સ્કંદ પુરાણ · અધ્યાય 7.11

॥ પુલસ્ત્ય ઉવાચ ॥ ॥
તતો ગચ્છેન્નૃપશ્રેષ્ઠ દેવં કોટીશ્વરં પરમ્ ॥
યં દૃષ્ટ્વા માનવઃ સમ્યક્પરાં સિદ્ધિમવાપ્નુયાત્

શૃણુ તત્રાભવત્પૂર્વં યદાશ્ચર્યં મહીપતે ॥
દક્ષિણસ્યા મુનિવરાઃ કોટિસંખ્યાપ્રમાણતઃ

અન્યોઽન્યં સ્પર્ધયા સર્વે હેલયાઽર્બુદમાગતાઃ ॥
અહં પૂર્વમહં પૂર્વં પ્રપશ્યામ્યચલેશ્વરમ્

આગમિષ્યતિ યઃ પશ્ચાદ્બ્રાહ્મણઃ શ્વા ભવિષ્યતિ ॥
પાપીયાન્ભક્તિરહિતઃ શ્રદ્ધાહીનો ભવિષ્યતિ

ઇત્યેવં સ્પર્ધમાનાસ્તે હેલયાઽર્બુદમાગતાઃ ॥
તતઃ સર્વે યતાત્માનઃ સમ્યગ્વ્રતપરાયણાઃ

શાંતાસ્તપસ્વિનઃ સર્વે વેદવિદ્યાવિશારદાઃ ॥
તેષામીહિતમાજ્ઞાય સમ્યક્કામનિષૂદનઃ

કૃપયા પરયાવિષ્ટો ભક્તિભાવાન્મહેશ્વરઃ ॥
કોટિં કૃત્વાઽઽત્મલિંગાનાં તસ્મિન્સ્થાને વ્યવસ્થિતઃ

એકસ્મિન્નેવ કાલે તુ સર્વૈર્દૃષ્ટો મહેશ્વરઃ ॥
મુનિભિશ્ચ નૃપશ્રેષ્ઠ કોટિસંખ્યૈઃ પૃથક્પૃથક્

અથ તે મુનયઃ સર્વે સમં દૃષ્ટ્વા મહેશ્વરમ્ ॥
વિસ્મયોત્ફુલ્લનયના સાધુસાધ્વિતિ ચાબ્રુવન્

ભક્તિયુક્તા દ્વિજાઃ સર્વેઽસ્તુવંસ્તે વૈદિકૈઃ સ્તવૈઃ ॥
તેષાં તુષ્ટસ્તતઃ શંભુર્વાક્યમેતદુવાચ હ

॥
॥ શ્રીમહાદેવ ઉવાચ ॥ ॥
તુષ્ટોઽહં મુનયઃ સર્વે શ્રદ્ધયા પરયા હિ વઃ ॥
વરં વૈ વ્રિયતાં શીઘ્રં સર્વૈશ્ચૈવ પૃથક્પૃથક્

॥ ઋષય ઊચુઃ ॥ ॥
એષ એવ વરોઽસ્માકં સર્વેષાં હૃદિ વર્ત્તિતઃ ॥
યુગપદ્દર્શનાદ્દેવ જાયતાં ફલમુત્તમમ્

॥ શ્રીમહાદેવ ઉવાચ ॥ ॥
ન વૃથા દર્શનં મે સ્યાદ્વિશેષાદ્બ્રાહ્મણસ્ય ચ ॥
દર્શનં યે કરિષ્યંતિ તેષાં ચ તીર્થજં ફલમ્

॥ મુનય ઊચુઃ ॥ ॥
અવશ્યં યદિ દાતવ્યો વરોઽસ્માકં મહેશ્વર ॥
એકં કોટિમયં લિંગં ક્રિયતાં વૃષભધ્વજ

યસ્મિન્દૃષ્ટે ફલં નૃણાં જાયતે કોટિલિંગજમ્ ॥
એવમેષ વરોઽસ્માકં દીયતાં વૃષભધ્વજ ॥

॥ પુલસ્ત્ય ઉવાચ ॥ ॥
એવં સપ્રાર્થમાનાનાં મુનીનાં ભાવિતાત્મનામ્ ॥
નિર્ભિદ્ય પર્વતશ્રેષ્ઠં સહસા લિંગમુદ્ગતમ્

એતસ્મિન્નેવ કાલે તુ વાગુવાચાશરીરિણી ॥
કૃપયા પરયા સર્વાંસ્તાનૃષીન્વસુધાધિપ

॥ વાગુવાચ ॥ ॥
કોટીશ્વરાખ્યં મે લિંગં લોકે ખ્યાતિં ગમિષ્યતિ ॥
માઘકૃષ્ણચતુર્દ્દશ્યાં યશ્ચૈનં પૂજયિષ્યતિ

સર્વં કોટિગુણં તસ્ય ફલં વિપ્રા ભવિષ્યતિ ॥
દાક્ષિણાત્યો નરો યસ્તુ શ્રાદ્ધમત્ર કરિષ્યતિ

ફલં કોટિગુણં તસ્ય ગયાશ્રાદ્ધસમં ભવેત્ ॥
તસ્માદ્વિશેષતઃ પૂજ્યં મમ લિંગં ચ માનવૈઃ

॥ પુલસ્ત્ય ઉવાચ ॥ ॥
એવમુક્ત્વા તુ સા વાણી વિરરામ મહીપતે ॥
તતસ્તે મુનયઃ સર્વે ગંધધૂપાનુલેપનૈઃ

તલ્લિંગં પૂજયામાસુઃ શ્રદ્ધયા પરયા નૃપ ॥
પૂજયિત્વા ગતાઃ સિદ્ધિં સર્વે લિંગપ્રસાદતઃ

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાતખણ્ડે તૃતીયેઽર્બુદખણ્ડે કોટીશ્વરમાહાત્મ્યવર્ણનંનામૈકાદશોઽધ્યાયઃ