Skanda Purana · Chapter 6.82

// sūta uvāca // //
taddṛṣṭvā puṃḍarīkākṣo garuḍasya viceṣṭitam //
vismitaściṃtayāmāsa kimidaṃ sāṃprataṃ sthitam

api vajraprahāreṇa yasya romāpi na cyutam //
tau pakṣau sahasā cāsya kathaṃ nipatitau bhuvi

nūnametena yā strīṇāṃ kṛtā niṃdā mahātmanā//
dūṣitaṃ brahmacaryaṃ yacchāṃḍilīṃ samavekṣya ca

anayā pātitau pakṣau tapaḥśaktiprabhāvataḥ//
nānyasya vidyate śaktirīdṛśī bhuvanatraye

tataḥ prasādayāmāsa śāṃḍilīṃ garuḍadhvajaḥ //
tadarthaṃ vinayopetaḥ smitaṃ kṛtvā dvijottamāḥ

// śrībhagavānuvāca // //
sāmānyavacanaṃ proktaṃ sarvastrīṇāmanena hi //
tatkimarthaṃ mahābhāge tvayā caivedṛśaḥ kṛtaḥ

// śāṃḍilyuvāca // //
mama vaktraṃ samālokya smitaṃ cakre janārdana //
strīniṃdā vihitānena svamatyāpi jagadguro

etasmātkāraṇādasya nigraho'yaṃ mayā kṛtaḥ //
manasā na ca vākyena na ca keśava karmaṇā

// śrībhagavānuvāca // //
tathāpi kuru cāsya tvaṃ prasādaṃ gatakalmaṣe//
mama vākyānurodhena yadimāṃ manyase śubhe

// śāṃḍilyuvāca // //
manasāpi mayā dhyātaṃ śubhaṃ vā yadivā'śubham //
nānyathā jāyate deva viśeṣātkopayuktayā

tasmādeṣa mamādeśādārādha yatu śaṃkaram //
pakṣalābhāya nānyasya śaktirdātuṃ vyavasthitā

athavā puṃḍarīkākṣa rūpamīdṛgvyavasthitaḥ //
eṣa saṃsthāsyate loke satyametadbravīmyaham

// sūta uvāca // //
tasyāstadvacanaṃ śrutvā taṃ provāca janārdanaḥ //
garuḍaṃ dainyasaṃyuktaṃ bhāsapiṃḍopamaṃ sthitam

eṣa eva varaścāsyā dvipadeśyā dvijottama //
pakṣalābhāya yatproktaṃ tava śaṃbhuprasādanam

tasmādārādhaya kṣipraṃ tvaṃ devaṃ śaśiśekharam //
avyagraṃ cittamāsthāya divārātramataṃdritaḥ

yena te tatprabhāvena bhūyaḥ syāttādṛśaṃ vapuḥ //
tasya devasya māhātmyādacirādapi kāśyapa

tacchrutvā garuḍastūrṇaṃ dhṛtapāśupatavrataḥ //
saṃsthāpya devamīśānaṃ tatastaṃ toṣamānayat

cāṃdrāyaṇāni kṛcchrāṇi tathā sāṃtapanāni ca //
prājāpatyāni cakre'tha pārākāṇi tadagrataḥ

snātvā triṣavaṇaṃ paścādbhasmasnāna parāyaṇaḥ //
japanrudraśiro rudrānnīlarudrāṃstathāparān

cakre pūjāṃ svayaṃ tasya snāpayitvā yathāvidhi //
balipūjopahārāṃśca vidhānena prayacchati

evaṃ tasya vratasthasya japapūjāparasya ca //
tato varṣasahasrāṃte gatastuṣṭiṃ maheśvaraḥ //
abravīdvarado'smīti vṛṇuṣveṣṭaṃ dvijottama //

// garuḍa uvāca // //
paśyāvasthāṃ mameśāna śāṃḍilyā yā vinirmitā //
pakṣapātaḥ kṛto'smākaṃ tamahaṃ prārthayāmi vai

tvayātraiva sadā liṃge stheyaṃ hara mamādhunā //
mama vākyādasaṃdigdhaṃ yadi ceṣṭaṃ prayacchasi

// bhagavānuvāca // //
adyaprabhṛti me cātra liṃge vāso bhaviṣyati //
tvaṃ ca tadrūpasaṃpanno viśeṣādbalavegabhāk

bhaviṣyasi na saṃdeho matprasādādvihaṃgama //
evamuktvātha taṃ devaḥ svayaṃ pasparśa pāṇinā

tato'sya pakṣau saṃjātau tatkṣaṇādeva sundarau //
tathā romāṇi divyāni jātarūpopamāni ca

tataḥ praṇamya taṃ devaṃ prahaṣṭaḥ sa vihaṃgamaḥ //
gataḥ svabhavanaṃ paścādanujñāpya maheśvaram

devopi vacanāttasya tasmim̐lliṃge sadā haraḥ //
nivāsamakarotsamyakprāpte saṃdhyātraye sadā

tasya cāyatane puṇye yogātprāṇānparityajet //
prāyopaveśanaṃ kṛtvā na sa bhūyo'pi jāyate २९ //
api pāpa samācāraḥ kaulo vā nirghṛṇo'pi vā //
brahmaghno vā surāpo vā cauro vā bhrūṇahā'pi vā

trikālaṃ pūjayanyastu śraddhāpūtena cetasā ///
saṃvatsaraṃ vasetso'pi śivaloke mahīyate

athavā somavāreṇa yastaṃ paśyati mānavaḥ //
kṛtvā kṣaṇaṃ subhaktyā yo yāvatsaṃvatsaraṃ dvijāḥ ///

so'pi yāti na saṃdehaḥ puruṣaḥ śivamandire //
vimānavaramārūḍhaḥ sevyamāno'psarogaṇaiḥ

tasmātsarvaprayatnena kalikāle viśeṣataḥ//
draṣṭavyo vai suparṇākhyo devaḥ śraddhāsamanvitaiḥ

saṃtyājyāśca tathā prāṇāstadagreprāyasaṃśritaiḥ //
vāṃchadbhiḥ śivasāṃnidhyaṃ satyametanmayoditam ///

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe śrīhāṭakeśvarakṣetramāhātmye suparṇeśvarākhyamāhātmyavarṇanaṃnāma dvyaśītitamo'dhyāyaḥ