સ્કંદ પુરાણ · અધ્યાય 6.86

॥ સૂત ઉવાચ ॥ ॥
અથાન્યાપિ ચ તત્રાસ્તિ સપ્તવિંશતિકા તથા ॥
નક્ષત્રૈઃ સ્થાપિતા દેવી વાંછિતસ્ય પ્રદાયિની

દક્ષસ્ય તનયા પૂર્વં સપ્તવિંશતિસંખ્યયા ॥
ઉદ્વાહિતા હિ સોમેન પૂર્વં બ્રાહ્મણસત્તમાઃ

તાસાં મધ્યે ઽભવચ્ચૈકા રોહિણી તસ્ય વલ્લભા ॥
પ્રાણેભ્યોઽપિ સદાસક્તસ્તયા સાર્ધં સ તિષ્ઠતિ

તતો દૌર્ભાગ્યસંતપ્તાઃ સર્વા સ્તા દક્ષકન્યકાઃ ॥
વૈરાગ્યં પરમં ગત્વા ક્ષેત્રેઽસ્મિંસ્તપસિ સ્થિતાઃ

સંસ્થાપ્ય દેવતાં દુર્ગાં શ્રદ્ધયા પરયા યુતાઃ ॥
બલિપૂજોપહારૈસ્તાં પૂજયંત્યઃ સુરેશ્વરીમ્

તતઃ કાલેન મહતા તાસાં સા તુષ્ટિમભ્યગાત્ ॥
અબ્રવીચ્ચ પ્રતુષ્ટોઽહં વરં દાસ્યામિ પુત્રિકાઃ

તસ્માત્તત્પ્રાર્થ્યતાં ચિત્તે યદ્યુષ્માકં વ્યવસ્થિતમ્ ॥
સર્વં દાસ્યામ્યસંદિગ્ધં યદ્યુષ્માકં હૃદિ સ્થિતમ્

તતઃ પ્રોચુશ્ચ તાઃ સર્વાઃ પ્રસાદાત્તવ વાંછિતમ્ ॥
અસ્માકં વિદ્યતે દેવિ યાવત્ત્રૈલોક્યસંસ્થિતમ્

એકં પત્યુઃ સુખં મુક્ત્વા યત્સૌભાગ્યસમુદ્ભવમ્ ॥
તસ્માત્તદ્દેહિ ચાસ્માકં યદિ તુષ્ટાસિ ચંડિકે

વયં દૌર્ભાગ્યદોષેણ સર્વાઃ ક્લેશં પરં ગતાઃ ॥
ન શક્નુમઃ પ્રિયાન્પ્રાણાન્દેહે ધર્તું કથંચન

॥ શ્રીદેવ્યુવાચ ॥ ॥
અદ્યપ્રભૃતિ યુષ્માકં સૌભાગ્યં પતિસંભવમ્॥
મત્પ્રસાદાદસંદિગ્ધં ભવિષ્યતિ સુખોદયમ્

અન્યાપિ યા પતિત્યક્તા સ્ત્રી મામત્ર સ્થિતાં સદા ॥
પૂજયિષ્યતિ સદ્ભક્તયા ચતુર્દશ્યામુપોષિતા

સા ભવિષ્યતિ સૌભાગ્યયુક્તા પુત્રવતી સતી ॥
યાવત્સંવત્સરં તાવદેકભક્તપરાયણા

અક્ષારલવણાશા યા નારી માં પૂજયિષ્યતિ ॥
ન તસ્યાઃ પતિજં દુઃખં દૌર્ભાગ્યં વા ભવિષ્યતિ

આશ્વિનસ્ય સિતે પક્ષે સંપ્રાપ્તે નવમીદિને ॥
ઉપવાસપરા યા માં નિશીથે પૂજયિષ્યતિ ॥
તસ્યાઃ સૌભાગ્યમત્યુગ્રં સર્વદા વૈ ભવિષ્યતિ

એવમુક્ત્વા તુ સા દેવી વિરરામ દ્વિજોત્તમાઃ ॥
તાશ્ચ સર્વાઃ સુસંહૃષ્ટા જગ્મુર્દક્ષસ્ય મંદિરમ્

એતસ્મિન્નંતરે દક્ષ આહૂતઃ શૂલપાણિના ॥
પ્રોક્તઃ કસ્માત્ત્વયા ચન્દ્રો યક્ષ્મણા સંનિયોજિતઃ ॥
તદયુક્તં કૃતં દક્ષ જામાતાઽયં યતસ્તવ

॥ દક્ષ ઉવાચ ॥ ॥
અનેન તનયા મહ્યમષ્ટાવિંશતિસંખ્યયા ॥
ઊઢા અખણ્ડચારિત્રાસ્તાસ્ત્યક્તા દોષવર્જિતાઃ ॥
મુક્ત્વૈકાં રોહિણીં દેવ નિષિદ્ધેન મયાઽસકૃત્

તતો મયાઽતિકોપેન નિયુક્તો રાજયક્ષ્મણા ॥
અસત્યજલ્પકો મન્દઃ કામદેવવશં ગતઃ

॥ શ્રીભગવાનુવાચ ॥ ॥
અદ્યપ્રભૃતિ સર્વાસાં સમં સ પ્રચરિષ્યતિ ॥
મદ્વાક્યાન્નાત્ર સંદેહઃ સત્યમેતન્મયોદિતમ્

ત્વયાપિ યદ્વચઃ પ્રોક્તમસત્યં સ્યાન્ન તત્ક્વચિત્ ॥
તસ્માદેષ ક્ષયં પક્ષં વૃદ્ધિં પક્ષં પ્રયાસ્યતિ

દક્ષોઽપિ બાઢમિત્યેવ તત્પ્રોક્ત્વા ચ યયૌ ગૃહમ્ ॥
ચંદ્રસ્તુ દક્ષકન્યાસ્તાઃ સમં પશ્યતિ સર્વદા

ગચ્છમાનઃ ક્ષયં પક્ષં વૃદ્ધિં પક્ષં ચ સદ્દ્વિજાઃ ॥
સાપિ દેવી તતઃ પ્રોક્તા સપ્તવિંશતિકા ક્ષિતૌ ॥
સર્વસૌભાગ્યદા સ્ત્રીણાં તસ્મિન્ક્ષેત્રે વ્યવસ્થિતા

યશ્ચૈતત્પુરતસ્તસ્યાઃ સંપ્રાપ્તે ચાષ્ટમીદિને ॥
શુચિર્ભૂત્વા પઠેદ્ભક્ત્યા સ સૌભાગ્યમવાપ્નુયાત્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં ષષ્ઠે નાગરખણ્ડે હાટકેશ્વરક્ષેત્રમાહાત્મ્યે સપ્તવિંશતિકામાહાત્મ્યવર્ણનંનામ ષડશીતિતમોઽધ્યાયઃ