Skanda Purana · Chapter 7.119

// īśvara uvāca // //
tato gacchenmahādevi mahādevīṃ mahāprabhām //
balātibaladaityaghnīṃ nāmneti prathitāṃ kṣitau

anādinidhanāṃ devīṃ tatra kṣetre vyavasthitām //
koṭibhūtaparīvārāṃ sarvadaityanibarhiṇīm

// devyuvāca // //
balātibaladaityaghnī kathamuktā tvayā prabho //
balātibalanāmānau kathaṃ daityau nipātitau

kutra tiṣṭhati sā devī kiṃprabhāvā maheśvara //
māhātmyamakhilaṃ tasyāḥ sarvaṃ vistarato vada

// īśvara uvāca // //
śṛṇu devi pravakṣyāmi kathāṃ pāpapraṇāśanīm //
yāṃ śrutvā mānavo bhaktyā mucyate sarvapātakaiḥ

āsīdraktāsuronāma mahiṣasya suto balī //
mahākāyo mahābāhurhiraṇyākṣa ivāparaḥ

balātibala nāmānau tasya putrau babhūvatuḥ //
tau vijitya surānsarvāndevendrāgnipurogamān

trailokye'sminnirātaṃkau cakratū rājyamañjasā //
tayoḥ senā mukhe vīrāstrayastriṃśatprakīrtitāḥ

raudrātmāno mahāyodhāḥ sahasrākṣauhiṇīmukhāḥ //
siṃhaskandhā mahākāyā durātmāno mahābalāḥ

dhūmrākṣo bhīmadaṃṣṭraśca kālavaśyo mahāhanuḥ //
brahmaghno yajñakopaśca strīghnaḥ pāpaniketanaḥ

vidyunmālī ca bandhūkaḥ śaṃkukarṇo vibhāvasuḥ //
devāṃtako vikarmā ca durbhikṣa krūra eva ca

hayagrīvo'śvakarṇaśca ketumānvṛṣabho dvijaḥ //
śarabhaḥ śalabho vyāghro nikuṃbho maṇiko bakaḥ

śūrpako vikṣaro mālī kālo daṇḍakakeralaḥ //
ete daityā mahākāyāstayoḥ senādhikāriṇaḥ

evaṃ taiḥ pṛthivī vyāptā pañcāśatkoṭi vistarā //
evaṃ jñātvā tadā devā bhayenodvignamānasāḥ

sarvairdevarṣibhiḥ sārdhaṃ jagmuste himavadvanam //
stotreṇānena tāṃ devīṃ tuṣṭuvuḥ prayatāstadā

// devā ūcuḥ // //
jayākṣare jayā'naṃte jayā'vyakte nirāmaye //
jaya devi mahāmāye jaya devarṣivaṃdite

jaya viśveśvare gaṃge jaya sarvārthasiddhide //
jaya brahmāṇi kaumāri jaya nārāyaṇīśvari

jaya brahmāṇi cāmuṃḍe jayendrāṇi maheśvari //
jaya mātarmahālakṣmi jaya pārvati sarvage

jaya devi jagatsṛṣṭe jayairāvati bhārati //
jayānaṃte jaya jaye jaya devi jalāvile

jayeśāni śive śarve jaya nityaṃ jayārcite //
mokṣade jaya sarvajñe jaya dharmārthakāmade

jaya gāyatri kalyāṇi jaya sahye vibhāvari //
jaya durge mahākāli śiva dūti jayā'jaye

jaya caṇḍe mahāmuṇḍe jaya nande śivapriye //
jaya kṣemaṃkari śive jaya kalyāṇi revati

jayome siddhimāṃgalye harasiddhe namostu te //
jayāparṇe jayānande mahiṣā'suraghātini

jaya medhe viśālākṣi jayānaṃge sarasvati //
jayāśeṣaguṇāvāse jayāvarte surāntake

jaya saṃkalpasaṃsiddhe jaya trailokyasuṃdari //
jaya śuṃbhaniśuṃbhaghne jaya padme'drisaṃbhave

