Skanda Purana · Chapter 7.110

// īśvara uvāca // //
tato gacchedvarārohe prabhāseśvaramuttamam //
gaurītapovanāddevi paścime samudāhṛtam

dhanuṣāṃ saptake devi nātidūre vyavasthitam //
sthāpitaṃ tanmahāliṃgaṃ vasūnāmaṣṭamena hi

prabhāsa iti nāmnā hi śivapūjāratena vai //
sa putrakāmo deveśi prabhāsakṣetramāgataḥ

pratiṣṭhāpya mahāliṅgaṃ cacāra vipulaṃ tapaḥ //
āgneyamiti vikhyātaṃ divyābdānāṃ śataṃ priye

tatastasya mahādevi samyakchraddhānvi tasya vai //
tutoṣa bhagavānrudro dadau yanmanasīpsitam

bṛhaspatestu bhaginī bhuvanā brahmavādinī //
prabhāsasya tu sā bhāryā vasūnāmaṣṭamasya ca //

viśvakarmā sutastasyāḥ sṛṣṭikartā prajāpatiḥ//
devānāṃ takṣako vidvānmanormātāmahaḥ smṛtaḥ

takṣakaḥ sūryabiṃbasya tejasaḥ śātano mahān//
evaṃ tasyā'bhavatputro vasūnāmaṣṭamasya vai

prabhāsanāmno deveśi talliṃgārādhanodyataḥ //
iti te kathitaṃ devi prabhāseśvarasūcakam

māhātmyaṃ sarvapāpaghnaṃ sarvakāmapradaṃ śubham //
yastaṃ pūjayate bhaktyā samyakchraddhāsamanvitaḥ

bhūmiśāyī nirāhāro japanvai śatarudriyam //
māghe māsi caturdaśyāṃ snātvā sāgarasaṃgame

paṃcāmṛtena saṃsnāpya pūjayitvā vidhānataḥ

ya evaṃ kurute devi samyagyātrāmahotsavam //
sa muktaḥ pātakaiḥ sarvaiḥ sarvakāmaiḥ samṛddhyate //
vṛṣastatraiva dātavyaḥ samyagyātrāphalepsubhiḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye prabhāseśvaramāhātmyavarṇanaṃnāma daśottaraśatatamo'dhyāyaḥ