Skanda Purana · Chapter 6.71

// sūta uvāca // //
tāstatheti pratijñāya cakrustacchakraśāsanam //
sūtikāgṛhadharme yattaccakrustasya sarvaśaḥ

athānyadivase bālo dvādaśārkasamadyutiḥ //
saṃjajñe tena vīryeṇa dvibhujaika mukhaḥ śubhaḥ

yathāsau jātamātrastu praruroda suduḥkhitaḥ //
tacchrutvā ruditaṃ sarvāḥ kṛttikāstamupāgatāḥ

mahāseno'pi saṃvīkṣya mātṝstāḥ samupāgatāḥ//
sotkaṇṭhaḥ ṣaṇmukho jāto dvādaśākṣabhujastathā

ekaikasyāḥ pṛthaktena prapapau prayataḥ stanam //
dvābhyāmāliṃgayāmāsa bhujābhyāṃ snehapūrvakam

etasminnaṃtare prāptā brahmaviṣṇuśivādayaḥ //
sarve devāḥ sahendreṇa gandharvāpsarasastathā

mahotsavo'tha saṃjajñe tasminsthāne nirargalaḥ //
gītavādyapraṇādena yenaviśvaṃ prapūritam

raṃbhādyā nanṛtustasya vilāsinyo divaukasām //
jaguśca mukhyagandharvā ścitrāṃgadamukhāśca ye

tatastu devatāḥ sarvāstasya nāma pracakrire //
skandanādretaso bhūmau skanda ityeva sādaram

atha tasya kumā rasya tadā tatrābhiṣecanam //
senāpatyaṃ kṛtaṃ sākṣāddevānāṃ śaṃbhunā svayam

tasya śaktiḥ svayaṃ dattā vidhinā'dbhutadarśanā //
amoghā vijayārthāya daityapakṣakṣayāya ca

mayūro vāhanārthāya tryaṃbakeṇa suśīghrataḥ //
divyāstrāṇi mahendreṇa viṣṇunātha mahātmanā

tato'bhīṣṭāni śastrāṇi devaiḥ sarvaiḥ pṛthakpṛthak //
tasya dattāni saṃtuṣṭaistathā mātṛgaṇairapi

tatastamagrataḥ kṛtvā senānāthaṃ sureśvarāḥ //
jagmuḥ sasainikāstatra tārako yatra saṃsthitaḥ

tārako'pi samālokya devānsvayamupāgatān //
yuddhārthaṃ harṣasaṃyuktaḥ sammukhaḥ satvaraṃ yayau

tato'bhūtsumahadyuddhaṃ devānāṃ dānavaiḥ saha //
kopasaṃraktanetrāṇāṃ mṛtyuