સ્કંદ પુરાણ · અધ્યાય 6.82

॥ સૂત ઉવાચ ॥ ॥
તદ્દૃષ્ટ્વા પુંડરીકાક્ષો ગરુડસ્ય વિચેષ્ટિતમ્ ॥
વિસ્મિતશ્ચિંતયામાસ કિમિદં સાંપ્રતં સ્થિતમ્

અપિ વજ્રપ્રહારેણ યસ્ય રોમાપિ ન ચ્યુતમ્ ॥
તૌ પક્ષૌ સહસા ચાસ્ય કથં નિપતિતૌ ભુવિ

નૂનમેતેન યા સ્ત્રીણાં કૃતા નિંદા મહાત્મના॥
દૂષિતં બ્રહ્મચર્યં યચ્છાંડિલીં સમવેક્ષ્ય ચ

અનયા પાતિતૌ પક્ષૌ તપઃશક્તિપ્રભાવતઃ॥
નાન્યસ્ય વિદ્યતે શક્તિરીદૃશી ભુવનત્રયે

તતઃ પ્રસાદયામાસ શાંડિલીં ગરુડધ્વજઃ ॥
તદર્થં વિનયોપેતઃ સ્મિતં કૃત્વા દ્વિજોત્તમાઃ

॥ શ્રીભગવાનુવાચ ॥ ॥
સામાન્યવચનં પ્રોક્તં સર્વસ્ત્રીણામનેન હિ ॥
તત્કિમર્થં મહાભાગે ત્વયા ચૈવેદૃશઃ કૃતઃ

॥ શાંડિલ્યુવાચ ॥ ॥
મમ વક્ત્રં સમાલોક્ય સ્મિતં ચક્રે જનાર્દન ॥
સ્ત્રીનિંદા વિહિતાનેન સ્વમત્યાપિ જગદ્ગુરો

એતસ્માત્કારણાદસ્ય નિગ્રહોઽયં મયા કૃતઃ ॥
મનસા ન ચ વાક્યેન ન ચ કેશવ કર્મણા

॥ શ્રીભગવાનુવાચ ॥ ॥
તથાપિ કુરુ ચાસ્ય ત્વં પ્રસાદં ગતકલ્મષે॥
મમ વાક્યાનુરોધેન યદિમાં મન્યસે શુભે

॥ શાંડિલ્યુવાચ ॥ ॥
મનસાપિ મયા ધ્યાતં શુભં વા યદિવાઽશુભમ્ ॥
નાન્યથા જાયતે દેવ વિશેષાત્કોપયુક્તયા

તસ્માદેષ મમાદેશાદારાધ યતુ શંકરમ્ ॥
પક્ષલાભાય નાન્યસ્ય શક્તિર્દાતું વ્યવસ્થિતા

અથવા પુંડરીકાક્ષ રૂપમીદૃગ્વ્યવસ્થિતઃ ॥
એષ સંસ્થાસ્યતે લોકે સત્યમેતદ્બ્રવીમ્યહમ્

॥ સૂત ઉવાચ ॥ ॥
તસ્યાસ્તદ્વચનં શ્રુત્વા તં પ્રોવાચ જનાર્દનઃ ॥
ગરુડં દૈન્યસંયુક્તં ભાસપિંડોપમં સ્થિતમ્

એષ એવ વરશ્ચાસ્યા દ્વિપદેશ્યા દ્વિજોત્તમ ॥
પક્ષલાભાય યત્પ્રોક્તં તવ શંભુપ્રસાદનમ્

તસ્માદારાધય ક્ષિપ્રં ત્વં દેવં શશિશેખરમ્ ॥
અવ્યગ્રં ચિત્તમાસ્થાય દિવારાત્રમતંદ્રિતઃ

યેન તે તત્પ્રભાવેન ભૂયઃ સ્યાત્તાદૃશં વપુઃ ॥
તસ્ય દેવસ્ય માહાત્મ્યાદચિરાદપિ કાશ્યપ

તચ્છ્રુત્વા ગરુડસ્તૂર્ણં ધૃતપાશુપતવ્રતઃ ॥
સંસ્થાપ્ય દેવમીશાનં તતસ્તં તોષમાનયત્

ચાંદ્રાયણાનિ કૃચ્છ્રાણિ તથા સાંતપનાનિ ચ ॥
પ્રાજાપત્યાનિ ચક્રેઽથ પારાકાણિ તદગ્રતઃ

સ્નાત્વા ત્રિષવણં પશ્ચાદ્ભસ્મસ્નાન પરાયણઃ ॥
જપન્રુદ્રશિરો રુદ્રાન્નીલરુદ્રાંસ્તથાપરાન્

