnidhaneśarudraiḥ saṃpūjyamānaḥ śivarūpadhārī //
surādilokānpravimucya vegācchivālaye tiṣṭhati rudrabhaktaḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe dvitīye vastrāpathakṣetra māhātmye vastrāpathayātrāvidhānavarṇanaṃnāmaikādaśo'dhyāyaḥ