Skanda Purana · Chapter 6.72

// sūta uvāca // //
tatraiva sthāpitaṃ liṃgaṃ dhṛtarāṣṭreṇa bhūbhujā //
duryodhanena cālokya sarvapāpaiḥ pramucyate

// ṛṣaya ūcuḥ // //
kasminkāle narendreṇa dhṛtarāṣṭreṇa bhūbhujā //
tatra saṃsthāpitaṃ ligaṃ vada tvaṃ raumaharṣaṇe

// sūta uvāca // //
āsīdbhānumatīnāma balabhadrasutā purā //
sarvalakṣaṇasaṃpannā rūpau dāryaguṇānvitā

tāṃ dadāvatha patnyarthe dhārtarāṣṭrāya dhīmate //
duryodhanāya saṃmantrya viṣṇunā saha yādavaḥ

atha nāgapurātsarve bhīṣma droṇādayaśca ye //
kauravāḥ prasthitāstūrṇaṃ purīṃ dvāravatīṃ prati

tathā pāṃḍusutāḥ paṃca parivārasamanvitāḥ//
saubhrātraṃ manyamānāste duryodhanasamanvi tāḥ //
jagmurdvāravatīṃ hṛṣṭāḥ sainyena mahatānvitāḥ

atha krameṇa gacchaṃtaste sarve kurupāṇḍavāḥ //
ānartaviṣayaṃ prāptā dhanadhānyasamākulam

sarvapāpaharaṃ puṇyaṃ yatra tatkṣetramuttamam//
hāṭakeśvaradevasya vikhyātaṃ bhuvanatraye

atha prāha viśuddhātmā vṛddhaḥ kurupitāmahaḥ //
dhṛtarāṣṭraṃ mahīpālaṃ saputraṃ prahasanniva

// bhīṣma uvāca // //
etadvatsa purā dṛṣṭaṃ mayā kṣetramanuttamam//
hāṭakeśvaradevasya sarvapātakanāśanam

atrāhaṃ caiva ni rmuktaḥ strīhatyodbhavapātakāt //
tasmādatraiva rājeṃdra tiṣṭhāmaḥ paṃcavāsarān

yena sarvāṇi paśyāmastīrthānyāyatanāni ca//
yānyatra saṃti puṇyāni munīnāṃ bhāvitātmanām

atha tadvacanādrājā dhṛtarāṣṭroṃ'bikāsutaḥ //
śatasaṃkhyaiḥ sutaiḥ sārdhaṃ kautūhalasamanvitaḥ

jagāma satvaraṃ tatra yatra tatkṣetramuttamam //
tapasvigaṇasaṃkīrṇaṃ yuktaṃ caivāśramaiḥ śubhaiḥ

brahmaghoṣeṇa mahatā nāditaṃ sarvatodiśam //
vahnipūjotthadhūmreṇa kaluṣīkṛtapāda pam //
krīḍāmṛgaiśca saṃkīrṇaṃ dhāvadbhirbahubhistathā

tato nivārya sainyaṃ svamupadravabhayānnṛpaḥ //
pañcabhiḥ pāṃḍavaiḥ sārdhaṃ śatasaṃkhyaistathā sutaiḥ //

bhīṣmeṇa somadattena bāhlīkena samanvitaḥ//
droṇācāryeṇa vīreṇa tatputreṇa kṛpeṇa ca

saubalena ca karṇena tathānyairapi pārthivaiḥ//
parivāraparityaktaistasminkṣetre cacāra saḥ

te'pi sarve mahātmānaḥ kṣatriyāstatra saṃsthitāḥ //
cakrurdharmakriyāḥ sarvāḥ śraddhāpūtena cetasā

snānaṃ cakrurvidhānena tīrtheṣu dvijasattamāḥ //
bhrāṃtvābhrāṃtvā supuṇyeṣu śrutvāśrutvā dvijanmanām

dānāni ca viśiṣṭāni daduriṣṭāni cāpare //
dīnebhyaḥ kṛpaṇebhyaśca tapasvibhyo viśeṣataḥ

cakruḥ śrāddhakriyāścānye pitṝnuddiśya bhaktitaḥ //
pitṝṇāṃ tarpaṇaṃ cānye tilamiśra jalena ca

anye homakriyā bhūpā japamanye nirargalam //
svādhyāyamapare śāntāḥ samyakchraddhāsamanvitāḥ

devatāyatanānyanye māhātmyasahitāni ca //
śrutvā pūrvanṛpāṇāṃ ca pūjayaṃti viśeṣataḥ

balidānaiḥ suvastraiśca gandhapuṣpopalepanaiḥ //
mārjanaidhvajadānaiśca tathā prekṣaṇakaiḥ śubhaiḥ

maṃḍanaiḥ puṣpamālābhiḥ samaṃtāddvijasattamāḥ //
hastyaśvarathadānaiśca gorbhirvastraiśca kāṃcanaiḥ //
kṛtārthā brāhmaṇāḥ sarve kṛtāstai statra bhaktitaḥ

evaṃ snātvā tathā'bhyarcya devānviprānnṛpottamāḥ //
dhṛtarāṣṭrasamāyuktā jagmuḥ svaśibiraṃ tataḥ

śaṃsanto vismayā viṣṭāstīrthānyāyatanāni ca //
tasminkṣetre dvijāṃścaiva tāpasānsaṃśitavratān

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṃḍe śrīhāṭakeśvarakṣetramāhātmye dhṛtarāṣṭrādikṛtahāṭakeśvarakṣetradarśanavarṇanaṃnāma dvisaptatitamo'dhyāyaḥ