Skanda Purana · Chapter 6.98

// sūta uvāca // //
tato daśaratho rājā maṃtribhistairvisarjitaḥ //
hāṭakeśvarajaṃ kṣetraṃ saṃprāpto harṣasaṃyutaḥ

tatrāgatya tato devīṃ pitrā saṃsthāpitā purā //
pūjayitvā'tha sadbhaktyā snātvā kuṇḍe śubhodake

tato'nyāni ca mukhyāni dṛṣṭvā cāyatanāni saḥ //
snātvā tīrtheṣvanekeṣu dattvā dānānyanekaśaḥ

prāsādaṃ kārayāmāsa devadevasya cakriṇaḥ //
tatra saṃsthāpayāmāsa pratimāṃ vaiṣṇavīṃ śubhām

tasyāgre kārayāmāsa vāpīṃ svacchodakānvitām //
sopānapaṃktibhiryuktāṃ sādhubhiḥ saṃpraśaṃsitām

udakena tatastasyā devārādhanatatparaḥ //
prakārairbahubhistīvraṃ cakāra sumahattapaḥ

tato varṣaśate'tīte tasya tuṣṭo janārdanaḥ //
vilokya ca tapastīvraṃ vihitaṃ tena bhūbhujā

provāca darśanaṃ gatvā pakṣirājaṃ samāśritaḥ //
meghagambhīrayāvācā bahudevagaṇairvṛtaḥ

// śrīviṣṇuruvāca // //
parituṣṭo'smi te vatsa varaṃ varaya suvrata //
api te durlabhaṃ kāmamahaṃ dāsyāmi kṛtsnaśaḥ

// rājovāca // //
putrārtho'yaṃ samāraṃbho mayā deva kṛto'khilaḥ //
tapaso dehi me putrāṃstasmādvaṃśavivṛddhidān

anyatsarvaṃ surādhīśa dhruvamasti gṛhe sthitam //
prasādāttava yatkiṃcidvaibhavaṃ vidyate mama

// viṣṇuruvāca // //
ahaṃ tava gṛhe rājansvayameva na saṃśayaḥ //
avatāraṃ kariṣyāmi kṛtvā rūpacatuṣṭayam

devakāryāya tasmāttvaṃ gṛhaṃ gatvā mahīpate //
kuru rājyaṃ yathānyāyaṃ pitṛpaitāmahaṃ mahat

tatheyaṃ yā tvayā vāpī nirmitā vimalodakā //
rājavāpīti vikhyātā loke seyaṃ bhaviṣyati

asyāṃ snātvā naro bhaktyā ya enāṃ pūjayiṣyati //
śraddhayā parayā yuktaḥ saṃprāpte paṃcamīdine

tataḥ kariṣyati śrāddhaṃ yāvatsaṃvatsaraṃ nṛpa //
aputraḥ prāpsyate putrānvaṃśavṛddhikarānsa hi

evamuktvā sa bhagavāṃstataścādarśanaṃ gataḥ //
prahṛṣṭavadano bhūtvā so'pi rājā yayau gṛham

tataḥ stokena kālena tasya putracatuṣṭayam //
saṃjātaṃ loke vikhyātaṃ kalatratritayasya ca

kauśalyānāma vikhyātā tasya bhāryā suśobhanā //
jyeṣṭhā tasyāṃ suto jajñe rāmākhyaḥ prathamaḥ sutaḥ

tathānyā kaikayī nāma tasya bhāryā kaniṣṭhikā //
bharato nāma vikhyātastasyāḥ putro'bhavattvasau

sumitrākhyā tathā cānyā patnī yā madhyamā sthitā //
śatrughnalakṣmaṇau putrau tasyāṃ jātau mahābalau

tathānyā kanyakā caikā babhūva varavarṇinī //
dadau yāṃ putrahīnasya lomapādasya bhūpateḥ

ānṛṇyaṃ bhūpatiḥ prāpya evaṃ daśarathastadā//
pitṝṇāṃ prayayau svargaṃ kṛtakṛtyastathā dvijāḥ

atha rājā'bhavadrāmaḥ sārvabhaumastataḥ param//
rāvaṇo yena durdharṣo nihato devakaṃṭakaḥ

yena rāmeśvaraścātra nirmito lakṣmaṇeśvaraḥ //
sītādevī tathā mūrtā yena cātra pratiṣṭhitā

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṃḍe hāṭakeśvarakṣetramāhātmye rājasvāmirājavāpīmāhātmyavarṇanaṃnāmāṣṭanavatitamo'dhyāyaḥ