સ્કંદ પુરાણ · અધ્યાય 7.100

॥ ઈશ્વર ઉવાચ ॥ ॥
તતો ગચ્છેન્મહાદેવિ તયોરુત્તરસંસ્થિતમ્ ॥
તથા વાયવ્યદિગ્ભાગે બ્રહ્મણો બાલરૂપિણઃ

સાંબાદિત્યં સુરશ્રેષ્ઠે યઃ સાંબેન પ્રતિષ્ઠિતઃ ॥
સ્થાનાનિ ત્રીણિ દેવસ્ય દ્વીપેઽસ્મિન્ભાસ્કરસ્ય તુ

પૂર્વં મિત્રવનં નામ તથા મુણ્ડીરમુચ્યતે ॥
પ્રભાસક્ષેત્રમાસ્થાય સાંબાદિત્યસ્તૃતીયકઃ

તસ્મિન્ક્ષેત્રે મહાદેવિ પુરં યત્સાંબસંજ્ઞકમ્ ॥
દ્વિતીયં શાશ્વતં સ્થાનં તત્ર સૂર્યસ્ય નિત્યશઃ

પ્રીત્યા સાંબ સ્ય તત્રાર્કો જનસ્યાનુગ્રહાય ચ ॥
તત્ર દ્વાદશભાગેન મિત્રો મૈત્રેણ ચક્ષુષા

અવલોકયઞ્જગત્સર્વં શ્રેયોર્થં તિષ્ઠતે સદા ॥
પ્રયુક્તાં વિધિવત્પૂજાં ગૃહ્ણાતિ ભગવાન્સ્વયમ્

॥ દેવ્યુવાચ ॥ ॥
કોઽયં સાંબઃ સુતઃ કસ્ય યસ્ય નામ્ના રવેઃ પુરમ્ ॥
યસ્ય વાઽયં સહસ્રાંશુર્વરદઃ પુણ્યકર્મણઃ

॥ ॥ ઈશ્વર ઉવાચ ॥ ॥
ય એતે દ્વાદશાદિત્યા વિરાજન્તે મહાબલાઃ ॥
તેષાં યો વિષ્ણુસંજ્ઞસ્તુ સર્વલોકેષુ વિશ્રુતઃ

ઇહાસૌ વાસુદેવત્વમવાપ ભગવાન્વિભુઃ

તસ્ય સાંબઃ સુતો જજ્ઞે જાંબવત્યાં મહાબલઃ ॥
સ તુ પિત્રા ભૃશં શપ્તઃ કુષ્ઠરોગમવાપ્તવાન્ ॥
તેન સંસ્થાપિતઃ સૂર્યો નિજનામ્ના પુરં કૃતમ્

॥ દેવ્યુવાચ ॥ ॥
શપ્તઃ કસ્મિન્નિમિત્તેઽસૌ પિત્રા પુત્રઃ સ્વયં પુનઃ ॥
નાલ્પં સ્યાત્કારણં દેવ યેનાસૌ શપ્તવાન્સુતમ્

॥ ઈશ્વર ઉવાચ ॥ ॥
શૃણુષ્વાવહિતા ભૂત્વા તસ્ય યચ્છાપકારણમ્ ॥
દુર્વાસાનામ ભગવાન્મમૈવાંશસમુદ્ભવઃ

અટમાનઃ સ ભગવાંસ્ત્રીંલ્લોકાન્પ્રચચાર હ ॥
અથ પ્રાપ્તો દ્વારવતીં લોકાઃ સંજજ્ઞિરે પુરઃ

તમાગતમૃષિં દૃષ્ટ્વા સાંબો રૂપેણ ગર્વિતઃ ॥
પિંગાક્ષં જટિલં રૂક્ષં વિસ્વરૂપં કૃશં તથા

અવમાનં ચકારાસૌ દર્શનાત્સ્પર્શનાત્તથા ॥
દૃષ્ટ્વા તસ્ય મુખં મંદો વક્ત્રં ચક્રે તથાત્મનઃ ॥
ચક્રે યદુકુલશ્રેષ્ઠો ગર્વિતો યૌવનેન તુ

અથ ક્રુદ્ધો મહાતેજા દુર્વાસા ઋષિસત્તમઃ ॥
સાંબં પ્રોવાચ ભગવાન્વિધુન્વન્મુખમાત્મ નઃ

યસ્માદ્વિરૂપં માં દૃષ્ટ્વા આત્મરૂપેણ ગર્વિતઃ ॥
ગમને દર્શને મહ્યમહંકારઃ કૃતો યતઃ ॥
તસ્માત્ત્વં કુષ્ઠરોગેણ ન ચિરેણ ગ્રસિષ્યસે

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે મધ્યયાત્રાયાં સાંબાદિત્યમાહાત્મ્યોપક્રમે સાંબાય દુર્વાસસા શાપપ્રદાનવર્ણનંનામ શતતમોઽધ્યાયઃ