Skanda Purana · Chapter 6.85

// ṛṣaya ūcuḥ // //
mādhavyāḥ padmayā datto yaḥ śāpastasya yatphalam //
pariṇāmodbhavaṃ sarvaṃ śrutamasmābhiradya tat

tena yatkamalā śaptā brāhmaṇena mahātmanā //
sā kathaṃ gaja vaktrā'tha punarjātā śubhānanā

// sūta uvāca // //
śāpena tasya viprasya tatkṣaṇādeva sā dvijāḥ //
gajavaktrā samutpannā mahāvismayakāriṇī

sā proktā hariṇā tiṣṭha kiñcitkālāṃtare śubhe //
anenaiva tu rūpeṇa yāvatsyāddvāparakṣayaḥ

tato'haṃ medinīpṛṣṭhe hyavatīrya samudraje //
tapaḥ śaktyā kariṣyāmi bhūyastvāṃ tu śubhānanām

avajñāyātha sā tasya tadvākyaṃ śārṅgadhanvinaḥ //
śubhāsyatvakṛte tepe tapastīvraṃ suharṣitā//

etatkṣetraṃ samāsādya trikālaṃ snānamācarat//
brahmāṇaṃ toṣayāmāsa divārātrimataṃdritā

tāmuvāca tato brahmā varṣāṃte tuṣṭimāgataḥ //
varaṃ prārthaya tuṣṭo'haṃ tava keśavavallabhe

// lakṣmīruvāca // //
gajāsyāhaṃ kṛtā deva śāpaṃ dattvā sudāruṇam //
brāhmaṇena sukruddhena kasmiścitkāraṇāṃtare

tasmāttadrūpiṇīṃ bhūyo māṃ kuruṣva pitāmaha //
yadi me tuṣṭimāpanno nānyatkiṃcidvṛṇomyaham

// brahmovāca // //
bhaviṣyati śubhaṃ vaktraṃ matprasādādasaṃśayam //
tava bhadre viśeṣeṇa tasmāttvaṃ svagṛhaṃ vraja

mahattvaṃ te mayā dattamadyaprabhṛti śobhane //
mahālakṣmīti te nāma tasmādatra bhaviṣyati

gajavaktrāṃ naro yastvāṃ pūjayiṣyati bhaktitaḥ //
sa gajādhipatirbhūpo bhaviṣyati ca bhūtale

dvitīyādivase yastvāṃ mahālakṣmīriti bruvan //
śrīsūktena subhaktyā'tha devi saṃpūjayiṣyati

saptajanmāṃtarāṇyeva na bhaviṣyati so'dhanaḥ//
evamuktvā caturvaktro virarāma tataḥ param

sā'pi hṛṣṭā gatā devī yatra tiṣṭhati keśavaḥ

iti śrīskāṃde mahāpurāṇa ekāśīti sāhasryāṃ saṃhitāyāṃ ṣaṣṭhe nāgara khaṇḍe hāṭakeśvarakṣetramāhātmye mahālakṣmīmāhātmyavarṇanaṃnāma pañcāśītitamo'dhyāyaḥ