Skanda Purana · Chapter 6.99

// ṛṣaya ūcuḥ // //
yadetadbhavatā proktaṃ tatra rāmeṇa nirmitaḥ //
rāmeśvarastathā sītā tena tatra vinirmitā

tathā ca lakṣmaṇārthāya nirmitastena saṃśrayaḥ //
etanmahadviruddhaṃ te pratibhāti vaco'khilam

tvayā sūta purā proktaṃ rāmo lakṣmaṇasaṃyutaḥ //
sītayā sahitaḥ prāptaḥ kṣetre'tra prasthito vane

śrāddhaṃ kṛtvā gayāśīrṣe lakṣmaṇena viruddhya ca //
punaḥ saṃprasthito'raṇyaṃ krodhāviṣṭaśca taṃ prati / ४ //
yattvayoktaṃ tadā tena nirmito'tra maheśvaraḥ //
etacca sarvamācakṣva saṃdehaṃ sūtanandana

// sūta uvāca // //
atra me nāsti saṃdeho yuṣmākaṃ ca punaḥ sthitaḥ //
tato vakṣyāmyaśeṣeṇa śrūyatāṃ dvijasattamāḥ //
etatkṣetraṃ punaścādyaṃ na kṣayaṃ yāti kutracit

anyasmindivase prāpte sa tadā raghunaṃdanaḥ //
yadā virodhamāpannaḥ sārdhaṃ saumitriṇā saha

etatpunardinaṃ cānyadyatra tena pratiṣṭhitaḥ //
rāmeśvaraḥ svayaṃ bhaktyā duḥkhitena mahātmanā

// ṛṣaya ūcuḥ // //
anyasmindivase tatra kasminkāle raghūttamaḥ //
saṃprāptastasya kiṃ duḥkhaṃ saṃjātaṃ tatprakīrtaya

/
// sūta uvāca // //
kṛtvā sītāparityāgaṃ rāmo rājīvalocanaḥ //
lokāpavādasaṃtrastastato rājyaṃ cakāra saḥ

kṛtvā svarṇamayīṃ sītāṃ patnīṃ yajñaprasiddhaye //
na sa cakre mahābhāgo bhāryāmanyāṃ kathaṃcana

/
daśavarṣasahasrāṇi daśavarṣaśatāni ca //
brahmacaryeṇa cakre sa rājyaṃ nihatakaṃṭakam

tato varṣasahasrāṃte prāpte caikādaśe dvijāḥ //
devadūtaḥ samāyāto rāmasya sadanaṃ prati ///३//
tenoktaṃ devarājena preṣito'haṃ tavāṃtikam //
tasmātkuru samālokaṃ vijane tvaṃ mayā saha

evamuktastadā tena dūtena raghunaṃdanaḥ //
paraṃ rahaḥ samāsādya mantraṃ cakre tataḥ param // १-५ //
tasyaivamupaviṣṭasya maṃtrasthāne mahātmanaḥ //
bahutvādiṣṭalokasya na rahasyaṃ prajāyate

tataḥ kopaparītātmā dūtaḥ provāca sādaram //
vihasya janasaṃsargaṃ dṛṣṭvaikāṃte'pi saṃsthite

yathā daṃṣṭrācyutaḥ sarpo nāgo vā madavarjitaḥ //
ājñāhīnastathā rājā mānavaiḥ paribhūyate

seyaṃ tava raghuśreṣṭha nājñāsti prativedmyaham //
śakrālāpamapi tvaṃ ca naikāṃte śrotumarhasi

tasya tadvacanaṃ śrutvā kopasaṃraktalocanaḥ //
triśākhāṃ bhṛkuṭīṃ kṛtvā tataḥ sa prāha lakṣmaṇam

mamātra saṃniviṣṭasya sahānena prajalpataḥ //
yadi kaścinnaro mohādāgamiṣyati lakṣmaṇa //
svahastena na saṃdehaḥ sūdayiṣyāmi taṃ drutam

na hanmi yadi taṃ prāptamatra me dṛṣṭigocaram//
tanmā bhūnme gatiḥ śreṣṭhā dharmiṇāṃ yā prapadyate //

evaṃ jñātvā prayatnena tvayā bhāvyamasaṃśayam //
rājadvāri yathā kaścinna mayā vadhyate'dhunā

tamomityeva saṃprocya lakṣmaṇaḥ śubhalakṣaṇaḥ //
rājadvāraṃ samāsādya cakāra vijanaṃ tataḥ

devadūto'pi rāmeṇa samaṃ cakre tataḥ param//
maṃtraṃ śakrasamādiṣṭaṃ tathānyaiḥ svargavāsibhiḥ

