Skanda Purana · Verses 7.10-3

// īśvara uvāca // //
anyacca kathayiṣyāmi rahasyaṃ tava bhāmini //
yatra kasya cidākhyātaṃ tatte vacmi varānane

pṛthvībhāge sthito brahmā apāṃ bhāge janārddanaḥ //
tejobhāgasthito rudro vāyubhāge tatheśvaraḥ

ākāśabhāgasaṃsthāne sthitaḥ sākṣātsadāśivaḥ

yasyayasyaiva yo bhāgastasmiṃstīrthāni yāni vai //
tasyatasya na saṃdehaḥ sa sa eveśvaraḥ smṛtaḥ

chāgalaṃḍaṃ dugaṇḍaṃ ca mākoṭaṃ maṇḍaleśvaram //
kāliṃjaraṃ vanaṃ caiva śaṃkukarṇaṃ sthaleśvaram

[http://www.angelfire.com/in4/vedastudy/pur_index23/mahabhuta.htm mahābhūtopari ṭippaṇī]
śūleśvaraṃ ca vikhyātaṃ pṛthvītattve ca saṃsthitam //
hariścandraṃ ca śrīśailaṃ jalpeśonnāṃtikeśvaram

mahākālaṃ madhyamaṃ ca kedāraṃ bhairavaṃ tathā //
pavitrāṣṭakametaddhi jalasaṃsthaṃ varānane

amareśaṃ prabhāsaṃ ca naimiṣaṃ puṣkaraṃ tathā //
āṣāḍhiṃ caiva daṇḍiṃ ca bhārabhūtiṃ ca lāṃgalam

ādi guhyāṣṭakaṃ hyetattejastattve pratiṣṭhitam //
gayā caiva kurukṣetraṃ tīrthaṃ kanakhalaṃ tathā

vimalaṃ cāṭṭahāsaṃ ca māhendraṃ bhīmasaṃjñakam //
guhyādguhyataraṃ hyetatproktaṃ vāyvaṣṭakaṃ tava

vastrāpathaṃ rudrakoṭirjyeṣṭheśvaraṃ mahālayam //
gokarṇaṃ rudrakarṇaṃ ca varṇākhyaṃ sthāpasaṃjñakam

pavitrāṣṭakametaddhi ākāśasthaṃ varānane //
etāni tattvatīrthāni sarvāṇi kathitāni vai

yo yasmindevatā tattve sā tanmāhātmyasūcikā //
audakaṃ ca mahātattvaṃ viṣṇoścātipriyaṃ priye

jalaśāyī smṛtastena nārāyaṇa iti śrutiḥ //
āpyatattvaṃ tu tīrthāni yāni proktā- ni te mayā

tāni priyāṇi deveśi dhruvaṃ nārāyaṇasya vai //
audakaṃ caiva yattattvaṃ tasminprābhāsikaṃ smṛtam

tatra devo layaṃ yāti harirjanmanijanmani //
sa vāsudevaḥ sūkṣmātmā parātparatare sthitaḥ

sa śivaḥ paramaṃ vyoma anādinidhano vibhuḥ //
tasmātparataraṃ nāsti sarvaśāstrāgameṣu ca

siddhāṃtāgamavedāṃtadarśaneṣu viśeṣataḥ //
teṣu caiva na bhinnastu mayā sārddhaṃ yaśasvini

tasminsthāne hariḥ sākṣātpratyakṣeṇa tu saṃsthitaḥ //
liṃgaiścaturbhiḥ saṃyukto jñāyate na ca kenacit

mokṣārthaṃ naiṣṭhikairvarṇairvrataiścaiva tu yatphalam //
tatphalaṃ samavāpnoti bhallukātīrthadarśanāt

gocarmamātraṃ tatsthānaṃ samaṃtātparimaṇḍalam //
na hi kaścidvijānāti vinā śāstreṇa bhāmini

viṣuvaṃ vahate tatra nṛṇāmadyāpi pārvati //
paṃcaliṃgāni tatraiva paṃcavaktrāṇi kāni cit

kukkuṭāṃḍakamānāni mahāsthūlāni kānicit//
sarpeṇa veṣṭitānyeva cihnitāni triśūlibhiḥ

teṣāṃ darśanamātreṇa koṭiliṃgārcanaphalam //
tasmādidaṃ mahākṣetraṃ brahmādyaiḥ sevyate sadā

śrutimadbhiśca vipreṃdraiḥ saṃsiddhaiśca tapasvibhiḥ //
pratimāsaṃ tathāṣṭamyāṃ pratimāsaṃ caturdaśīm

śaśibhānūparāge vā kārttikyāṃ tu viśeṣataḥ //
prabhāsasthāni liṃgāni prapūjyante varānane

saṃnihatyāṃ kurukṣetre sarvastīrthāyutaiḥ saha //
puṣkaraṃ naimiṣaṃ caivaṃ prayāgaṃ saṃpṛthūdakam

ṣaṣṭi tīrthasahasrāṇi ṣaṣṭikoṭiśatāni ca //
māghyāṃmāghyāṃ sameṣyaṃti sarasvatyabdhisaṃgame

smaraṇāttasya tīrthasya nāmasaṃkīrtanādapi //
mṛtyukālabhavādvāpi pāpaṃ tyakṣyati suvrate

