Skanda Purana · Chapter 6.84

// ṛṣaya ūcuḥ // //
yadetadbhavatā proktaṃ devadevena viṣṇunā //
mādhavīṃ bhaginīṃ prāpya janmāṃtaramupasthitām

aśvavaktrāṃ kariṣyāmi tapasā suśubhānanām //
sā kathaṃ vihitā tena tapastaptaṃ tathā katham //
sarvaṃ vistarato brūhi paraṃ kautūhalaṃ hi naḥ

// sūta uvāca // //
nāradasya samākarṇya taṃ sandeśaṃ surodbhavam //
gatvā viṣṇuḥ suraiḥ sārddhaṃ pracakre maṃtraniścayam

bhārāvataraṇārthāya dānavānāṃ vadhāya ca //
vasudevagṛhe śrīmāndvāparāṃte tato hariḥ

devakyā jaṭhare devaḥ saṃjāto daityadarpahā //
tathānyā rohiṇīnāma bhāryā tasya ca yā'bhavat

tasyāṃ jajñe halīnāma balabhadraḥ pratāpavān //
tṛtīyā suprabhānāma vasudevapriyā ca yā

tasyāṃ sā mādhavī jajñe aśvavaktrasvarūpadhṛk //
tāṃ dṛṣṭvā vikṛtākārāṃ sutāṃ jātāṃ ca suprabhā //
vāsudevasamāyuktā viṣādaṃ paramaṃ gatā

atha te yādavāḥ sarve kṛtaśāntikapauṣṭikāḥ //
svastisvastīti saṃtrastāḥ procurbhūyātkule'tra naḥ

evaṃ sā yauvanopetā tathā duḥkhasamanvitā //
na kaścidvarayāmāsa vājivaktrāṃ vilokya tām

tataśca bhagavānviṣṇurjñātvā tāṃ bhaginīṃ tathā //
mātaraṃ pitaraṃ caiva tathā duḥkhasamanvitau

tāmādāya gatastūrṇaṃ baladevasamanvitaḥ //
hāṭakeśvaraje kṣetre tapastaptuṃ tataḥ param

brahmāṇaṃ toṣayāmāsa samyagyajñaparāyaṇaḥ //
vrataiśca vividhairdānairbrāhmaṇānāṃ ca tarpaṇaiḥ

tatastuṣṭiṃ gato brahmā varṣāṃte tasya śārṅgiṇaḥ //
uvāca varado'smīti prārthayasvābhivāṃchitam

// viṣṇuruvāca // //
eṣā me bhaginī deva jātā'śvavadanā kila //
tava prasādātsadvaktrā bhūyādetanmamepsitam

// śrībrahmovāca // //
eṣā śubhānanā sādhvī matprasādādbhaviṣyati //
subhadrā nāma vikhyātā vīrasūḥ pativallabhā

etadrūpāṃ pumānyo'tra pūjayiṣyati bhaktitaḥ //
etāṃ viṣṇo tvayā sārdhaṃ tathānena ca sīriṇā

dvādaśyāṃ māghamāsasya gaṃdhapuṣpānulepanaiḥ //
so'pyavāpsyati yaccitte vartate nātra saṃśayaḥ

yā nārī patinā tyaktā vaṃdhyā vā bhaktisaṃyutā //
tṛtīyādivase caitāṃ pūjayiṣyati keśava

bhaviṣyati suputrāḍhyā subhagā sā sukhānvitā //
aiśvaryasahitā nityaṃ sarvaiḥ samuditā guṇaiḥ

evamuktvā caturvaktro virarāma tataḥ param //
vāsudevo'pi hṛṣṭātmā yayau dvāravatīṃ purīm

tāmādāya viśālākṣīṃ caṃdrabiṃbasamānanām //
baladevasamāyukto hyanujñāpya pitāma ham

// sūta uvāca // //
evaṃ sā mādhavī viprāḥ subhagārūpamāsthitā //
avatīrṇā dharāpṛṣṭhe lakṣmīśāpaprapīḍitā

upayeme sutaḥ pāṃḍoryāṃ pārthaścāruhāsinīm //
jajñe tasyāḥ suto vīro'bhimanyuriti viśrutaḥ

etadvaḥ sarvamākhyātaṃ mādhabījanmasambhavam //
suparṇākhyasya devasya kathāsaṃgāddvijottamāḥ

yaścaitatpaṭhate martyo bhaktyā yuktaḥ śṛṇoti vā //
mucyate sa naraḥ pāpāttaddinaikasamudbhavāt

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye suparṇākhyatīrthamāhātmye mādhavyā aśvamukhyāḥ śrīkṛṣṇatapaścaryayā padmādattaśāpavimuktipūrvaka subhadrātvaprāptivarṇanaṃnāma caturaśītitamo'dhyāyaḥ