Skanda Purana · Chapter 6.75

// sūta uvāca // //
purā kalpe bhagavatā etatkṣetramanuttamam //
rudreṇa brahmaṇe dattaṃ tuṣṭena dvijasattamāḥ

yadā tu sthāpitaṃ liṃgaṃ hāṭakeśvarasaṃjñitam //
devaiḥ prītena rudreṇa pradattaṃ brahmaṇe punaḥ

etatkṣetraṃ tadā dattaṃ śaṃbhunā ṣaṇmukhasya ha //
rakṣaṇārthaṃ hi viprāṇāṃ kalikālādidoṣataḥ

brahmaṇā prārthitenedaṃ svayamādimamuttamam //
pitrādiṣṭastu gāṃgeyastatra vāsamathākarot

kārtikyāṃ kṛttikāyoge yaḥ kuryātsvāmidarśanam //
saptajanma bhavedvipro dhanāḍhyo vedapāragaḥ

mahāsenasya devasya prāsādaṃ sumanoharam//
uccaiḥ sthitaṃ sarvaloke pātukāmamivāṃbaram

tacchrutvā vibudhāḥ sarve kautukādetya satvaram //
vīkṣāṃcakrustato gatvā dṛṣṭvā medhyatamaṃ puram

prāsādasyottare deśe prācye deśe tathā dvijāḥ //
yajñakriyāsamāraṃbhāṃścakurviprairyathoditān

iṣṭvā ca vibudhāḥ sarve dattvā tebhyaśca dakṣiṇām //
jagmustriviṣṭapaṃ hṛṣṭā labdhvā tatsthānajaṃ phalam

tatastu devayajanaṃnāma tasya babhūva ha //
yadanyatra śataṃ kṛtvā kratūnāṃ phalamāpnuyāt //
tadatraikena labhate kratunā dakṣiṇāvatā

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye yajña bhūmimāhātmyavarṇanaṃnāma pañcasaptatitamo'dhyāyaḥ