Skanda Purana · Chapter 6.97

// sūta uvāca // //
tataḥ prabhṛti no mando rohiṇīśakaṭaṃ dvijāḥ //
bhinatti vacanāttasya rājño daśarathasya ca

tadvṛttāṃtaṃ samākarṇya tasya śakraḥ praharṣitaḥ //
bhūpālaṃ taṃ samabhyetya tataścovāca sādaram

atyadbhutataraṃ karma tvayaitatpṛthivīpate //
saṃsādhitaṃ yadanyena manasāpi na cintyate

ata eva hi saṃtuṣṭiḥ sañjātādya tavopari //
varaṃ matto gṛhāṇādya tadabhīṣṭaṃ hṛdi sthitam

// rājovāca // //
tvayā saha suraśreṣṭha maitrī saṃprārthayāmyaham //
śāśvatī sarvakṛtyeṣu paramāṃ lokasaṃsthitām

// indra uvāca //
evaṃ bhavatu rājeṃdra tvayā saha sadā mama //
saṃpatsyate sadā maitrī vasoriva ca śāśvatī

tvayā sadaiva me pārśve sabhāyāṃ devasaṃnidhau //
āgantavyaṃ viśeṣeṇa yena maitrī pravardhate

evamuktvā sahasrākṣo jagāma tridivālayam //
rājāpi cāgato harmye svakīye harṣasaṃyutaḥ

rakṣayitvā jagatsarvaṃ śanaiścara kṛtādbhayāt //
aprāpyāṃ prāpya saṃkīrtiṃ stūyamānastu bandibhiḥ

tataḥ prabhṛti nityaṃ sa sandhyākāla upasthite //
sāyāhnaṃ saṃvidhāyātha yāti śakrasya maṃdire

//
tatra sthitvā ciraṃ śrutvā gaṃdharvāṇāṃ manoharam //
gītaṃ dṛṣṭvā ca nṛtyaṃ ca tānādivihitaṃ śubham

//
vicitrārthāḥ kathāḥ śrutvā devarṣīṇāṃ mukhāccyutāḥ //
svayaṃ ca kīrtayitvātha prayāti nijamaṃdiram

vimānavaramāruhya haṃsabarhiṇanāditam//
manoharapatākābhiḥ samaṃtācca vibhūṣitam

yadāyadā sa niryāti śakrasthānānnijālayam//
tadātadā''sane tasya kriyate'bhyukṣaṇaṃ sadā

śakrādeśāttadā vetti na sa bhūpaḥ kathaṃcana //
anyasmindivase tasya nārado munisattamaḥ //
kathayāmāsa tatsarvamabhyukṣaṇasamudbhavam

vṛttāṃtaṃ tasya rājarṣestasyaiva gṛhamāgataḥ //
tīrthayātrā prasaṃgena vidveṣaparivṛddhaye

tacchrutvā nāradenoktaṃ śraddheyamapi bhūpatiḥ //
na cakre hṛdaye'dharmamātmānaṃ pariciṃtayan

tathāpi kautukāviṣṭo gatvā śakraniveśanam //
anyasmindivase sthitvā ciraṃ tatra samutthitaḥ

alakṣyaṃ vīkṣayāmāsa svāsanaṃ dūramāsthitaḥ //
kiṃcitsadmāṃtaraṃ prāpya kautūhalasamanvitaḥ

tataḥ śakrasamādeśādutthāya surakiṃkaraḥ //
prokṣayāmāsa toyena pārthivasya tadāsanam

taddṛṣṭvā kopasaṃpannaḥ sa rājā'bhyetya vāsavam //
provāca kimidaṃ śakra prokṣyate yanmamāsanam

kiṃ mayā nihatā viprāḥ kiṃ vā viprasamudbhavam //
śāsanaṃ lopitaṃ kiṃcitkiṃ vā viprā viniṃditāḥ

kiṃ vā naṣṭo'smi saṃgrāme dṛṣṭvā śatrūnsamāgatān //
dainyaṃ vā jalpitaṃ teṣāṃ bhayatrastena cetasā

mama rājye'thavā śakra durbalo balavattaraiḥ //
pīḍyate vātha caurādyairmuṣyate vaṃcakaistathā

