Skanda Purana · Chapter 6.81

// // śrīgaruḍa uvāca // //
mamāsti dayitaṃ mitraṃ brāhmaṇo bhṛguvaṃśajaḥ //
tasyāsti mādhavīnāma kanyā kamalalocanā

na tasyāḥ sadṛśaḥ kāṃtaḥ prāptastena mahātmanā //
yatastato'hamādiṣṭaḥ kāṃtamasyāstvamānaya //
anurūpaṃ dvijaśreṣṭha yadyahaṃ saṃmatastava

tato mayā'khilā bhūmistadvarārthaṃ vilokitā //
na tadarthaṃ varo labdhaḥ sarvaiḥ samucito guṇaiḥ

tatastvaṃ puṇḍarīkākṣa mama citte vyavasthitaḥ //
anurūpaḥ patistasyāḥ sarvaireva guṇairyutaḥ

tasmātpāṇigrahaṃ tasyāḥ svīkuruṣva sureśvara //
atyantarūpayuktāyā mama vākyapraṇoditaḥ

// bhagavānuvāca // //
atrānaya dvijaśreṣṭha tāṃ kanyāṃ kamalekṣaṇām//
yena dṛṣṭvā svayaṃ paścātprakaromi yathoditam

// garuḍa uvāca // //
tava tejobhayādeva sā kanyā janakānvitā //
mayā dūre vinirmuktā tatkathaṃ tāmihānaye

// śrībhagavānuvāca // //
atra tāṃ mama tattejo janakena samanvitām//
na hi dhakṣyati tasmāttvaṃ śīghraṃ dvijavarā''naya

evamuktastatastena viṣṇunā prabhaviṣṇunā //
tāṃ kanyā mānayāmāsa taṃ ca viprabhṛgūdvaham

athāsau praṇipatyoccairbrāhmaṇo madhusūdanam //
lakṣmīvannyaviśatpārśve garuḍasya samīpataḥ

sāpi kanyā varārohā bālyabhāvādaninditā //
śayyaikāṃte samāviṣṭā dakṣiṇe muravidviṣaḥ

atha kopaparītāṃgī mahiṣyādharmamāśritā //
lakṣmīḥ śaśāpa tāṃ kanyāṃ sapatnīti vicintya ca

yasmānme purataḥ pāpe kāṃtasya mama harṣitā//
śayyāyāṃ tvaṃ samāviṣṭā lajjāṃ tyaktvā sudūrataḥ //
tasmādaśvamukhī nūnaṃ vikṛtā tvaṃ bhaviṣyasi

evaṃ śāpe śriyā datte hāhākāro mahānabhūt //
sarveṣāṃ tatra saṃsthānāṃ kopaścāpi dvijanmanaḥ //

// brāhmaṇa uvāca // //
sahasraṃ yācyate kanyā karotyekaḥ karagraham //
vāṅmātreṇa na tasyāḥ syātpatnībhāvaḥ kathaṃcana

yāvannāgnidvijātīnāṃ pratyakṣaṃ gurusaṃnidhau //
sasaṃkalpaṃ svayaṃ dattā gṛhyoktavidhinā janaiḥ

tasmāttaddoṣanirmuktā sapatnyeṣā samā tvayā //
kṛtā vājimukhī pāpe tvaṃ gajāsyā bhaviṣyasi ///७//
evamuktvā sa vipreṃdrastataḥ provāca keśavam//
ātithyaṃ vihitaṃ hyetattava patnyā yathocitam //
tasmāttatra prayāsyāmi yatra syāttādṛśī sutā

// śrībhagavānuvāca // //
na santāpastvayā kāryaḥ kṛtyesmindvijasattama //
mamāṃtike prayātānāṃ nāśubhaṃ jāyate kvacit

tasmānnāśvamukhī hyeṣā janmanyasminbhaviṣyati //
gṛhītvemāṃ gṛhaṃ gaccha prayaccha svepsitāya ca

śayane vāmadigbhāgaḥ kalatrāṇāmudāhṛtaḥ //
dakṣiṇe bandhulokānāṃ tatkālocitaśāyinām

/
seyaṃ tava sutā vipra baṃdhusthānaṃ samāśritā //
bhaviṣyati tato jāmiḥ kaniṣṭhā me'nyajanmani

avatīrṇasya bhūpṛṣṭhe devakāryeṇa kenacit //
vājivaktradharā proktā yadyeṣā mama kāṃtayā

tato'haṃ sumahatkṛtvā tapaścaivānayā saha //
kariṣyāmi śubhāsyāṃ ca tathā lakṣmīmapi dvija

evaṃ sa bhagavānvipraṃ taṃ santoṣya tadā girā //
garuḍena samaṃ cakre kathāścitrā manoramāḥ

atha tasminkathāṃte sa garuḍaḥ puruṣottamam //
provāca tāṃ striyaṃ dṛṣṭvā vṛddhāṃ tejaḥsamanvitām //

apūrveyaṃ suraśreṣṭha strī vṛddhā tava pārśvagā //
kimarthaṃ keyamākhyāhi kutaḥ prāptā janārdana

// śrībhagavānuvāca // //
eṣā khyātā khagaśreṣṭha loke'sminvṛddhakanyakā //
śāṃḍilīnāma sarvajñā brahmacaryaparāyaṇā

tapovīryasamopetā sarvadevābhivaṃditā //
nāsti vai cedṛśī nārī khagendrātra jagattraye

// sūta uvāca // //
tasya tadvacanaṃ śrutvā vihasya vihagādhipaḥ //
provāca vāsudevaṃ ca tāṃ vilokya ciraṃ dvijāḥ

// garuḍa uvāca // //
naitaccitraṃ tapo yacca kriyate sumahattaram //
yathā ca dīyate dānaṃ yacca tatrāsti cādbhutam//
tathā ca kriyate yuddhaṃ saṃgrāme yuddhaśālibhiḥ

nāścaryaṃ citrametacca brahmacaryaṃ tadadbhutam //
viśeṣādyauvanāvasthāṃ saṃprāpya puruṣottama

viśeṣeṇa ca nārībhiratra na śraddadhāmyaham //
avaśyaṃ yauvanasthena tiryagyonigatena ca

vikāraḥ khalu kartavyo nādhi kārāya yauvanam //
yadi na prāpnuvaṃtyetāḥ puruṣaṃ yoṣitaḥ kvacit

anyonyaṃ maithunaṃ cakruḥ kāmabāṇaprapīḍitāḥ //
kuṣṭhinaṃ vyādhitaṃ vāpi sthaviraṃ vyaṃgameva ca //
apyetāḥ puruṣābhāve manyaṃte paṃcasāyakam

nāgnistṛpyati kāṣṭhānāṃ nāpagānāṃ mahodadhiḥ //
nāṃtakaḥ sarvabhūtānāṃ na puṃsāṃ vāmalocanā

na paratra bhayādetā maryādāṃ vidadhuḥ striyaḥ //
muktvā bhūpabhayaṃ caikamathavā gurujaṃ bhayam

// sūta uvāca // //
evaṃ tasya vacaḥ śrutvā śāṃḍilī brahmacāriṇī //
maunavratadharā'pyevaṃ hṛdi kopaṃ dadhāra sā

etasminnaṃtare tasya pakṣināthasya tatkṣaṇāt //
ubhau pakṣau gatau nāśaṃ ruṇḍākāro'tra so'bhavat

māṃsapiṃḍamayo raudraḥ sarvarogavivarjitaḥ //
aśaktaśca tathā gantuṃ padamātramapi kvacit //

iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye suparṇapakṣapātavarṇanaṃnāmaikāśītitamo'dhyāyaḥ