Skanda Purana · Verses 7.11-2

// prahlāda uvāca // //
tato gaccheddvijaśreṣṭhāstīrthaṃ viṣṇupadodbhavam //
yasya darśanamātreṇa gaṃgāsnānaphalaṃ labhet

yasyotpattirmayā pūrvaṃ kathitā dvijasattamāḥ //
yasya saṃsmaraṇādeva kīrtanātpāpanāśanam

hariṇā yā samānītā rukmiṇyarthe mahātmanā //
yasyā gaṇḍūṣamātreṇa hayamedhaphalaṃ labhet

viṣṇoḥ pādaprasūtāyā vaiṣṇavīti ca viśrutā //
tatra gatvā mahābhāga gṛhītvā'rghyaṃ vidhānataḥ

namasye tvāṃ bhagavati viṣṇupādatalodbhave //
gṛhāṇārghyamidaṃ devi gaṃge tvaṃ hariṇā saha

ityuccārya dvijaśreṣṭhā mṛdamālabhya pāṇinā //
prāṅmukhaḥ saṃyato bhūtvā snānaṃ kuryādatandritaḥ

devānpitṝnmanuṣyāṃśca tarpitavyaṃ tilākṣataiḥ //
upahṛtyopahārāṃśca hyāhūya brāhmaṇāṃstataḥ

śraddhayā parayā yuktaḥ śrāddhaṃ kuryādvicakṣaṇaḥ //
yathoktāṃ dakṣiṇāṃ dadyātsuvarṇaṃ rajataṃ tathā

dīnāndha kṛpaṇānāñca dānaṃ deyaṃ svaśaktitaḥ //
viśeṣataḥ pradātavyaṃ suvarṇaṃ dvijasattamāḥ

upānahau tato deye jalakumbhaṃ dvijātaye //
dadhyodanaṃ salavaṇaṃ śākajīrakasaṃyutam

raktavastraiḥ kaṃcukībhī rukmiṇīṃ paridhāpayet //
viprapatnīśca viprāṃśca viṣṇurmeprīyatāmiti

evaṃ kṛte dvija śreṣṭhāḥ kṛtakṛtyo bhavennaraḥ//
pitṝṇāmakṣayā tṛptirgayāśrāddhena vai yathā

vaiṣṇavaṃ lokamāyānti pitarastrikulodbhavāḥ //
jīvate sa śriyāyuktaḥ putrapautrasamanvitaḥ

prītaḥ sadā bhavettasya rukmiṇyā saha keśavaḥ //
yacchate vāñchitānsarvānaihikāmuṣmikānprabhuḥ

etanmāhātmyamatulaṃ viṣṇupādodbhavaṃ tathā //
yaḥ śṛṇoti harau bhaktyā sarvapāpaiḥ sa mucyate

śrutvā'dhyāyamimaṃ puṇyaṃ sarvapāpaiḥ pramucyate

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe caturthe dvārakāmāhātmye viṣṇupadatīrthamāhātmyavarṇanaṃnāmaikādaśo'dhyāya.//