સ્કંદ પુરાણ · અધ્યાય 6.91

॥ સૂત ઉવાચ ॥ ॥
એવમુક્ત્વા સ ભગવાન્વિરરામ પિતામહઃ ॥
સંતોષ્ય પાવકં ક્રુદ્ધં સ્વયમેવ દ્વિજોત્તમાઃ

તતઃ સર્વૈઃ સુરૈઃ સાર્ધં શક્રવિષ્ણુશિવાદિભિઃ ॥
જગામ બ્રહ્મલોકં ચ દેવાસ્તે ચ નિજં પદમ્

પાવકોઽપિ દ્વિજેંદ્રાણામગ્નિહોત્રેષુ સંસ્થિતઃ ॥
હવિર્જગ્રાહ વિધિવદ્વસોર્દ્ધારોદ્ભવં તથા

એવં તત્ર સમુદ્ભૂતમગ્નિતીર્થમનુત્તમમ્ ॥
યત્ર સ્નાતો નરઃ પ્રાતર્મુચ્યતે દિનજાદઘાત્

અથ સંપ્રસ્થિતાન્દૃષ્ટ્વા તાન્દેવાન્સ્વાશ્રમં પ્રતિ ॥
ગજેંદ્રશુકમણ્ડૂકાસ્તે પ્રોચુર્દુઃખસંયુતાઃ

યુષ્મત્કૃતે વયં શપ્તાઃ પાવકેન સુરેશ્વરાઃ ॥
તસ્માજ્જિહ્વાકૃતેઽસ્માકમુપાયશ્ચિંત્યતામપિ

॥ દેવા ઊચુઃ ॥ ॥
વિપરીતાપિ તે જિહ્વા યથાન્યેષાં ગજોત્તમ ॥
કાર્યક્ષમા ન સંદેહો ભવિષ્યતિ વિશેષતઃ

તથા યૂયં નરેન્દ્રાણાં મંદિરેષુ વ્યવસ્થિતાઃ ॥
બહુ માનસમાયુક્તા મૃષ્ટાન્નં ભક્ષયિષ્યથ

યથા ચ શુક તે જિહ્વા કૃતા મંદા હવિર્ભુજા ॥
તથાપિ ભૂમિપાલાનાં શંસનીયા ભવિષ્યતિ

શ્રીમતાં ચ તથાન્યેષામસ્મદીયપ્રસાદતઃ ॥
ત્વં ચ મંડૂક યત્તેન વિજિહ્વો વહ્નિના કૃતઃ ॥
તદ્ભવિષ્યતિ તે શબ્દો વિજિહ્વસ્યાપિ દીર્ઘગઃ

એવમુક્ત્વાઽથ તે દેવાઃ સ્વસ્થાનં પ્રસ્થિતાસ્તતઃ ॥
તેષામનુગ્રહં કૃત્વા કૃપયા પરયા યુતા

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં ષષ્ઠે નાગરરખણ્ડે હાટકેશ્વરક્ષેત્રમાહાત્મ્યેઽગ્નિતીર્થોત્પત્તિવર્ણનંનામૈકનવતિતમોઽધ્યાયઃ