Skanda Purana · Chapter 6.83

// sūta uvāca // //
tatrāścaryamabhūtpūrvaṃ yattadbrāhmaṇasattamāḥ //
ahaṃ vaḥ kīrtayiṣyāmi purāṇe yadudāhṛtam

veṇurnāma mahīpālaḥ purāsītsūryavaṃśajaḥ //
sadaiva pāpasaṃyukto durmedhāḥ kāmapīḍitaḥ

śāsanāni pradattāni brāhmaṇānāṃ mahātmanām //
anyaiḥ pārthivaśārdūlaistena tāni hṛtānyalam

vidhvaṃsitāḥ striyo naikā vidhavāśca viśeṣataḥ ४
kumāryo rūpavatyaśca tathā nija kulodbhavāḥ

devatārādhanaṃ pūjāṃ kartuṃ naiva dadāti saḥ //
na ca yajñaṃ na homaṃ ca svādhyāyaṃ na ca pāpakṛt

provācātha janānsarvānmāṃ pūjayata sarvadā //
na māmabhyadhiko'nyo'sti devo vā brāhmaṇo'pi vā

mayā tuṣṭena sarveṣāṃ saṃpatsyati hṛdi sthitam //
iha lokeṣvasaṃdigdhaṃ śubhaṃ vā yadi vā'śubham

tena śastravihīnānāṃ viśvastānāṃ vadhaḥ kṛtaḥ //
saṃtyaktāḥ śaraṇaṃ prāptāḥ puruṣā bhayavihvalāḥ

naṣṭo mahāhavaṃ dṛṣṭvā śatrusaṃghānupasthitān //
kṣātraṃ dharmaṃ parityajya prāṇarakṣārthameva hi

acaurāḥ pragṛhītāśca caurāḥ saṃrakṣitāḥ sadā //
sādhavaḥ kleśitā nityaṃ teṣāṃ saṃharatā dhanam

na kṛtaṃ ca vrataṃ tena śraddhāpūtena cetasā //
na dattaṃ brāhmaṇebhyaśca na ca yaṣṭaṃ kadācana ///

evaṃ tasya narendrasya pāpāsaktasya nityaśaḥ //
kuṣṭhavyādhirabhūdugro vaṃśocchedaśca saddvijāḥ

tatastaṃ vyādhinā grastaṃ putrapautravivarjitam //
dāyādāḥ sahasopetā rājyaṃ jahrustataḥ param

taṃ ca nirvāsayāmāsustasmāddeśātpadātikam //
ekākinaṃ parityaktaṃ sarvairapi suhṛdgaṇaiḥ

so'pi sarvaiḥ parityaktastena pāpena karmaṇā //
kalatrairapi cātmīyaiḥ smṛtvā pūrvaviceṣṭitam

ekākī bhramamāṇo'tha so'pi kaṣṭavaśaṃ gataḥ //
kṣuttṛṣṇāsupariśrāṃtaḥ kṣetre'traiva samāgataḥ

tataḥ prāsādamāsādya suparṇākhyasamudbhavam //
yāvatprāptaḥ parityaktastāva tprāṇairupoṣitaḥ

tato divyavapurbhūtvāvimānavaramāśritaḥ //
jagāma śivalokaṃ sa durlabhaṃ dhārmikairapi

sevyamānopsarobhiśca stūyamānaśca kinnaraiḥ //
gīyamānaśca gandharvaiḥ śivapārśve vyavasthitaḥ

atha taṃ saṃnidhau dṛṣṭvā gaurī papraccha sādaram//
ko'yaṃ deva samāyātaḥ sukṛtī tava mandire //
anena kiṃ kṛtaṃ karma yatprāpto'tra vibhūtidhṛk

// śrībhagavānuvāca // //
eṣa pāpasamācāraḥ sadā''sītpṛthivīpatiḥ //
veṇusaṃjño dharāpṛṣṭhe kuṣṭhavyādhisamākulaḥ

sa saṃtyakto nijairdāraiḥ śatruvargeṇa dharṣitaḥ //
bhramamāṇaḥ samāyātaḥ suparṇākhyasya mandire

upavāsapariśrāṃtaḥ sāṃnidhyaṃ mama yatra ca //
sarvaprāṇaiḥ parityaktastasminnāyatane śubhe

tatprabhāvādiha prāptaḥ satyametanmayoditam //
anyo'pyanaśanaṃ kṛtvā prāṇānyastatra saṃtyajet

sa sarvābhyadhikāṃ bhūtiṃ prāpnuyādvaravarṇini //
yānetānvīkṣase devi gaṇānme pārśvasaṃsthitān

etaistatra kṛtaṃ sarvairdevi prāyopaveśanam //
api kīṭapataṃgā ye paśavaḥ pakṣiṇo mṛgāḥ //
prāsāde tatra nirmuktāḥ prāṇairyāṃti mamāṃtikam

// sūta uvāca // //
tacchrutvā pārvatī vākyaṃ proktaṃ devena śambhunā //
vismayāviṣṭahṛdayā sādhu sādhviti sā'bravīt

tataḥprabhṛti loke'tra puruṣā muktimicchavaḥ //
dūrato'pi samabhyetya svānprāṇāṃstatra tatyajuḥ

prāyopaveśanaṃ kṛtvā śraddhayā parayā yutāḥ //
gacchanti ca parāṃ siddhimapi pāpaparāyaṇāḥ

etadvaḥ sarvamākhyātaṃ sarvapātakanāśanam //
suparṇākhyasya māhātmyaṃ yanmayā svapituḥ śrutam

iti śrīskande mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe śrīhāṭakeśvarakṣetramāhātmye suparṇākhyamāhātmyavarṇanaṃnāma tryaśītitamo'dhyāyaḥ