Skanda Purana · Verses 7.10-4

// pārvatyuvāca // //
aho tīrthasya māhātmyaṃ gire raivatakasya ca //
bhavasya devadevasya tathā vastrāpathasya ca

gaṃgā sarasvatī caiva gomatī narmadā nadī //
svarṇarekhājale sarvāstathā brahmā savāsavaḥ

brahmendra viṣṇumukhyānāṃ devānāṃ śaṃkarasya ca //
vāso viracitastatra yāvadbrahmadinaṃ bhavet

kṣetratīrthaprabhāvaṃ ca prasādāttava śaṃkara //
śrutaṃ savistaraṃ sarvamidaṃ tvaduditaṃ mayā

maheśvara prabho brūhi kiṃ cakāra janeśvaraḥ //
bhojarājo mṛgīṃ prāpya sa ca sārasvato muniḥ

//
// īśvara uvāca // //
tāsu sarvāsu nārīṣu rūpaudāryaguṇādhikā //
nityaṃ pramuditā śāṃtā nityaṃ maṃgalakārikā

mātā svasā sakhī putrī strīṣu saṃbandhavardhanī //
pitā bhrātā guruḥ putraḥ puruṣeṣu tathā kṛtaḥ

evaṃ guṇavatīṃ bhāryāṃ prāpya hṛṣṭo janeśvaraḥ //
sārasvataṃ muniṃ stutvā rājā vacanamabravīt

// rājovāca // //
brahmā viṣṇurharaḥ sūrya indro'gnirmarutāṃ gaṇaḥ //
brahmacaryeṇa tapasā tvayā santoṣitāḥ prabho

daivataṃ paramaṃ me tvaṃ pitā mātā guruḥ prabhuḥ //
yena janmāṃtaraṃ sarvaṃ pratyakṣaṃ kathitaṃ mama

surāṣṭradeśo vikhyāto girī raivatako mahān //
bhavaḥ svayaṃbhūrbhagavānkṣetre vastrāpathe śrutaḥ

ujjayaṃtagirermūrdhni gaurīskandagaṇeśvarāḥ //
bhāvayaṃto bhavaṃ sarve saṃsthitā brahmavāsaram

vāmano nagaraṃ sthāpya śivaṃ siddheśvaraṃ prati //
jitvā daityaṃ baliṃ baddhvā svayaṃ raivatake sthitaḥ

ityetatsarvamāścaryaṃ jīvadbhiryadi dṛśyate //
tīrthayātrāvidhānena bhavo vastrāpathe hariḥ

tyaktvā rājyaṃ priyānputrānpattyaśvarathakuñjarān //
putraṃ rājye pratiṣṭhāpya gantavyaṃ niścitaṃ mayā

tvatprasādācchrutaṃ sarvaṃ gamyate yadi dṛśyate //
tīrthayātrāvidhānena bhavo vastrāpathe hariḥ

sūryalokaṃ somalokamiṃdralokaṃ hareḥ puram //
brahmalokamatikramya yāsye'haṃ śivamaṃdiram

śrutvā hi vākyaṃ vividhaṃ narendrātprahṛṣṭaromā sa munirbabhūva //
jijñāsamāno hi nṛpasya sarvaṃ nivārayāmāsa munirnarendram

// sārasvata uvāca // //
gṛhe'pi devā haraviṣṇumukhyā jalāni darbhā nṛpate tilāśca //
anekadeśāṃtaradarśanārthaṃ mano nivāryaṃ nṛpate tvayeti

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe dvitīye vastrāpathakṣetramāhātmye vastrāpatha kṣetrayātrotsukasya bhojabhūpasya sārasvatamunikṛtopadeśavarṇanaṃnāma daśamo'dhyāyaḥ