Skanda Purana · Chapter 6.86

// sūta uvāca // //
athānyāpi ca tatrāsti saptaviṃśatikā tathā //
nakṣatraiḥ sthāpitā devī vāṃchitasya pradāyinī

dakṣasya tanayā pūrvaṃ saptaviṃśatisaṃkhyayā //
udvāhitā hi somena pūrvaṃ brāhmaṇasattamāḥ

tāsāṃ madhye 'bhavaccaikā rohiṇī tasya vallabhā //
prāṇebhyo'pi sadāsaktastayā sārdhaṃ sa tiṣṭhati

tato daurbhāgyasaṃtaptāḥ sarvā stā dakṣakanyakāḥ //
vairāgyaṃ paramaṃ gatvā kṣetre'smiṃstapasi sthitāḥ

saṃsthāpya devatāṃ durgāṃ śraddhayā parayā yutāḥ //
balipūjopahāraistāṃ pūjayaṃtyaḥ sureśvarīm

tataḥ kālena mahatā tāsāṃ sā tuṣṭimabhyagāt //
abravīcca pratuṣṭo'haṃ varaṃ dāsyāmi putrikāḥ

tasmāttatprārthyatāṃ citte yadyuṣmākaṃ vyavasthitam //
sarvaṃ dāsyāmyasaṃdigdhaṃ yadyuṣmākaṃ hṛdi sthitam

tataḥ procuśca tāḥ sarvāḥ prasādāttava vāṃchitam //
asmākaṃ vidyate devi yāvattrailokyasaṃsthitam

ekaṃ patyuḥ sukhaṃ muktvā yatsaubhāgyasamudbhavam //
tasmāttaddehi cāsmākaṃ yadi tuṣṭāsi caṃḍike

vayaṃ daurbhāgyadoṣeṇa sarvāḥ kleśaṃ paraṃ gatāḥ //
na śaknumaḥ priyānprāṇāndehe dhartuṃ kathaṃcana

// śrīdevyuvāca // //
adyaprabhṛti yuṣmākaṃ saubhāgyaṃ patisaṃbhavam//
matprasādādasaṃdigdhaṃ bhaviṣyati sukhodayam

anyāpi yā patityaktā strī māmatra sthitāṃ sadā //
pūjayiṣyati sadbhaktayā caturdaśyāmupoṣitā

sā bhaviṣyati saubhāgyayuktā putravatī satī //
yāvatsaṃvatsaraṃ tāvadekabhaktaparāyaṇā

akṣāralavaṇāśā yā nārī māṃ pūjayiṣyati //
na tasyāḥ patijaṃ duḥkhaṃ daurbhāgyaṃ vā bhaviṣyati

āśvinasya site pakṣe saṃprāpte navamīdine //
upavāsaparā yā māṃ niśīthe pūjayiṣyati //
tasyāḥ saubhāgyamatyugraṃ sarvadā vai bhaviṣyati

evamuktvā tu sā devī virarāma dvijottamāḥ //
tāśca sarvāḥ susaṃhṛṣṭā jagmurdakṣasya maṃdiram

etasminnaṃtare dakṣa āhūtaḥ śūlapāṇinā //
proktaḥ kasmāttvayā candro yakṣmaṇā saṃniyojitaḥ //
tadayuktaṃ kṛtaṃ dakṣa jāmātā'yaṃ yatastava

// dakṣa uvāca // //
anena tanayā mahyamaṣṭāviṃśatisaṃkhyayā //
ūḍhā akhaṇḍacāritrāstāstyaktā doṣavarjitāḥ //
muktvaikāṃ rohiṇīṃ deva niṣiddhena mayā'sakṛt

tato mayā'tikopena niyukto rājayakṣmaṇā //
asatyajalpako mandaḥ kāmadevavaśaṃ gataḥ

// śrībhagavānuvāca // //
adyaprabhṛti sarvāsāṃ samaṃ sa pracariṣyati //
madvākyānnātra saṃdehaḥ satyametanmayoditam

tvayāpi yadvacaḥ proktamasatyaṃ syānna tatkvacit //
tasmādeṣa kṣayaṃ pakṣaṃ vṛddhiṃ pakṣaṃ prayāsyati

dakṣo'pi bāḍhamityeva tatproktvā ca yayau gṛham //
caṃdrastu dakṣakanyāstāḥ samaṃ paśyati sarvadā

gacchamānaḥ kṣayaṃ pakṣaṃ vṛddhiṃ pakṣaṃ ca saddvijāḥ //
sāpi devī tataḥ proktā saptaviṃśatikā kṣitau //
sarvasaubhāgyadā strīṇāṃ tasminkṣetre vyavasthitā

yaścaitatpuratastasyāḥ saṃprāpte cāṣṭamīdine //
śucirbhūtvā paṭhedbhaktyā sa saubhāgyamavāpnuyāt

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye saptaviṃśatikāmāhātmyavarṇanaṃnāma ṣaḍaśītitamo'dhyāyaḥ