Skanda Purana · Chapter 6.73

// sūta uvāca // //
evaṃ te kauravāḥ sarve pāṃḍoḥ putrāśca śālinaḥ //
tasmātsthānāttato jagmuryatra dvāravatī purī

tatra gatvā vivāhaṃ tu cakruḥ saṃhṛṣṭamānasāḥ //
duryodhanasya bhūpasya bhānumatyā samaṃ tadā

nānāvāditraghoṣeṇa vedadhvaniyutena ca //
gītairmanoharaiḥ pāṭhairbandināṃ ca sahasraśaḥ

evaṃ mahotsavo jajñe tatra yāvaddināṣṭakam //
yādavānāṃ kurūṇāṃ ca militānāṃ parasparam

kṛtārthāstatra saṃjātāḥ sūtamāgadha bandinaḥ //
cāraṇā brāhmaṇeṃdrāśca tathānye'pi ca tārkikāḥ

tatastu navame prāpte divase kurupāṃḍavāḥ //
bhīṣmādyāḥ puṃḍarīkākṣamidamūcuḥ sasauhṛ dam

na vayaṃ puṃḍarīkākṣa tava rāmasya cāśrayam //
kathaṃcittyaktumicchāmaḥ snehapāśaniyaṃtritāḥ

tathāpi ca pragantavyaṃ svapuraṃ prati mādha va //
balabhadrasamāyuktastasmānnaḥ kuru mokṣaṇam

// viṣṇuruvāca // //
na tāvadvatsaro jāto na māsaḥ pakṣa eva ca //
sthitānāmatra yuṣmākaṃ tatkimautsukyamāgatam

tasmādatraiva tiṣṭhāmaḥ sahitāḥ kurupāṃḍavāḥ //
yūyaṃ vayaṃ vinodena mṛgayākṣodbhavena ca

śastraśikṣākriyābhiśca damanena ca dantinām //
tathābhivāṃchitairanyaiḥ sneho'sti yadi vo mayi

// bhīṣma uvāca // //
upapannamidaṃ viṣṇo yattvayā vyāhṛtaṃ vacaḥ //
paraṃ śṛṇuṣva me vākyaṃ yadarthaṃ hyutsukā vayam

ānartaviṣaye'smābhirāgacchadbhistavāṃtikam //
dṛṣṭamatyadbhutaṃ kṣetraṃ hāṭakeśvarajaṃ mahat //
tatra liṃgāni dṛṣṭāni bhūpatīnāṃ mahātmanām

sūryacandrānvayotthānāmanyeṣāṃ ca mahātmanām

devānāṃ dānavānāṃ ca munīnāṃ ca viśeṣataḥ //
sākārāṇi sutejāṃsi nānāprāsādabhoji ca

tataśca kurumukhyānāṃ pāṃḍavānāṃ ca mādhava //
liṃgasaṃsthāpanārthāya tatra jātā matirdṛḍhā

te vayaṃ tatra gatvāśu yathāśaktyā yathecchayā //
liṃgāni sthāpayiṣyāmaḥ svānisvāni pṛthakpṛthak

etasmātkāraṇāttūrṇaṃ calitā vayamacyuta //
na vayaṃ tava saṃgasya tṛpyāmo'bdaśatairapi

tasmādājñāpayasvādya kṛtvā cittaṃ dṛḍhaṃ vibho //
bhūyo'pyatrāgamiṣyāmastava darśanalālasāḥ

// śrībhagavānuvāca // //
ahaṃ jānāmi tatkṣetraṃ supuṇyaṃ pāpanāśanam //
tāpasaiḥ kīrtitaṃ nityaṃ mamānyaistīrthayātrikaiḥ

tasmāttatra sameṣyāmo yuṣmābhiḥ sahitā vayam //
liṃga saṃsthāpanārthāya kṣetradarśanavāṃchayā

