Skanda Purana · Chapter 6.94

// sūta uvāca // /// /
tathānyā lohayaṣṭistu tasminkṣetre'tiśobhanā //
muktā paraśurāmeṇa bhaṃktvā nijakuṭhārakam

tāṃ dṛṣṭvā mānavaḥ samyagupavāsaparāyaṇaḥ //
mucyate hi svakātpāpāttatkṣaṇādvijasattamāḥ

// ṛṣaya ūcuḥ // //
kutaḥ paraśurāmeṇa bhaṃktvā nijakuṭhārakam //
nirmitā lohayaṣṭiḥ sā tatrotsṛṣṭā ca sā kutaḥ

// sūta uvāca // //
yadā rāmo hradaṃ kṛtvā tarpayitvā nijānpitṝn //
gatāmarṣo dvijendrāṇāṃ dattvā yajñe vasundharām

tataḥ saṃprasthito hṛṣṭo dhṛtvā manasi sāgaram //
snānārthaṃ taṃ samādāya kuṭhāraṃ bhāskaraprabham

tadā sa munibhiḥ proktaḥ sarvaistatkṣetravāsibhiḥ //
vāṃchadbhistu hitaṃ tasya sadā śamaparāyaṇaiḥ

rāmarāma mahābhāga yaddhārayasi pāṇinā//
śastraṃ pūrṇe pratijño'pi tanna yuktaṃ bhavettava

anena karasaṃsthena tava kopaḥ kathaṃcana //
na yāsyati śarīrasthastasmādenaṃ parityaja

teṣāṃ tadvacanaṃ śrutvā tato rāmaḥ kṛtāṃjaliḥ //
provāca vinayopetaḥ prahasaṃstāndvijottamān

kuṭhāraścaiva vipreṃdrā rudratejodbhavena ca //
lohena nirmitaḥ pūrvamakṣayo viśvakarmaṇā //६.९४.////
tadahaṃ saṃparityajya kathamenaṃ dvijottamāḥ //९ /
kṣattradharmaparo'pyevaṃ pragacchāmi digaṃtaram

/
yadi cainaṃ mayā muktaṃ kuṭhāraṃ ca dvijottamāḥ //
grahīṣyati paraḥ kaścinmama vadhyo bhaviṣyati

nāparādhamimaṃ śaktaḥ soḍhuṃ cāhaṃ kathaṃcana //
api brāhmaṇamukhyasya janasyānyasya kā kathā

tathāpi nāsti te śāṃtirmukte'pyasmindvijottamāḥ //
gṛhīte'pi ca yuṣmābhistasmādrakṣyaḥ prayatnataḥ

// brāhmaṇā ūcuḥ // //
yadyevaṃ tvaṃ mahābhāga rakṣārthaṃ saṃprayacchasi //
asmākaṃ tatra bhaṃktvāśu piṃḍaṃ kṛtvā samarpaya

yena rakṣāmahe sarve paramaṃ yavamāśritāḥ //
na ca gṛhṇāti vā kaścidgate kālāṃtare'pi ca

teṣāṃ tadvacanaṃ śrutvā rāmaḥ śastrabhṛtāṃ varaḥ //
cakre lohamayīṃ yaṣṭiṃ taṃ bhaṃktvā sa kuṭhārakam

tataḥ sa brāhmaṇeṃdrāṇāmarpayāmāsa sādaram //
rakṣārthaṃ bhārgavaśreṣṭho vinayāvanataḥ sthitaḥ

// brāhmaṇā ūcuḥ // //
lohayaṣṭimimāṃ rāma tvatkuṭhārasamudbhavām //
vayaṃ saṃrakṣayiṣyāmaḥ pūjayiṣyāma eva hi

yathā śaktimayī kīrtiḥ skandasyātra pratiṣṭhitā //
lohayaṣṭimayī tadvattava rāma bhaviṣyati

bhraṣṭarājyastu yo rājā enāmārādhayiṣyati //
svaṃ rājyamacirātprāpya sa pratāpī bhaviṣyati

vidyākṛte dvijo vā yaḥ sadaināṃ pūjayiṣyati //
sa vidyāṃ paramāṃ prāpya sarvajñatvaṃ prapatsyate

aputro vā naro yo'tha nārī vā pūjayiṣyati //
etāṃ yaṣṭiṃ tvadīyāṃ ca putravānsa bhaviṣyati

upavāsaparo bhūtvā yaścaināṃ pūjayiṣyati //
āśvinasyāsite pakṣe caturdaśyāṃ viśeṣataḥ

sa prāpsyati sadā kāmānabhīṣṭānmanasi sthitān//

evaṃ śrutvā tato rāmasteṣāmeva dvijanmanām //
praṇamya prayayau tūrṇaṃ samudrasadanaṃ prati

te'pi viprāstatastasyāścakruḥ prāsādamuttamam //
tatra saṃsthāya tāṃ cakrustataḥ pūjāsamāhitāḥ

prāpnuvaṃti ca tatpārśvātkāmāneva hṛdi sthitān //
sustokenā'pi kālena durlabhāstridaśairapi

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye lohayaṣṭimāhātmyavarṇanaṃ nāma caturṇavatitamo'dhyāyaḥ