Skanda Purana · Chapter 6.87

// sūta uvāca // //
tathā tatrāsti viprendrāḥ somasyāyatanaṃ śubham//
yasyāpi darśanādeva mucyate pātakairnaraḥ

somavāre tu saṃprāpte somasya grahaṇe naraḥ //
yastaṃ paśyati pāpo'pi narakaṃ na sa paśyati

// ṛṣaya ūcuḥ // //
sarveṣāmeva devānāṃ dṛśyaṃte'tra samāśrayāḥ //
atra caṃdrasya caivaikaḥ kathaṃ jātaḥ samāśrayaḥ

etannaḥ sūtaputrāticitraṃ manasi vartate //
tasmādvada mahābhāga sarvaṃ tvaṃ vetsyaśeṣataḥ

// sūta uvāca // //
enajjagaddvijaśreṣṭhāḥ sarvaṃ somamayaṃ smṛtam //
tasmātpratiṣṭhite tasmiṃstrailokyaṃ syātpratiṣṭhitam

etāścauṣadhayaḥ sarvāḥ sasyādyāśceha bhūtale //
sarvāḥ somamayāstāśca yābhirjīvaṃti jaṃtavaḥ

tasmādbrahmādayo devāḥ somaṃ prāpya kramāddvijāḥ //
tṛptiṃ yāṃti parāṃ hṛṣṭā yatastasmādvaro'tra saḥ // ७ /
agniṣṭomādayo yajñāstathā some pratiṣṭhitāḥ //
tasya pānādyatastṛptiṃ tatra yāṃti dvijottamāḥ

etasmātkāraṇātsomaḥ sarveṣāmadhikaḥ smṛtaḥ //
devānāṃ dānavānāṃ ca sa hi pūjyatamaḥ smṛtaḥ

yathānyeṣāṃ surendrāṇāṃ harmyāṇi dharaṇītale //
kriyante rātrināthasya tadvatkurvaṃti mānavāḥ

yairyernarairniśeśasya prāsādo vihitaḥ kṣitau //
tete muktipadaṃ prāptāḥ kṛtvā'tha śubhasaṃcayam

yanmaheśvaraharmyāṇāṃ sahasreṇa bhavecchubham //
tadeke naiva caṃdrasya prāpnuvaṃti śubhaṃ narāḥ

atha candrotthaharmyasya māhātmyaṃ taddvijottamāḥ //
jñātvā brahmādayo devā bhayasaṃtrastamānasāḥ //
tadvighnārthamidaṃ procurmerumūrdhānamāśritāḥ

saumyarkṣe somavāreṇa saumye māsi ca saṃsthite //
tithau ca somadevatye prāpte somagrahe tathā //
sakāraiḥ paṃcabhiryukte kāle somasya maṃdiram

ya ekāhena saṃpādya prāsādaṃ sthāpayiṣyati //
caṃdraṃ sa sarvadevotthaharmyasyāpnoti satphalam

sahasraguṇitaṃ samyakchraddhāpūtena cetasā //
anyathā yastu caṃdrasya prāsādaṃ prakariṣyati

vaṃśocchedaṃ samāsādya narakaṃ sa prayāsyati //
etasmātkāraṇādbhītā na kurvaṃti narā bhuvi

prāsādaṃ rātrināthasya supuṇyamapi saddvijāḥ //
ya eṣa rātrināthasya kṣetre'traiva vyavasthitaḥ

prāsādastvaṃbarīṣeṇa bhūbhujā sa vinirmitaḥ //
kathaṃcitsamayaṃ prāpya yathoktaṃ śāstraciṃtakaiḥ

tasyaivottaradigbhāge dvitīyo'nyaḥ pratiṣṭhitaḥ //
candramā dhaṃdhumāreṇa tadvatso'pi pratiṣṭhitaḥ

tataśca tau mahīpālau tatprabhāvādubhau dvijāḥ //
gatau ca paramāṃ siddhiṃ janmamṛtyuvivarjitām //

prāsādo'nyastṛtīyastu kṣetre prābhāsike tathā //
ikṣvākuṇā nareṃdreṇa śraddhāyuktena nirmitaḥ

prāsādatrayametaddhi muktvātra dharaṇītale //
aparo nāsti candrasya satyametanmayoditam //
eko'sti narmadātīre puṇye revorisaṃgame

etadvaḥ sarvamākhyātaṃ candramāhātmyamuttamam //
paṭhatāṃ śṛṇvatāṃ cāpi sarvapātakanāśanam

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhenāgarakhaṇḍe hāṭakeśvarakṣetramāhatmye somaprāsādamāhātmyavarṇanaṃnāma saptāśītitamo'dhyāyaḥ