Skanda Purana · Chapter 6.91

// sūta uvāca // //
evamuktvā sa bhagavānvirarāma pitāmahaḥ //
saṃtoṣya pāvakaṃ kruddhaṃ svayameva dvijottamāḥ

tataḥ sarvaiḥ suraiḥ sārdhaṃ śakraviṣṇuśivādibhiḥ //
jagāma brahmalokaṃ ca devāste ca nijaṃ padam

pāvako'pi dvijeṃdrāṇāmagnihotreṣu saṃsthitaḥ //
havirjagrāha vidhivadvasorddhārodbhavaṃ tathā

evaṃ tatra samudbhūtamagnitīrthamanuttamam //
yatra snāto naraḥ prātarmucyate dinajādaghāt

atha saṃprasthitāndṛṣṭvā tāndevānsvāśramaṃ prati //
gajeṃdraśukamaṇḍūkāste procurduḥkhasaṃyutāḥ

yuṣmatkṛte vayaṃ śaptāḥ pāvakena sureśvarāḥ //
tasmājjihvākṛte'smākamupāyaściṃtyatāmapi

// devā ūcuḥ // //
viparītāpi te jihvā yathānyeṣāṃ gajottama //
kāryakṣamā na saṃdeho bhaviṣyati viśeṣataḥ

tathā yūyaṃ narendrāṇāṃ maṃdireṣu vyavasthitāḥ //
bahu mānasamāyuktā mṛṣṭānnaṃ bhakṣayiṣyatha

yathā ca śuka te jihvā kṛtā maṃdā havirbhujā //
tathāpi bhūmipālānāṃ śaṃsanīyā bhaviṣyati

śrīmatāṃ ca tathānyeṣāmasmadīyaprasādataḥ //
tvaṃ ca maṃḍūka yattena vijihvo vahninā kṛtaḥ //
tadbhaviṣyati te śabdo vijihvasyāpi dīrghagaḥ

evamuktvā'tha te devāḥ svasthānaṃ prasthitāstataḥ //
teṣāmanugrahaṃ kṛtvā kṛpayā parayā yutā

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgararakhaṇḍe hāṭakeśvarakṣetramāhātmye'gnitīrthotpattivarṇanaṃnāmaikanavatitamo'dhyāyaḥ