ચક્રે પૂજાં સ્વયં તસ્ય સ્નાપયિત્વા યથાવિધિ ॥
બલિપૂજોપહારાંશ્ચ વિધાનેન પ્રયચ્છતિ

એવં તસ્ય વ્રતસ્થસ્ય જપપૂજાપરસ્ય ચ ॥
તતો વર્ષસહસ્રાંતે ગતસ્તુષ્ટિં મહેશ્વરઃ ॥
અબ્રવીદ્વરદોઽસ્મીતિ વૃણુષ્વેષ્ટં દ્વિજોત્તમ ॥

॥ ગરુડ ઉવાચ ॥ ॥
પશ્યાવસ્થાં મમેશાન શાંડિલ્યા યા વિનિર્મિતા ॥
પક્ષપાતઃ કૃતોઽસ્માકં તમહં પ્રાર્થયામિ વૈ

ત્વયાત્રૈવ સદા લિંગે સ્થેયં હર મમાધુના ॥
મમ વાક્યાદસંદિગ્ધં યદિ ચેષ્ટં પ્રયચ્છસિ

॥ ભગવાનુવાચ ॥ ॥
અદ્યપ્રભૃતિ મે ચાત્ર લિંગે વાસો ભવિષ્યતિ ॥
ત્વં ચ તદ્રૂપસંપન્નો વિશેષાદ્બલવેગભાક્

ભવિષ્યસિ ન સંદેહો મત્પ્રસાદાદ્વિહંગમ ॥
એવમુક્ત્વાથ તં દેવઃ સ્વયં પસ્પર્શ પાણિના

તતોઽસ્ય પક્ષૌ સંજાતૌ તત્ક્ષણાદેવ સુન્દરૌ ॥
તથા રોમાણિ દિવ્યાનિ જાતરૂપોપમાનિ ચ

તતઃ પ્રણમ્ય તં દેવં પ્રહષ્ટઃ સ વિહંગમઃ ॥
ગતઃ સ્વભવનં પશ્ચાદનુજ્ઞાપ્ય મહેશ્વરમ્

દેવોપિ વચનાત્તસ્ય તસ્મિઁલ્લિંગે સદા હરઃ ॥
નિવાસમકરોત્સમ્યક્પ્રાપ્તે સંધ્યાત્રયે સદા

તસ્ય ચાયતને પુણ્યે યોગાત્પ્રાણાન્પરિત્યજેત્ ॥
પ્રાયોપવેશનં કૃત્વા ન સ ભૂયોઽપિ જાયતે ૨૯ ॥
અપિ પાપ સમાચારઃ કૌલો વા નિર્ઘૃણોઽપિ વા ॥
બ્રહ્મઘ્નો વા સુરાપો વા ચૌરો વા ભ્રૂણહાઽપિ વા

ત્રિકાલં પૂજયન્યસ્તુ શ્રદ્ધાપૂતેન ચેતસા ॥।
સંવત્સરં વસેત્સોઽપિ શિવલોકે મહીયતે

અથવા સોમવારેણ યસ્તં પશ્યતિ માનવઃ ॥
કૃત્વા ક્ષણં સુભક્ત્યા યો યાવત્સંવત્સરં દ્વિજાઃ ॥।

સોઽપિ યાતિ ન સંદેહઃ પુરુષઃ શિવમન્દિરે ॥
વિમાનવરમારૂઢઃ સેવ્યમાનોઽપ્સરોગણૈઃ

તસ્માત્સર્વપ્રયત્નેન કલિકાલે વિશેષતઃ॥
દ્રષ્ટવ્યો વૈ સુપર્ણાખ્યો દેવઃ શ્રદ્ધાસમન્વિતૈઃ

સંત્યાજ્યાશ્ચ તથા પ્રાણાસ્તદગ્રેપ્રાયસંશ્રિતૈઃ ॥
વાંછદ્ભિઃ શિવસાંનિધ્યં સત્યમેતન્મયોદિતમ્ ॥।

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં ષષ્ઠે નાગરખણ્ડે શ્રીહાટકેશ્વરક્ષેત્રમાહાત્મ્યે સુપર્ણેશ્વરાખ્યમાહાત્મ્યવર્ણનંનામ દ્વ્યશીતિતમોઽધ્યાયઃ