Skanda Purana · Verses 7.1-3

// athaśrīskānde mahāpurāṇe saptamaṃ prabhāsakhaṇḍam

// śrīgaṇeśāya namaḥ //
// atha prabhāsakhaṇḍaṃ prārabhyate //
// tatredaṃ prathamaṃ prabhāsakṣetramāhātmyam

ॐnamaḥ śrīparamātmane paramapuruṣottamāya //
ॐ namo hariharahiraṇyagarbhebhyo namo vyāsavālmīkiśukaparāśarebhyaḥ //
// vyāsa uvāca // //
yaścādyaḥ puruṣaḥ purāṇa iti yaḥ saṃstūyate sarvataḥ someśaḥ surasaṃyutaḥ kṣititale yairvīkṣito hīkṣaṇaiḥ//
te tīrtvā vitatāṃtaraṃ bhavabhayaṃ bhūtyā'bhisaṃbhūṣitāḥ svargaṃ yānavaraiḥprayānti sukṛtairyajñai yathā yajvinaḥ

prasaradbindunādāya śuddhāmṛtamayātmane //
ṣaḍtriṃśattattvadehāya namaścinmātramūrtaye

amṛtenodarasthena mriyante sarvadevatāḥ //
kaṃṭhasthita viṣeṇāpi yo jīvati sa pātuḥ vaḥ

satrānte sūtamanaghaṃ naimiṣeyā maharṣayaḥ//
purāṇasaṃhitāṃ puṇyāṃ papracchū romaharṣaṇam

tvayā sūta mahā buddhe bhagavānbrahmavittamaḥ //
itihāsapurāṇārthe vyāsaḥ samyagupāsitaḥ

tasya te sarvaromāṇi vacasā harṣitāni yat //
dvaipāyanasyānubhāvāttato'bhū romaharṣaṇaḥ

bhavantameva prathamaṃ vyājahāra svayaṃ prabhuḥ //
munīnāṃ saṃhitāṃ vaktuṃ vyāsaḥ paurāṇikīṃ kathām

tvaṃ hi svāyaṃbhuve yajñe sutyāhe vitate hariḥ //
saṃbhūtaḥ saṃhitāṃ vaktuṃ svāṃśena puruṣottamaḥ

tasmādbhavantaṃ pṛcchāmaḥ purāṇe skandakīrtite //
prabhāsakṣetramāhātmye brāhmī yātrā śrutā purā

adhunā vaiṣṇavīṃ raudrīṃ yātrāṃ sarvārthasaṃyutām //
vaktumarhasi cāsmākaṃ purāṇārthaviśārada

munīnā vacanaṃ śrutvā sūtaḥ paurāṇikottamaḥ //
praṇamya śirasā prāha vyāsaṃ satyavatīsutam

// romaharṣaṇa uvāca // //
śrīvatsāṃkaṃ jagadyoniṃ harimoṃkārarūpiṇam //
aprameyaṃ guruṃ devaṃ nirmalaṃ nirmalāśrayam

haṃsaṃ śuciṣadaṃ vyoma vyāpakaṃ sarvadaṃ śivam //
udāsīnaṃ nirāyāsaṃ niṣprapañcaṃ nirañjanam

śūnyaṃ biṃdusvarūpaṃ tu dhyeyaṃ dhyānavivarjitam //
asti nāstīti yaṃ prāhuḥ sudūre cāntike ca yat

manogrāhyaṃ paraṃ dhāma puruṣākhyaṃ jaganmayam //
hṛtpaṃkajasamāsīnaṃ tejorūpaṃ nirindriyam

evaṃvidhaṃ namaskṛtya paramātmānamīśvaram //
kathāṃ vadiṣye dvividhāṃ dviśarīrāṃ tathaiva tu

divyabhāṣāsamopetāṃ vedādhiṣṭhānasaṃyutām //
pañcasaṃdhisamāyuktāṃ ṣaḍalaṃkārabhūṣitām

saptasādhanasaṃyuktāṃ rasāṣṭaguṇaraṃjitām //
guṇairnavabhirākīrṇāṃ daśadoṣavivarjitām

vibhāṣābhūṣitāṃ tadvadekāyattāṃ manoharām //
pañcakāraṇasaṃyuktāṃ catuṣkaraṇasammatām

Comments on Prabhaasa
punaśca dvividhāṃ tadvajjñānasaṃdohadāyinīm //
vyāsena kathitāṃ puṇyāṃ śṛṇudhvaṃ pāpanāśinīm

yāṃ śrutvā pāpakarmāpi gaccheddhi paramāṃ gatim //
duḥkhatrayavinirmuktaḥ sarvātaṅkavivarjitaḥ

na nāstike kathāṃ puṇyāmimāṃ brūyātkadācana //
śraddadhānāya śāntāya kīrtanīyā dvijātaye

niṣekādiḥ śmaśānānto mantrairyasyodito vidhiḥ //
tasya śāstre'dhikāro'sti jñeyo nānyasya kasyacit

catuḥpakṣāvadātasya viśuddhirbrāhmaṇasya ca //
sadvṛttasyādhikāro'sti śāstre'sminvedasammate

yathā surāṇāṃ pravaro devadevo maheśvaraḥ //
nadīnāṃ ca yathā gaṃgā varṇānāṃ brāhmaṇo yathā

akṣarāṇāṃ tu sarveṣāmoṃkāraḥ prathamo yathā //
pūjyānāṃ tu yathā mātā gurūṇāṃ ca yathā pitā //
tathaiva sarvaśāstrāṇāṃ pradhānaṃ skandakīrtitam

purā kailāsaśikhare brahmādīnāṃ ca sannidhau //
skāndaṃ purāṇaṃ kathitaṃ pārvatyagre pinākinā //

pārvatyā ṣaṇmukhasyāgre tena nandigaṇāya vai //
nandinā tu kumārāya tena vyāsāya dhīmate

vyāsena me samākhyātaṃ bhavadbhyo'haṃ prakīrtaye

yūyaṃ sadbhāvasaṃyuktā yataḥ sarve maharṣayaḥ //
tena me bhāṣituṃ śraddhā bhavatāṃ skandasaṃhitām

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye praśnādhyāyavarṇanaṃ nāma prathamo'dhyāyaḥ