jaya kauśiki kaumāri jaya vāruṇi kāmade //
namonamaste śarvāṇi bhūyobhūyo jayāmbike

trāhi nastrāhi no devi śaraṇye śaraṇāgatān

saivaṃ stutā bhagavatī devaiḥ sarvairvarānane //
ātmānaṃ darśayāmāsa bhābhāsitadigantaram

namaskṛtya tu tāmūcuḥ surāste bhayanāśanīm //
balātibalanāmānau hatvā daityau mahābalau //
teṣāṃ caiva mahatsainyaṃ pāhyato mahato bhayāt

teṣāṃ tadvacanaṃ śrutvā dattvā tebhyo'bhayaṃ tataḥ //
babhūvādbhutarūpā sā trinetrā cenduśekharā

siṃhārūḍhā mahādevi nānāśastrāstradhāriṇī //
suvaktrā viṃśatibhujā sphūrjadvidyullatopamā

tatoṃ 'bikā ninādoccaiḥ sāṭṭahāsaṃ muhurmuhuḥ

tasyā nādena ghoreṇa kṛtsnamāpūritaṃ nabhaḥ //
prakaṃpitākhilā corvī saridvāridhimekhalā

śailatuṃgastanī ramyā pramadeva bhayāturā //
te'pi tatrāsurāḥ prāptāścaturaṃgabalānvitāḥ

samyagviditavikrāntāḥ kālāntakayamopamāḥ //
rakṣo dānavadaityāśca pātāle ye'pi saṃsthitāḥ

te sarva eva daityendrāḥ koṭiśaḥ samupāgatāḥ //
tato'bhavanmahāyuddhaṃ devyāstatrāsuraiḥ saha

babhūva sarvabrahmāṇḍe hyakāṇḍakṣayakāraṇam //
akṣauhiṇīsahasrāṇi trayastriṃśatsureśvari

ekaviṃśatsahasrāṇi śatānyaṣṭau ca saptatiḥ //
sānugānāṃ sayodhānāṃ rathānāṃ vātaraṃhasām

hatvā sā līlayā devī ninye kṣayamanākulā

tato devyā hatānāṃ ca dānavānāṃ mahaujasām //
gajavājirathānāṃ ca śarīrairāvṛtā mahī

kabaṃdhanṛtyasaṃkule sravadvasāsthikarddame //
raṇājire niśācarāstato vicerurūrjitāḥ

śṛgāla gṛdhavāyasāḥ paraṃ prapātamādadhuḥ //
kvacitpare niśācarāḥ prapītaśoṇitotkaṭāḥ //
pratarpya cātmanaḥ pitṝnsamarcayaṃstathā ṛṣīn

gajānnarāṃsturaṃgamānbabhakṣire sunirghṛṇāḥ //
rathoḍupaistathā pare taraṃti śoṇitārṇavam

iti pragāḍhasaṃgare surārisaṃghasaṃkule //
virājate'mbikā dhanuḥ śarā'siśūladhāriṇī

gajendradarpamarddanī turaṃgayūthapothinī //
surārisainyanāśinī itastataḥ prapaśyatī

siṃhāṣṭakayukte mahā pretake bhūdharahaṃsaśubhrojjaladbhāsvarābhe vṛṣabhasamāne māninīmatho te daityendravīrāḥ paśyaṃtaḥ samudbhūtaroṣāstato'pi jagmurnadanto ravanto ravaṃ meghanādāḥ

hāhākāraṃ vikurvāṇā hanyamānāstato'surāḥ //
kecitsamudraṃ viviśuradrīnkecicca dānavāḥ

kecilluñcitamūrdhāno jālmā bhūtvā vane'vasan //
dayādharmaṃ bruvāṇāśca nirgraṃthavratamāsthitāḥ