// devadūta uvāca // //
tvaṃ rāvaṇavināśārthamavatīrṇo dharātale //
sa ca vyāpādito duṣṭaḥ pāpastrailokyakaṃṭakaḥ

kṛtaṃ sarvaṃ mahābhāga deva kṛtyaṃ tvayā'dhunā //
tasmātsaṃtu sanāthāste devāḥ śakrapurogamāḥ

yadi te rocate citte noparodhena sāṃpratam //
prasādaṃ kuru devānāṃ tasmādāgaccha satvaram //
svargalokaṃ parityajya martyalokaṃ suniṃditam

// sūta uvāca // //
etasminnaṃtare prāpto durvāsā munisattamaḥ //
provācātha kṣudhāviṣṭaḥ kvāsau kvāsau raghūttamaḥ

// lakṣmaṇa uvāca // //
vyagraḥ sa pārthivaśreṣṭho devakāryeṇa kenacit //
tasmādatraiva vipreṃdra muhūrtaṃ paripālaya

/
yāvatsāṃtvayate rāmo dūtaṃ śakrasamudbhavam //
mamopari dayāṃ kṛtvā vinayāvanatasya hi

// durvāsā uvāca // //
yadi yāsyati no dṛṣṭiṃ mama drāksa raghūttamaḥ //
śāpaṃ dattvā kulaṃ sarvaṃ taddhakṣyāmi na saṃśayaḥ

mamāpi darśanādanyanna kiṃcidvidyate guru //
kṛtyaṃ lakṣmaṇa yāvattvamanyanmūḍha prakatthase

tacchrutvā lakṣmaṇaścitte ciṃtayāmāsa duḥkhitaḥ //
varaṃ me mṛtyurekasya mā bhūyātkulasaṃkṣayaḥ

evaṃ sa niścayaṃ kṛtvā tato rāmamupādravat //
uvāca daṃḍavadbhūmau praṇipatya kṛtāṃjaliḥ

durvāsā muniśārdūlo deva te dvāri tiṣṭhati //
darśanārthī kṣudhāviṣṭaḥ kiṃ karomi praśādhi mām

tasya tadvacanaṃ śrutvā tato dūtamuvāca tam //
gatvemaṃ brūhi deveśaṃ mama vākyādasaṃśayam //
ahaṃ saṃvatsarasyāṃta āgamiṣyāmi teṃ'tike

evamuktvā visṛjyātha taṃ dūtaṃ prāha lakṣmaṇam //
praveśaya drutaṃ vatsa taṃ tvaṃ durvāsasaṃ munim

tataścārghyaṃ ca pādyaṃ ca gṛhītvā sammukho yayau //
rāmadevaḥ prahṛṣṭātmā sacivaiḥ parivāritaḥ

dattvārghyaṃ vidhivattasya praṇipatya muhurmuhuḥ //
provāca rāmadevo'tha harṣagadgadayā girā

svāgataṃ te muniśreṣṭha bhūyaḥ susvāgataṃ ca te //
etadrājyamamī putrā vibhavaśca tava prabho

kṛtvā mama prasādaṃ ca gṛhāṇa munisattama //
dhanyo'smyanugṛhīto'smi yattvaṃ me gṛhamāgataḥ //
pūjyo lokatrayasyāpi niḥśeṣatapasāṃnidhiḥ

// muniruvāca // //
cāturmāsyavrataṃ kṛtvā nirāhāro raghūttama //
adya te bhavanaṃ prāpya āhārārthaṃ bubhukṣitaḥ

tasmāttvaṃ yaccha me śīghraṃ bhojanaṃ raghunaṃdana //
nānyena kāraṇaṃ kiṃcitsaṃnyastasya dhanādinā

tatastaṃ bhojayāmāsa śraddhāpūtena cetasā //
svayamevāgrataḥ sthitvā mṛṣṭānnairvividhaiḥ śubhaiḥ

lehyaiścoṣyaistathā carvyaiḥ khādyaireva pṛthagvidhaiḥ //
yāvadicchā munestasya tathānnairvividhairapi

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye rāmeśvarasthāpanaprastāve śrīrāmaṃprati durvāsaḥ samāgamanavṛttāṃtavarṇanaṃnāmaikonaśatatamo' dhyāyaḥ