kiṃ vā rājye madīye ca jāyate yoniviplavaḥ //
saṃkaro vātha varṇānāṃ parityaktavidhikramaḥ

kiṃ vā durjanavākyena dūṣito doṣavarjitaḥ //
daṃḍyate mama rājye ca kenacittridaśeśvara

kiṃ vā cauro'tha pāpo vā gṛhīto doṣavānsvayam //
mucyate dravyalobhena tathānyo vā jugupsitaḥ

kiṃsvinmayā parityaktaḥ ko'pyatra śaraṇāgataḥ //
bhayatrastaḥ subhītena prāṇānāṃ tridaśādhipa

kasya vā pṛṣṭhamāṃsāni bhakṣitāni mayā kvacit //
kaccicca tridaśādhīṣa brāhmaṇasya viśeṣataḥ

kiṃ vā dānaṃ mayā dattvā brāhmaṇāya mahātmane // paścāttāpaḥ
kṛtaḥ paścāddattaṃ copekṣitaṃ ca vā

kiṃ vā rājye madīye ca dīnānāṃ prapataṃti ca //
aśrupātā divārātraṃ duḥkhitānāṃ samaṃtataḥ

daivaṃ vā paitṛkaṃ vāpi kiṃ vā karma gṛhe mama //
lopaṃ gacchati devendra kriyate vā vidhicyutam

yattvayā kriyate nityaṃ toyairabhyukṣaṇaṃ mama //
āsanasya drutaṃ brūyā yatpāpaṃ vihitaṃ mayā //

// indra uvāca // //
na vidyate mahārāja śarīre tava pātakam //
na rāṣṭre ca kule gehe bhṛtyavarge viśeṣataḥ

paraṃ śṛṇu pravakṣyāmi yatte pāpaṃ bhaviṣyati //
tena saṃprokṣyate caiva āsanaṃ sarvadaiva tu

aputrasya gatirnāsti na ca svargaṃ prapadyate //
paitṛkeṇa naro grasto ya ṛṇena sadā nṛpa

dveṣyatāṃ yāti devānāṃ pitṝṇāṃ ca viśeṣataḥ //
yadā paśyati putrasya vadanaṃ puruṣo nṛpa

ānṛṇyaṃ samavāpnoti pitṝṇāṃ sa tadā dhruvam //
sa tvaṃ naiva gato rājannānṛṇyaṃ yanmayoditam

pitṝṇāṃ tena te nityamāsane'bhyukṣaṇaṃ kṛtam //
tasmādyatasva putrārthaṃ yadīcchasi parāṃ gatim

ātmānaṃ narakāttrātuṃ puṃsaṃjñācca tathā nṛpa //
evamuktaḥ sa śakreṇa rājā daśarathastadā

duḥkhena mahatā yukto lajjayā'dhomukhaḥ sthitaḥ //
āmaṃtryātha sahasrākṣaṃ gatvā'yodhyāṃ nijāṃ purīm //
amātyānāṃ nijaṃ rājyamarpayāmāsa satvaraḥ

tataḥ provāca tānsarvāṃstapaḥ kāryaṃ mayā'dhunā //
yāvatputrasya saṃprāptistāvadeva na saṃśayaḥ

etadrājyaṃ prayatnena rakṣaṇīyaṃ yathāvidhi //
yuṣmābhirmama vākyena yāvadāgamanaṃ mama

// maṃtriṇa ūcuḥ // //
yuktametanmahārāja putrārthaṃ yatsamudyamaḥ //
kriyate putrahīnasya kiṃ rājyena dhanena vā //

vayaṃ rakṣāṃ kariṣyāmastava rājye samaṃtataḥ //
nirvṛtiṃ tvaṃ samāsthāya kuru putrakṛte tapaḥ

kārtikeyapuraṃ gatvā yatra pitrā purā tava //
tapastaptaṃ yathā labdhā siddhiśca manasepsitā

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe śrīhāṭakeśvarakṣetra māhātmye daśarathakṛtatapaḥsamudyogavarṇanaṃnāma saptanavatitamo'dhyāyaḥ