kecitprāṇaparā bhītāḥ pākhaṇḍāśramamāsthitāḥ //
hetuvādaparā mūḍhā niḥśaucā nirapekṣakāḥ

te cādyāpīha dṛśyante loke kṣapaṇakāḥ kila //
tathaiva bhindakāścānye śivaśāstrabahiṣkṛtāḥ

kecitkaulavratā hyasmindṛśyante sakalairjanaiḥ//
surāstrīmāṃsabhūyiṣṭhā vikarmasthāśca liṅginaḥ

prāyo naiṣkṛtikāḥ pāpā jihvopasthaparāyaṇā//
evaṃ devyā hatāḥ sarve balātibalasaṃyutāḥ

prabhāsaṃ kṣetramāsādya saṃsthitā sā tadāmbikā//
yoginīnāṃ catuḥṣaṣṭyā saṃyutā pāpanāśinī//
balātibalanāśīti prabhāse prathitā kṣitau

devyuvāca//
catuḥṣaṣṭistvayā proktā yoginyo yāḥ sureśvara//
tāsāṃ nāmāni me brūhi sarvapāpaharāṇi ca

// // īśvara uvāca // //
śṛṇu devi pravakṣyāmi yoginīnāṃ mahodayam //
sarvarakṣākaraṃ divyaṃ mahābhayavināśanam

ādau tatra mahālakṣmīrnaṃdā kṣemaṃkarī tathā //
śivadūtī mahābhadrā bhrāmarī candramaṇḍalā

revatī harasiddhiśca durgā viṣamalocanā //
sahajā kulajā kubjā māyāvī śāṃbhavī kriyā

ādyā sarvagatā śuddhā bhāvagamyā manotigā //
vidyāvidyā mahāmāyā suṣumnā sarvamaṃgalā

ॐkārātmā mahādevi vedārthajananī śivā //
purāṇānvīkṣikī dīkṣā cāmuṇḍā śaṃkarapriyā

brāhmī śāṃtikarī gaurī brahmaṇyā brāhmaṇapriyā //
bhadrā bhagavatī kṛṣṇā grahanakṣatramālinī

tripurā tvaritā nityā sāṃkhyā kuṃḍalinī dhruvā //
kalyāṇī śobhanā nirayā niṣkalā paramā kalā

yoginī yogasadbhāvā yogagamyā guhāśayā //
kātyāyanī umā śarvā hyaparṇeti prakīrtitā

catuḥṣaṣṭirmahādevi evaṃ te parikīrtitāḥ //
stotreṇānena divyena bhaktyā yaḥ stauti caṃḍikām

taṃ putramiva śarvāṇī sarvāpatsvabhirakṣati //
caturdaśyāmathāṣṭamyāṃ navamyāṃ ca viśeṣataḥ

upavāsaikabhaktena tathaivāyācitena ca //
gṛhītaniyamā devi ye japaṃti ca caṃḍikām

varṣārdhaṃ varṣamekaṃ vā siddhāste tattvacāriṇaḥ //
āśvayukchuklapakṣe ca manvādiṣvaṣṭakāsu ca

kṛtvā mahotsavaṃ devīṃ yajecchreyo'bhivṛddhaye //
pāduke dhārayeddevyā durgābhakto hiraṇmaye

pramādavighnaśāṃtyarthaṃ kṣurikāṃ ca sadā pumān //
paśumāṃsāsavaiścaivamāsuraṃ bhāvamāśritāḥ

ye yajantyambikāṃ te syurdaityā aiśvaryabhoginaḥ //
devatvaṃ sāttvikā yāṃti sāttvikīṃ bhaktimāsthitāḥ

etatte kathitaṃ devi māhātmyaṃ pāpanāśanam //
balātibalanāśinyā devyā sarvārthasādhakam //
prabhāsakṣetrasaṃsthāyāḥ saṃkṣepātkīrtivardhanam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye balātibaladaityaghnīmāhātmyavarṇanaṃnāmaikonaviṃśatyuttaraśatatamo'dhyāyaḥ