સ્કંદ પુરાણ · શ્લોક 7.11-2

॥ પ્રહ્લાદ ઉવાચ ॥ ॥
તતો ગચ્છેદ્દ્વિજશ્રેષ્ઠાસ્તીર્થં વિષ્ણુપદોદ્ભવમ્ ॥
યસ્ય દર્શનમાત્રેણ ગંગાસ્નાનફલં લભેત્

યસ્યોત્પત્તિર્મયા પૂર્વં કથિતા દ્વિજસત્તમાઃ ॥
યસ્ય સંસ્મરણાદેવ કીર્તનાત્પાપનાશનમ્

હરિણા યા સમાનીતા રુક્મિણ્યર્થે મહાત્મના ॥
યસ્યા ગણ્ડૂષમાત્રેણ હયમેધફલં લભેત્

વિષ્ણોઃ પાદપ્રસૂતાયા વૈષ્ણવીતિ ચ વિશ્રુતા ॥
તત્ર ગત્વા મહાભાગ ગૃહીત્વાઽર્ઘ્યં વિધાનતઃ

નમસ્યે ત્વાં ભગવતિ વિષ્ણુપાદતલોદ્ભવે ॥
ગૃહાણાર્ઘ્યમિદં દેવિ ગંગે ત્વં હરિણા સહ

ઇત્યુચ્ચાર્ય દ્વિજશ્રેષ્ઠા મૃદમાલભ્ય પાણિના ॥
પ્રાઙ્મુખઃ સંયતો ભૂત્વા સ્નાનં કુર્યાદતન્દ્રિતઃ

દેવાન્પિતૄન્મનુષ્યાંશ્ચ તર્પિતવ્યં તિલાક્ષતૈઃ ॥
ઉપહૃત્યોપહારાંશ્ચ હ્યાહૂય બ્રાહ્મણાંસ્તતઃ

શ્રદ્ધયા પરયા યુક્તઃ શ્રાદ્ધં કુર્યાદ્વિચક્ષણઃ ॥
યથોક્તાં દક્ષિણાં દદ્યાત્સુવર્ણં રજતં તથા

દીનાન્ધ કૃપણાનાઞ્ચ દાનં દેયં સ્વશક્તિતઃ ॥
વિશેષતઃ પ્રદાતવ્યં સુવર્ણં દ્વિજસત્તમાઃ

ઉપાનહૌ તતો દેયે જલકુમ્ભં દ્વિજાતયે ॥
દધ્યોદનં સલવણં શાકજીરકસંયુતમ્

રક્તવસ્ત્રૈઃ કંચુકીભી રુક્મિણીં પરિધાપયેત્ ॥
વિપ્રપત્નીશ્ચ વિપ્રાંશ્ચ વિષ્ણુર્મેપ્રીયતામિતિ

એવં કૃતે દ્વિજ શ્રેષ્ઠાઃ કૃતકૃત્યો ભવેન્નરઃ॥
પિતૄણામક્ષયા તૃપ્તિર્ગયાશ્રાદ્ધેન વૈ યથા

વૈષ્ણવં લોકમાયાન્તિ પિતરસ્ત્રિકુલોદ્ભવાઃ ॥
જીવતે સ શ્રિયાયુક્તઃ પુત્રપૌત્રસમન્વિતઃ

પ્રીતઃ સદા ભવેત્તસ્ય રુક્મિણ્યા સહ કેશવઃ ॥
યચ્છતે વાઞ્છિતાન્સર્વાનૈહિકામુષ્મિકાન્પ્રભુઃ

એતન્માહાત્મ્યમતુલં વિષ્ણુપાદોદ્ભવં તથા ॥
યઃ શૃણોતિ હરૌ ભક્ત્યા સર્વપાપૈઃ સ મુચ્યતે

શ્રુત્વાઽધ્યાયમિમં પુણ્યં સર્વપાપૈઃ પ્રમુચ્યતે

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખંડે ચતુર્થે દ્વારકામાહાત્મ્યે વિષ્ણુપદતીર્થમાહાત્મ્યવર્ણનંનામૈકાદશોઽધ્યાય.॥