Skanda Purana · Chapter 6.80

atha suparṇākhyamāhātmyaṃ bhaviṣyaṃti //
// ṛṣaya ūcuḥ // //
yadetadbhavatā proktaṃ tejovīryasamanvitaḥ //
garuḍastena saṃjajñe munīnāṃ homakarmaṇā

sa kathaṃ tatra saṃbhūta etanno vistarādvada //
vinatāyāḥ samudbhūta ityeṣā śrūyate śrutiḥ

// sūta uvāca // //
yo'sāvātharvaṇairmaṃtraiḥ kalaśaścābhimantritaḥ //
tairmaṃtrairvālakhilyaiśca mahā'marṣasamanvitaiḥ

nivāritaiśca dakṣeṇa sūcite vihagādhipe //
kaśyapastaṃ samādāya kalaśaṃ prayayau gṛham

tataḥ provāca saṃhṛṣṭo vinatāṃ dayitāṃ nijām //
etatpiba jalaṃ bhadre mantrapūtaṃ mahattaram

yena te jāyate putraḥ sahasrākṣādhiko balī //
tejasvī ca yaśasvī ca ajeyaḥ sarva dānavaiḥ

tasya tadvacanaṃ śrutvā tatkṣaṇādeva saṃpapau //
tattoyaṃ sā varārohā sadyo garbhaṃ tato dadhe

evaṃ tajjalapānena tejovīryasama nvitaḥ //
kaśyapādgaruḍo jajñe sarvasarpabhayāvahaḥ

yenāmṛtaṃ hṛtaṃ vīryātparibhūya puraṃdaram //
mātṛbhaktiparītena sarpāṇāṃ saṃniveditam

yo jajñe dayito viṣṇorvāhanatvamupāgataḥ //
dhvajāgre tu rathasyāpi yaḥ sadaiva vyavasthitaḥ

yena pūrvaṃ tapastaptvā kṣetre'traiva mahātmanā //
trinetrastuṣṭimānīto gatapakṣeṇa dhīmatā

pakṣāptiryena saṃjātā yasya bhūyo'pi tādṛśī //
devadevaprasādena viśiṣṭā cā'tha nirmitā

//
// munaya ūcuḥ // //
kathaṃ tasya gatau pakṣau garuḍasya mahātmanaḥ //
punarlabdhau kathaṃ tena kathaṃ tuṣṭo maheśvaraḥ //
etanno vistarādbrūhi sūtaputra yathātatham

// sūta uvāca // //
purāsīdbrāhmaṇo mitraṃ bhṛguvaṃśakulodvahaḥ //
garuḍasya dvijaśreṣṭhā bālabhāvādapi prabho

tasya kanyā purā jātā mādhavī nāma saṃmatā //
rūpaudāryasamopetā sarvalakṣaṇalakṣitā

na devī na ca gandharvī nāsurī na ca pannagī //
tādṛgrūpā mahābhāgā yādṛśī sā sumadhyamā

atha tasyā varārthāya garuḍaṃ vihagādhipam //
sa provāca paraṃ mitraṃ vinayāvanataḥ sthitaḥ //

etasyā mama kanyāyā varaṃ tvaṃ vihagādhipa //
sadṛśaṃ vīkṣayasvādya yena tasmai dadāmyaham

// garuḍa uvāca // //
mama pṛṣṭhaṃ samāruhya samastaṃ kṣitimaṃḍalam //
tvaṃ bhramasva dvijaśreṣṭha gṛhītvemāṃ ca kanyakām

tatastasyāḥ kumāryā vai anurūpaṃ guṇānvitam //
svayaṃ cāhara bhartārameṣā maitrī mamodbhavā

// sūta uvāca //
evamukto'tha vipraḥ sa tatkṣaṇātkanyayā saha //
ārūḍho gāruḍaṃ pṛṣṭhaṃ varārthāya dvijottamāḥ

yaṃyaṃ paśyati vipraḥ sa kumāraṃ taruṇākṛtim //
sa sa no tasya cittāṃte vartatesma kathaṃcana

kasyacidrūpamatyugraṃ na kulaṃ ca sunirmalam //
kulaṃ rūpaṃ ca yasya syāttasya no guṇasaṃcayaḥ

yasya vā guṇasandohastasya no rūpamuttamam //
pakṣapātaṃ ca vittaṃ ca tathānyadvaralakṣaṇam

evaṃ varṣasahasrāṃte bhramatastasyabhūtalam //
viprasya pakṣināthasya varārthāya drijottamāḥ

kadācidatha tau śrāntau bhramamāṇāvitastataḥ //
kṣetre'traiva samāyātau vāsudevadidṛkṣayā

śvetadvīpaṃ samālokya tathānyāṃ badarīṃ śubhām //
kṣīrodaṃ ca savaikuṇṭhaṃ tathānyaṃ tasya saṃśrayam

atha tābhyāṃ munirdṛṣṭo nārado brahmasaṃbhavaḥ //
sāṃtvapūrvaṃ tadā pṛṣṭo viṣṇuṃ brahma sanātanam //

kva devaḥ puṃḍarīkākṣaḥ sāṃprataṃ vartate mune //
viṣṇusthānāni sarvāṇi vīkṣitāni samaṃtataḥ //
āvābhyāṃ saṃprahṛṣṭābhyāṃ na saṃdṛṣṭaḥ sa keśavaḥ

