Skanda Purana · Chapter 6.96

// sūta uvāca // //
evaṃ tasmingate bhūpe hyajāpāle rasātalam //
tatputraścābhavadrājā maṃtribhistu puraskṛtaḥ

yo nityamagamatsvarge vāsavaṃ ramate sadā //
śanaiścaro jito yena rohiṇīṃ paribhedayan

gṛhe yasya svayaṃ viṣṇurbhūtvā caiva caturvidhaḥ //
rāvaṇasya vināśārthaṃ janma cakre praharṣitaḥ

tenāgatyātra satkṣetre toṣito madhusūdanaḥ //
prāsādaṃ śobhanaṃ kṛtvā tataścaiva pratiṣṭhitaḥ

tasyāpi viśrutā vāpī svayaṃ tena vinirmitā //
rājavāpīti loke'sminvikhyātiṃ paramāṃ gatā

tasyāṃ yaḥ kurute śrāddhaṃ saṃprāpte pañcamīdine //
pretapakṣe viśeṣeṇa sa naraḥ syātsatāṃ priyaḥ

// ṛṣaya ūcuḥ // //
kathaṃ tena jitaḥ saurī rohiṇīśakaṭaṃ ca yat //
bhiṃdānastoṣitastena kathaṃ nārāyaṇo vada

// / sūta uvāca // //
tasmiñchāsati dharmajñe svadharmeṇa vasundharām//
atisaukhyānvito lokaḥ sarvadaiva vyajāyata

bahukṣīrapradā gāvaḥ sasyāni guṇavaṃti ca //
kāmavarṣī ca parjanyo yatharttuphalitā drumāḥ

kasyacittvatha kālasya daivajñaistasya bhūpateḥ //
kathitaṃ rohiṇībhedaṃ raviputraḥ kariṣyati

tasyānaṃtaramevāśu durbhikṣaṃ saṃbhaviṣyati //
anāvṛṣṭiśca bhavitā raudrā dvādaśa vārṣikī //
yayā saṃpatsyate sarvaṃ bhūtalaṃ gatamānavam

teṣāṃ tadvacanaṃ śrutvā sa rājā kupito'bhyagāt //
śanaiścaraṃ samuddiśya vimānamadhiruhya ca

tasya tuṣṭena saṃdattaṃ vimānaṃ kāmagaṃ purā //
śakreṇa tatra saṃtiṣṭhañchanaiścaramupādravat

tataḥ sūryapathaṃ muktvā tataścaṃdrasya pārthivaḥ //
nakṣatrasaraṇiṃ prāpya sajyaṃ kṛtvā mahaddhanuḥ // १४
tatra bāṇaṃ samāropya śanaiścaramupādravat //
provāca purataḥ sthitvā sūryaputramadhomukham

tyajainaṃ rohiṇīmārgaṃ sāṃprataṃ tvaṃ śanaiścara //
madvākyādanyathā'haṃ tvāṃ nayiṣyāmi yamakṣayam

etena niśitāgrega śareṇā nataparvaṇā //
divyāstramaṃtrayuktena satyametadbravīmyaham

tasya tadvacanaṃ śrutvā tādṛgraudratamaṃ mahat //
mando vismayamāpannastataścedamabhāṣata //

kastvaṃ brūhi mahābhāga mama mārgaṃ ruṇatsi yaḥ //
agamyaṃ kenacilloke sarvairapi surāsuraiḥ

rājovāca // //
ahaṃ daśaratho nāma sūryavaṃśodbhavo nṛpaḥ //
ajasya tanayaḥ prāptaḥ kāmaṃ vārayituṃ krudhā

// maṃda uvāca // //
na tvayā saha saṃbaṃdhaḥ kaścidasti mahīpate //
mama yattvaṃ prakopāḍhyo manmārgaṃ haṃtumicchasi

// rājovāca // //
rohiṇīsaṃbhavaṃ tvaṃ hi śakaṭaṃ bhedayiṣyasi //
sāṃprataṃ mama daivajñairvākyametadudāhṛtam

tasminmanda tvayā bhinne na varṣati śatakratuḥ //
etadvadati daivajñā jyotiḥśāstravicakṣaṇāḥ

jāte vṛṣṭinirodhe'tha jāyaṃte'nnāni na kṣitau //
annābhāvātkṣayaṃ yāṃti tato bhūbhitale janāḥ

janocchede tato jāte agniṣṭomādikāḥ kriyāḥ //
na bhavaṃti dharā pṛṣṭhe tataḥ syādeva saṃkṣayaḥ

etasmātkāraṇādruddho mārgaste sūryasaṃbhava //
rohiṇīṃ gaṃtukāmasya satyametanmayoditam

// śaniruvāca // //
gaccha putra nijaṃ gehaṃ mamāpi tvaṃ ca rocase //
tuṣṭo'haṃ tava vīryeṇa na tvanyena mahīpate

na kenacitkṛtaṃ karma yadetadbhavatā kṛtam //
na kariṣyati caivānyo devo vā mānavo'tha vā

nāhaṃ paśyāmi bhūpāla kathaṃcidapi tūrdhvataḥ//
yato dṛṣṭivinirdagdhaṃ bhasmasājjāyate'khilam

jātamātreṇa bālena mayā pādau nirīkṣitau //
tātasya sahasā dagdhau tato'haṃ vāritoṃ'bayā

na tvayā putra draṣṭavyaṃ kiṃcideva kathaṃcana //
pramāṇaṃ yadi te dharmo mātṛvākyasamudbhavaḥ

tasmāttvayā mahatkarma kṛtamīdṛksuduṣkaram //
prajānāṃ pārthivaśreṣṭha tyaktvā dūrādbhayaṃ mama

tasmā ttava kṛte nāhaṃ bhedayiṣyāmi rohiṇīm //
kathaṃcidapi bhūpāla yugāṃtararaśateṣvapi

varaṃ varaya cāsmākaṃ tasmādadya bhaviṣyati //
hṛtatsthitaṃ durlabhaṃ bhūpa sarveṣāmiha dehinām

// rājovāca // //
tava yo vāsare prāpte tailābhyaṃgaṃ karoti vai //
tasyā'nyadivasaṃ yāvatpīḍā kāryā na ca tvayā

tiladānaṃ karotyevaṃ lohadānaṃ ca yastava //
karoti divase śaktyā yāvadvarṣaṃ tvayā hi saḥ

rakṣaṇīyaḥ sukṛcchreṣu saṃkaṭeṣu sadaiva hi //
tvayi gocarapīḍāyāṃ saṃsthite cārkasaṃbhava

yaḥ kuryācchāṃtikaṃ samyaktilahomaṃ ca bhaktitaḥ //
vāsare tava saṃprāpte samidbhiśca tathā'kṣataiḥ

tasya sārdhāni varṣāṇi sapta kāryā prayatnataḥ //
tvayā rakṣā mahābhāga varaṃ cenmama yacchasi

// sūta uvāca // //
evamityeva saṃprocya virarāma tataḥ param //
śanaiścaro mahīpālavacanāddvijasattamāḥ

etadvaḥ sarvamākhyātaṃ yatpṛṣṭo'haṃ suvistarāt //
bhavadbhiḥ sūryaputrasya rājñā daśarathena hi //
saṃvādaṃ rohiṇībhede sañjātaṃ samupasthite

yaścaitatpaṭhate nityaṃ śṛṇuyādyo viśeṣataḥ //
śanaiścarakṛtā pīḍā tasya nāśaṃ pragacchati

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye daśarathaśanaiścarasaṃvādavarṇanaṃnāma ṣaṇṇavatitamo'dhyāyaḥ