સ્કંદ પુરાણ · અધ્યાય 6.85

॥ ઋષય ઊચુઃ ॥ ॥
માધવ્યાઃ પદ્મયા દત્તો યઃ શાપસ્તસ્ય યત્ફલમ્ ॥
પરિણામોદ્ભવં સર્વં શ્રુતમસ્માભિરદ્ય તત્

તેન યત્કમલા શપ્તા બ્રાહ્મણેન મહાત્મના ॥
સા કથં ગજ વક્ત્રાઽથ પુનર્જાતા શુભાનના

॥ સૂત ઉવાચ ॥ ॥
શાપેન તસ્ય વિપ્રસ્ય તત્ક્ષણાદેવ સા દ્વિજાઃ ॥
ગજવક્ત્રા સમુત્પન્ના મહાવિસ્મયકારિણી

સા પ્રોક્તા હરિણા તિષ્ઠ કિઞ્ચિત્કાલાંતરે શુભે ॥
અનેનૈવ તુ રૂપેણ યાવત્સ્યાદ્દ્વાપરક્ષયઃ

તતોઽહં મેદિનીપૃષ્ઠે હ્યવતીર્ય સમુદ્રજે ॥
તપઃ શક્ત્યા કરિષ્યામિ ભૂયસ્ત્વાં તુ શુભાનનામ્

અવજ્ઞાયાથ સા તસ્ય તદ્વાક્યં શાર્ઙ્ગધન્વિનઃ ॥
શુભાસ્યત્વકૃતે તેપે તપસ્તીવ્રં સુહર્ષિતા॥

એતત્ક્ષેત્રં સમાસાદ્ય ત્રિકાલં સ્નાનમાચરત્॥
બ્રહ્માણં તોષયામાસ દિવારાત્રિમતંદ્રિતા

તામુવાચ તતો બ્રહ્મા વર્ષાંતે તુષ્ટિમાગતઃ ॥
વરં પ્રાર્થય તુષ્ટોઽહં તવ કેશવવલ્લભે

॥ લક્ષ્મીરુવાચ ॥ ॥
ગજાસ્યાહં કૃતા દેવ શાપં દત્ત્વા સુદારુણમ્ ॥
બ્રાહ્મણેન સુક્રુદ્ધેન કસ્મિશ્ચિત્કારણાંતરે

તસ્માત્તદ્રૂપિણીં ભૂયો માં કુરુષ્વ પિતામહ ॥
યદિ મે તુષ્ટિમાપન્નો નાન્યત્કિંચિદ્વૃણોમ્યહમ્

॥ બ્રહ્મોવાચ ॥ ॥
ભવિષ્યતિ શુભં વક્ત્રં મત્પ્રસાદાદસંશયમ્ ॥
તવ ભદ્રે વિશેષેણ તસ્માત્ત્વં સ્વગૃહં વ્રજ

મહત્ત્વં તે મયા દત્તમદ્યપ્રભૃતિ શોભને ॥
મહાલક્ષ્મીતિ તે નામ તસ્માદત્ર ભવિષ્યતિ

ગજવક્ત્રાં નરો યસ્ત્વાં પૂજયિષ્યતિ ભક્તિતઃ ॥
સ ગજાધિપતિર્ભૂપો ભવિષ્યતિ ચ ભૂતલે

દ્વિતીયાદિવસે યસ્ત્વાં મહાલક્ષ્મીરિતિ બ્રુવન્ ॥
શ્રીસૂક્તેન સુભક્ત્યાઽથ દેવિ સંપૂજયિષ્યતિ

સપ્તજન્માંતરાણ્યેવ ન ભવિષ્યતિ સોઽધનઃ॥
એવમુક્ત્વા ચતુર્વક્ત્રો વિરરામ તતઃ પરમ્

સાઽપિ હૃષ્ટા ગતા દેવી યત્ર તિષ્ઠતિ કેશવઃ

ઇતિ શ્રીસ્કાંદે મહાપુરાણ એકાશીતિ સાહસ્ર્યાં સંહિતાયાં ષષ્ઠે નાગર ખણ્ડે હાટકેશ્વરક્ષેત્રમાહાત્મ્યે મહાલક્ષ્મીમાહાત્મ્યવર્ણનંનામ પઞ્ચાશીતિતમોઽધ્યાયઃ