Skanda Purana · Chapter 7.118

// īśvara uvāca // //
tato gacchenmahādevi gopyādityamanuttamam //
bhūteśādvāyave bhāge dhanuṣāṃ triṃśakentare

balātibaladaityaghnyā dakṣiṇāgneyasaṃsthitam //
dhanuṣāṃ daśake devi saṃsthitaṃ pāpanāśanam

tasyotpattiṃ pravakṣyāmi mahāpāpaharāṃ śubhām //
yāṃ śrutvā mānavo bhaktyā duḥkhaśokaiḥ pramucyate

purā kṛṣṇo mahātejā yadā prabhāsamāgataḥ //
sahito yādavaiḥ sarvaiḥ ṣaṭpañcāśatikoṭibhiḥ

ṣoḍaśaiva sahasrāṇi gopyastatra samāgatāḥ //
lakṣamekaṃ tathā ṣaṣṭirete kṛṣṇasutāḥ priye

tatra prābhāsike kṣetre saṃsthitāḥ pāpanāśane //
yādavasthalamāsādya yāvadraivatako giri

tatra dvādaśavarṣāṇi saṃsthitāste mahābalāḥ //
kṣetraṃ pavitramādāya śivaliṃgāni te pṛthak //
sthāpayāñcakrire sarve hyaṃkitāni svanāmabhiḥ

evaṃ samagraṃ tatkṣetraṃ yāvaddvādaśayojanam //
dhvajaliṃgāṃkitaṃ cakruḥ sarve yādavapuṃgavāḥ

hastahastāntare devi prāsādāḥ kṣetra madhyataḥ //
suvarṇakalaśopetāḥ patākākulitāṃbarāḥ //
virājaṃte tu tatrasthāḥ kīrtistaṃbhā hareriva

tato gopyo mahādevi ādyā yāḥ ṣoḍaśa smṛtāḥ //
tāsāṃ nāmāni te vakṣye tāni hmekamanāḥ śṛṇu

laṃbinī candrikā kāntā krūrā śāntā mahodayā //
bhīṣaṇī nandinī'śokā suparṇā vimalā'kṣayā

śubhadā śobhanā puṇyā haṃsasyaitāḥ kalāḥ smṛtāḥ //
haṃsa eva mataḥ kṛṣṇaḥ paramātmā janārdanaḥ

tasyaitāḥ śaktayo devi ṣoḍaśaiva prakīrtitāḥ //
candrarūpī tataḥ kṛṣṇaḥ kalārūpāstu tāḥ smṛtāḥ

saṃpūrṇamaṇḍalā tāsāṃ mālinī ṣoḍaśī kalā //
pratipattithimārabhya vicaratyāsu candramāḥ

ṣoḍaśaiva kalā yāstā gopīrūpā varānane //
ekaikaśastāḥ saṃbhinnāḥ sahasreṇa pṛthakpṛthak

evaṃ te kathitaṃ devi rahasyaṃ jñānasaṃbhavam //
evaṃ yo veda puruṣaḥ sa jñeyo vaiṣṇavo budhaiḥ

atha tābhiḥ kṛtāñjñātvā prāsādānyādavaiḥ pṛthak //
tato gopyo'pi tāḥ sarvāḥ sahasrāṇi tu ṣoḍaśa //
kṛṣṇamājñāpya bhāvena sthāpayāṃcakrire ravim

ṛṣibhirnāradādyaistāstathā kṣetranivāsibhiḥ //
taṃ pratiṣṭhāpayāmāsuḥ pratiṣṭhāvidhinā ravim

pratiṣṭhite tataḥ sūrye dadurdānāni bhūriśaḥ //
tataḥ kṣetranivāsibhyo gobhūhemāṃbarāṇi ca

tatasta ṛṣayaḥ sarve saṃtuṣṭā hṛṣṭamānasāḥ //
cakrurnāma ravestatra gopyādityeti viśrutam//
sarvapāpa haraṃ devaṃ mahāsaubhāgyadāyakam

evaṃ kṛte kṛtārthāstāḥ saṃprāpyātimahadyaśaḥ //
jagmuryathāgataṃ sarvā dvārakāṃ kṛṣṇasaṃyutāḥ

punaḥ kālāntare devi śāpāddurvāsasaḥ priye //
yādavasthalatāṃ prāptāḥ prabhāse pāpanāśane

evaṃ te kathito devi gopyādityasamudbhavaḥ //
māhātmyaṃ tasya te vacmi pūjāvandanajaṃ kramāt

asminmitravane devi yo gopībhiḥ pratiṣṭhitaḥ //
tasya darśanamātreṇa duḥkhaśokaiḥ pramucyate

sutapteneha tapasā yajñairvā bahudakṣiṇaiḥ //
tāṃ gatiṃ te narā yānti ye gopīravimāśritāḥ

yena sarvātmanā bhāvo gopyāditye niveśitaḥ //
maheśvari kṛtārthatvātsa ślāghyo dhanya eva saḥ

api naḥ sa kule dhanyo jāyate kulapāvanaḥ //
bhāgyavānbhaktibhāvena yena bhānurupāsitaḥ

saptamyāṃ pūjayedyastu māghe māsyuṣasi priye //
saptāvarānsapta pūrvānpitṝnsopyuddharennaraḥ

chinatti rogānduśceṣṭāndurjayāñjayati hyarīn

na saptamyāṃ spṛśettailaṃ nīlavastraṃ na dhārayet //
na cāpyāmalakaiḥ snānaṃ na kuryātkalahaṃ kvacit

nīlaraktena vastreṇa yatkarma kurute dvijaḥ //
snānaṃ dānaṃ japo homaḥ svādhyāyaḥ pitṛtarpaṇam //
vṛthā tasya mahāyajñā nīlasūtrasya dhāraṇāt

nīlīraktaṃ yadā vastraṃ viprastvaṃgeṣu dhārayet //
ahorātroṣito bhūtvā pañcagavyena śuddhyati

romakūpe yadā gacchedrasaṃ nīlasya kasyacit //
patitastu bhavedviprastribhiḥ kṛcchrairvyapohati

nīlamadhyaṃ yadā gacchetpramādādbrāhmaṇaḥ kvacit //
ahorātroṣito bhūtvā pañcagavyena śuddhyati

nīladāru yadā bhidyedbrāhmaṇānāṃ śarīrake //
śoṇitaṃ dṛśyate tatra dvijaścāndrāyaṇaṃ caret

kuryādajñānato yastu nīlaṃ vai dantadhāvanam //
kṛtvā kṛcchradvayaṃ tasya śuddhiruktā manīṣibhiḥ

ityetatkathitaṃ devi gopyādityamahodaya //
pāpaghnaṃ sarvajantūnāṃ śrutaṃ sarvārthasādhakam //

gavāṃ śatasahasraistu dattairyatkurujāṃgale //
puṇyaṃ bhavati deveśi tadgopyādityadarśane

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye gopyādityamāhātmyavarṇanaṃnāmāṣṭādaśottaraśatatamo'dhyāyaḥ