સ્કંદ પુરાણ · અધ્યાય 6.75

॥ સૂત ઉવાચ ॥ ॥
પુરા કલ્પે ભગવતા એતત્ક્ષેત્રમનુત્તમમ્ ॥
રુદ્રેણ બ્રહ્મણે દત્તં તુષ્ટેન દ્વિજસત્તમાઃ

યદા તુ સ્થાપિતં લિંગં હાટકેશ્વરસંજ્ઞિતમ્ ॥
દેવૈઃ પ્રીતેન રુદ્રેણ પ્રદત્તં બ્રહ્મણે પુનઃ

એતત્ક્ષેત્રં તદા દત્તં શંભુના ષણ્મુખસ્ય હ ॥
રક્ષણાર્થં હિ વિપ્રાણાં કલિકાલાદિદોષતઃ

બ્રહ્મણા પ્રાર્થિતેનેદં સ્વયમાદિમમુત્તમમ્ ॥
પિત્રાદિષ્ટસ્તુ ગાંગેયસ્તત્ર વાસમથાકરોત્

કાર્તિક્યાં કૃત્તિકાયોગે યઃ કુર્યાત્સ્વામિદર્શનમ્ ॥
સપ્તજન્મ ભવેદ્વિપ્રો ધનાઢ્યો વેદપારગઃ

મહાસેનસ્ય દેવસ્ય પ્રાસાદં સુમનોહરમ્॥
ઉચ્ચૈઃ સ્થિતં સર્વલોકે પાતુકામમિવાંબરમ્

તચ્છ્રુત્વા વિબુધાઃ સર્વે કૌતુકાદેત્ય સત્વરમ્ ॥
વીક્ષાંચક્રુસ્તતો ગત્વા દૃષ્ટ્વા મેધ્યતમં પુરમ્

પ્રાસાદસ્યોત્તરે દેશે પ્રાચ્યે દેશે તથા દ્વિજાઃ ॥
યજ્ઞક્રિયાસમારંભાંશ્ચકુર્વિપ્રૈર્યથોદિતાન્

ઇષ્ટ્વા ચ વિબુધાઃ સર્વે દત્ત્વા તેભ્યશ્ચ દક્ષિણામ્ ॥
જગ્મુસ્ત્રિવિષ્ટપં હૃષ્ટા લબ્ધ્વા તત્સ્થાનજં ફલમ્

તતસ્તુ દેવયજનંનામ તસ્ય બભૂવ હ ॥
યદન્યત્ર શતં કૃત્વા ક્રતૂનાં ફલમાપ્નુયાત્ ॥
તદત્રૈકેન લભતે ક્રતુના દક્ષિણાવતા

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં ષષ્ઠે નાગરખણ્ડે હાટકેશ્વરક્ષેત્રમાહાત્મ્યે યજ્ઞ ભૂમિમાહાત્મ્યવર્ણનંનામ પઞ્ચસપ્તતિતમોઽધ્યાયઃ