// nārada uvāca // //
jalaśāyisvarūpeṇa yāvanmāsacatuṣṭayam //
hāṭakeśvaraje kṣetre sa saṃtiṣṭhati sarvadā

tasmāttaddarśanārthāya gamyatāṃ tatra mā ciram //
yena sandarśanaṃ yāti dvābhyāmapi sa cakradhṛk

ahamapyeva tatraiva prasthitastasya darśanāt //
prasthitaśca tvayā yuko devakāryeṇa kenacit

atha tau pakṣiviprendrau sa ca brahmasuto muniḥ //
prāptāḥ sarve sthito yatra jalaśāyī janārdanaḥ

atha dṛṣṭvā mahattejo vaiṣṇavaṃ dūrato'pi tam //
brāhmaṇaṃ garuḍaḥ prāha nāradaśca munīśvaraḥ

atraiva tvaṃ dvijaśreṣṭha tiṣṭha dūre'pi tejasaḥ //
vaiṣṇavasya sutāyuktaḥ kalpāṃtāgnisamam va (?)

no cetsaṃpatsyase bhasma pataṃga iva pāvakam //
samāsādya niśāyoge mūḍhaṃ bhāvaṃ samāśritaḥ

āvābhyāṃ tatprasādena soḍhametatsuduḥsaham //
na karoti śarīrārti tathānyadapi kutsitam

evaṃ taṃ brāhmaṇaṃ tatra muktvā dūre sutānvitam //
gatau tau tatra saṃsuptastoye yatra janārdanaḥ

divyastutiparau mūrdhni dhṛtahastāṃjalīpuṭau //
pulakāṃkitasarvāṃgāvānandāśruplutānanau

triḥparikamya taṃ devamaṣṭāṃgaṃ praṇatau harim//
dṛṣṭavantau ca pādāṃte saṃniviṣṭāṃ samudrajām

pādasaṃvāhanāsaktāṃ viṣṇu vaktrāhitekṣaṇām//
athāparāṃ vayovṛddhāṃ śvetavastrāvaguṃṭhitām

sanniviṣṭāṃ tadabhyāśe samyagdhyānaparāyaṇām //
dvādaśārkaprabhāyuktāṃ kṛśāṃgīṃ pulakānvitām

atha tau viṣṇunā harṣādubhāvapi praharṣitau //
saṃbhāṣitau ca saṃpṛṣṭau yadarthaṃ ca samāgatau

// śrīnārada uvāca // //
ahaṃ hi surakāryeṇa saṃprāpyo'tra tavāṃtikam //
garuḍo vai brāhmaṇāya yanmāṃ pṛcchasi keśava

// śrībhagavānuvāca // //
kaccitkṣemaṃ muniśreṣṭha sarveṣāṃ tridivaukasām //
kaccinneṃdrasya saṃjātaṃ bhayaṃ dānavasaṃbhavam

yajñabhāgaṃ labhaṃte sma kacciddevāḥ savāsavāḥ //
kaccinna dānavaḥ kaścidutkaṭo'bhūddharātale

// śrīnārada uvāca // //
sāṃprataṃ dharaṇī prāptā caturvaktrasya saṃnidhau //
rorūyamāṇā bhārārtā dānavaiḥ pīḍitā bhṛśam //
provāca padmajaṃ tatra duḥkhena mahatā'nvitā

// dharaṇyuvāca // //
kālanemirhato yo'sau viṣṇunāprabhaviṣṇunā //
ugrasenasutaḥ kaṃsaḥ saṃbhūtaḥ sa mahāsuraḥ

ariṣṭo dhenukaḥ keśī pralambonāma cāparaḥ //
tathānyā tu mahāraudrā pūtanā nāma rākṣasī

itaścetaśca dhāvadbhirdānavairebhireva ca//
vṛthā me jāyate pīḍā tathānyairapi dāruṇaiḥ

ūrdhvabāhustathā jāto martyaloke jano'dhunā //
bahutvānna pramāti sma kathaṃciddhi mamopari

bhārāvataraṇaṃ deva na kariṣyasi cāśu cet //
rasātalaṃ prayāsyāmi tadā'haṃ nātra saṃśayaḥ

tasyāstadvacanaṃ śrutvā brahmaṇā lokakartṛṇā //
saṃmaṃtrya vibudhaiḥ sārdhaṃ preṣito'haṃ tavāṃtikam

proktavyo bhagavānvākyaṃ tvayā devo janārdanaḥ //
yathā'vatīrya bhūpṛṣṭhe bhāramasyāḥ praṇāśayet

tasmādbhūbhitale deva kṛtvā janma svayaṃ vibho //
bhāraṃ nāśaya medinyā etadartha mihāgataḥ

// śrībhagavānuvāca // //
evaṃ mune kariṣyāmi saṃmaṃtrya brahmaṇā saha //
bhārāvataraṇaṃ bhūmeḥ sākaṃ devaiḥ savāsavaiḥ

evamuktvā'tha taṃ viṣṇurnāradaṃ munipuṃgavam //
tataśca garuḍaṃ prāha tvaṃ kimarthamihāgataḥ

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe śrīhāṭakeśvarakṣetramāhātmye suparṇākhyamāhātmye viṣṇudarśanamāhātmyavarṇanaṃnāmāśītitamo'dhyāyaḥ