// sūta uvāca // //
tacchutvā kauravāḥ sarve paraṃ harṣamupāgatāḥ //
tathā pāṃḍusutāścaiva ye cānye tatra pārthivāḥ // २२ /
te tu saṃprasthitāḥ sarve militāḥ kurupāṃḍavāḥ //
gajavājivimardena kampayanto vasundharām

atha tatkṣetramāsādya dūre kṛtvā niveśanam //
kauravā yādavā mukhyāścamatkārapuraṃ gatāḥ

tatra sarvānsamāhūya brāhmaṇānvinayānvitāḥ //
procurdattvā vicitrāṇi bhūṣaṇācchādanāni ca

vayaṃ sarve'tra vāṃchāmo ligasaṃsthāpanakriyām //
kartuṃ prāsādamukhyānāṃ pṛthaktvena svaśaktitaḥ

tasmātkṛtvā prasādaṃ no dayāṃ ca dvijasattamāḥ //
ājñāpayata śīghraṃ hi yena karma pravartate

bhaviṣyatha tathā yūyaṃ hotāraḥ sarvakarmasu //
na cānyo brāhmaṇo bāhyo yadyapi syādbṛhaspatiḥ

yato'smābhiḥ śrutā vārtā kīrtyamānā purātanī //
viṣṇunā tasya rājarṣeḥ pretaśrāddhasamudbhavā

yathā tena kṛtaṃ śrāddhaṃ pituḥ pretasya yatnataḥ //
brāhmaṇānāṃ puro'nyeṣāṃ yathoktānāmapi dvijāḥ

yathoktavidhinā tīrthe nāgānāṃ paṃcamīdine ///
śrāvaṇe māsi no muktaḥ pitā tasya tathāpi saḥ

pretatvātsarpadoṣeṇa saṃjātā dvijasattamāḥ //
devaśarmapuro yāvattatkṛtaṃ śrāddhamādarāt //
tāvatpitā vinirmuktaḥ pretatvāddāruṇāddvijāḥ

yadatra kriyate kiṃcitkarma dharmyaṃ dvijottamāḥ //
tadbāhyaṃ ca bhavedvyarthametadvidmaḥ sphuṭaṃ vayam //

prārthayāmo viśeṣeṇa tena dainyaṃ samāgatāḥ //
prasādaḥ kriyatāṃ tasmādājñāṃ yacchata mā ciram

// sūta uvāca // //
teṣāṃ tadvacanaṃ śrutvā brāhmaṇāste parasparam //
mantraṃ cakrustadarthaṃ hi kiṃ kṛtaṃ sukṛtaṃ bhavet

eke procurna dāsyāmaḥ prāsādārthaṃ vasundharām //
eteṣāmapi caikasya tasmādgacchaṃtu satvaram

paṃcakrośapramāṇena kṣetrametadvyavasthitam //
pūrveṣāmapi devānāṃ prāsādaistatsamāvṛtam

anye procurdhanomattā yūyaṃ ca sukhamāśritāḥ //
dāridyārtiṃ na jānītha brūtha tena bhṛśaṃ vacaḥ

tasmādvayaṃ pradāsyāma eteṣāṃ hi vasu ndharām //
arthasiddhirbhavedyena bhūṣā sthānasya jāyate

tathānye madhyamāḥ procuryatra sākṣājjanārdanaḥ //
svayaṃ prārthayate bhūmiṃ tatkasmānna pradīyate

tasmādyatra samāyātāḥ kurupāṃḍavayādavāḥ //
prādhānyena prakurvaṃtu prāsādāṃstena cāpare

yācate yatra gāṃgeyaḥ svayameva tathā paraḥ //
dhṛtarāṣṭraḥ saputraśca pāṃḍavāśca mahābalāḥ //
liṃgasaṃsthāpanārthāya niṣedhastatra nārhati

teṣāṃ tadvacanaṃ śrutvā pratipannaṃ dvijottamaiḥ //
nirdhanaiḥ sadhanaiścāpi saspṛhairniḥspṛhairapi

tataḥ sametya te sarve brāhmaṇāḥ kurusattamān //
yādavānpāṃḍavānprocuḥ kṛtvā vai mantraniścayam

// brāhmaṇā ūcuḥ // //
etatsvalpataraṃ kṣetraṃ sarveṣāmapi bhūbhujām //
prāsādaiḥ sarvato vyāptaṃ tatkiṃ brūmo'dhunā vayam

tadbhavaṃtaḥ prakurvaṃtu prādhānyena yadṛcchayā //
kṣetre'traivābhimukhyena prāsādānsumanoharān //
yathājyeṣṭhaṃ yathāśreṣṭhaṃ pṛthaktvena vyavasthitāḥ

atha harṣasamāyuktā dhṛtarāṣṭramukhāḥ kramāt //
prādhānyena yathāśreṣṭhaṃ cakruḥ prāsādapaddhatim

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye dhṛtarāṣṭrādikṛtaprāsādasthāpanodyamavarṇanaṃnāma trisaptatitamo'dhyāyaḥ