Skanda Purana · Chapter 7.11

// pulastya uvāca // //
tato gacchennṛpaśreṣṭha devaṃ koṭīśvaraṃ param //
yaṃ dṛṣṭvā mānavaḥ samyakparāṃ siddhimavāpnuyāt

śṛṇu tatrābhavatpūrvaṃ yadāścaryaṃ mahīpate //
dakṣiṇasyā munivarāḥ koṭisaṃkhyāpramāṇataḥ

anyo'nyaṃ spardhayā sarve helayā'rbudamāgatāḥ //
ahaṃ pūrvamahaṃ pūrvaṃ prapaśyāmyacaleśvaram

āgamiṣyati yaḥ paścādbrāhmaṇaḥ śvā bhaviṣyati //
pāpīyānbhaktirahitaḥ śraddhāhīno bhaviṣyati

ityevaṃ spardhamānāste helayā'rbudamāgatāḥ //
tataḥ sarve yatātmānaḥ samyagvrataparāyaṇāḥ

śāṃtāstapasvinaḥ sarve vedavidyāviśāradāḥ //
teṣāmīhitamājñāya samyakkāmaniṣūdanaḥ

kṛpayā parayāviṣṭo bhaktibhāvānmaheśvaraḥ //
koṭiṃ kṛtvā''tmaliṃgānāṃ tasminsthāne vyavasthitaḥ

ekasminneva kāle tu sarvairdṛṣṭo maheśvaraḥ //
munibhiśca nṛpaśreṣṭha koṭisaṃkhyaiḥ pṛthakpṛthak

atha te munayaḥ sarve samaṃ dṛṣṭvā maheśvaram //
vismayotphullanayanā sādhusādhviti cābruvan

bhaktiyuktā dvijāḥ sarve'stuvaṃste vaidikaiḥ stavaiḥ //
teṣāṃ tuṣṭastataḥ śaṃbhurvākyametaduvāca ha

//
// śrīmahādeva uvāca // //
tuṣṭo'haṃ munayaḥ sarve śraddhayā parayā hi vaḥ //
varaṃ vai vriyatāṃ śīghraṃ sarvaiścaiva pṛthakpṛthak

// ṛṣaya ūcuḥ // //
eṣa eva varo'smākaṃ sarveṣāṃ hṛdi varttitaḥ //
yugapaddarśanāddeva jāyatāṃ phalamuttamam

// śrīmahādeva uvāca // //
na vṛthā darśanaṃ me syādviśeṣādbrāhmaṇasya ca //
darśanaṃ ye kariṣyaṃti teṣāṃ ca tīrthajaṃ phalam

// munaya ūcuḥ // //
avaśyaṃ yadi dātavyo varo'smākaṃ maheśvara //
ekaṃ koṭimayaṃ liṃgaṃ kriyatāṃ vṛṣabhadhvaja

yasmindṛṣṭe phalaṃ nṛṇāṃ jāyate koṭiliṃgajam //
evameṣa varo'smākaṃ dīyatāṃ vṛṣabhadhvaja //

// pulastya uvāca // //
evaṃ saprārthamānānāṃ munīnāṃ bhāvitātmanām //
nirbhidya parvataśreṣṭhaṃ sahasā liṃgamudgatam

etasminneva kāle tu vāguvācāśarīriṇī //
kṛpayā parayā sarvāṃstānṛṣīnvasudhādhipa

// vāguvāca // //
koṭīśvarākhyaṃ me liṃgaṃ loke khyātiṃ gamiṣyati //
māghakṛṣṇacaturddaśyāṃ yaścainaṃ pūjayiṣyati

sarvaṃ koṭiguṇaṃ tasya phalaṃ viprā bhaviṣyati //
dākṣiṇātyo naro yastu śrāddhamatra kariṣyati

phalaṃ koṭiguṇaṃ tasya gayāśrāddhasamaṃ bhavet //
tasmādviśeṣataḥ pūjyaṃ mama liṃgaṃ ca mānavaiḥ

// pulastya uvāca // //
evamuktvā tu sā vāṇī virarāma mahīpate //
tataste munayaḥ sarve gaṃdhadhūpānulepanaiḥ

talliṃgaṃ pūjayāmāsuḥ śraddhayā parayā nṛpa //
pūjayitvā gatāḥ siddhiṃ sarve liṃgaprasādataḥ

iti śrīskānde mahāpurāṇa ekāśītisāhasryāṃ saṃhitāyāṃ saptame prabhātakhaṇḍe tṛtīye'rbudakhaṇḍe koṭīśvaramāhātmyavarṇanaṃnāmaikādaśo'dhyāyaḥ