ānarttasāraṃ saumyaṃ ca tathā bhuvanabhūṣaṇam //
divyaṃ pāṃcanadaṃ puṇyamādiguhyaṃ mahodayam

siddha ratnākaraṃ nāma samudrāvaraṇaṃ tathā//
dharmākāraṃ kalādhāraṃ śivagarbhagṛhaṃ tathā

sarvadevaniveśaṃ ca sarvapātakanāśanam//
asya kṣetrasya nāmāni kalpe kalpe pṛthakpriye

āyāmādīni jānīhi guhyāni surasundari //
ādye kalpe purā devi pramodanamiti smṛtam

nandanaṃ paritastasya tasyāpi parataḥ śivam //
śivātparataraṃ cograṃ bhadrikaṃ parataḥ punaḥ

samiṃdhanaṃ paraṃ tasmātkāmadaṃ ca tataḥ param //
siddhidaṃ cāpi dharmajñaṃ vaiśvarūpaṃ ca muktidam

tathā śrīpadmanābhaṃ tu śrīvatsaṃ tu mahāprabham//
tathā ca pāpasaṃhāraṃ sarvakāmapradaṃ tathā

mokṣamārgaṃ varā rohe tathā devi sudarśanam //
dharmagarbhaṃ tu dharmāṇāṃ prabhāsaṃ pāpanāśanam //
ataḥ paraṃ bhavantīha utpalāvarttikāni ca

kṣetrasya madhye yaddevi mama garbhagṛhaṃ smṛtam //
tasya nāmāni te devi kathitānyanupūrvaśaḥ

śrutvā nāmānyaśeṣāṇi kṣetramāhātmyameva ca //
teṣāṃ tu vāṃchitā siddhi rbhaviṣyati na saṃśayaḥ

etatkīrttayamānasya trikālaṃ tu mahodayam //
saṃdhyākālāṃtaraṃ pāpamahorātraṃ vinaśyati

api vai dāṃbhikāścaiva ye vasaṃtyalpabuddhayaḥ //
mūḍhā jīvanikā viprāste'pi yāṃti mṛtā divam

asya kṣetrasya madhye tu raviyojanamadhyataḥ //
upakṣetrāṇi deveśi saṃtyanyāni sahasraśaḥ

kānicitpadmarūpāṇi yavākārāṇi kānicit //
ṣaṭkoṇāni trikoṇāni daṇḍākārāṇi kānicit

caṃdrabiṃbārddhabhedāni caturasraprabhedataḥ //
brahmādidaivatānīśe kṣetramadhye sthitāni tu

kānicidyojanārddhāni tadardhārdhāni kānicit //
nivarttanapramāṇena daṇḍamānena kānicit

gocarmamānamadhyāni kāniciddhanuṣāṃtaram //
yajñopavītamātrāṇi prabhāse saṃti koṭiśaḥ

aṃgulyaṣṭama bhāgo'pi nabhosti kamalekṣaṇe //
na saṃti yasmiṃstīrthāni divyāni ca nabhastale

prabhāsakṣetramāsādya tiṣṭhaṃti pralayādanu //
kedāre caiva yalliṃgaṃ yacca devi mahālaye

madhyameśvarasaṃsthaṃ ca tathā pāśupateśvaram //
śaṃkukarṇeśvaraṃ caiva bhadreśvaramathāpi ca

some śvaramathaikāgraṃ kāleśvaramajeśvaram //
bhairaveśvaramīśānaṃ tathā kāyāvarohaṇam

cāpaṭeśvarakaṃ puṇyaṃ tathā badarikāśramam //
rudrakoṭirmahākoṭi stathā śrīparvataṃ śubham

kapālī caiva deveśaḥ karavīraṃ tathā punaḥ //
oṃkāraṃ paramaṃ puṇyaṃ vaśiṣṭhāśramameva ca //
yatra koṭiḥ smṛtā devi rudrāṇāṃ kāmarūpiṇām

yāni cānyāni sthānāni puṇyāni mama bhūtale //
prayāgaṃ purataḥ kṛtvā prabhāse nivasaṃti ca

uttare raviputrī tu dakṣiṇe sāgaraṃ smṛtam //
dakṣiṇottaramāno'yaṃ kṣetrasyāsya prakīrttitaḥ

rukmiṇyāḥ pūrvataścaiva taptatoyācca paścime //
pūrvapaścimamāno'yaṃ prabhāsasya prakīrttitaḥ

etadantaramāsādya tīrthāni surasundari //
pātālādikaṭāhāṃtaṃ tāni tatra vasaṃti vai

evaṃ jñātvā mahādevi sarvadevamayo hariḥ //
prabhāsakṣetramāsādya tatyāja svaṃ kalevaram

divyaṃ mamedaṃ caritaṃ hi raudraṃ śroṣyaṃti ye parvasu vā sadā vā //
te cāpi yāsyaṃti mama prasādāttriviṣṭapaṃ puṇyajanādhivāsam

iti kathitamaśeṣameva citraṃ caritamidaṃ tava devi puṇyayuktam //
itaramapi tavātivallabhaṃ yadvada kathayāmi mahodayaṃ munīnām

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye prabhāsa kṣetrastha tīrthakṣetramāhātmyadvārā prabhāsakṣetrasya sarvakṣetrottamatvavarṇanaṃnāma daśamo'dhyāyaḥ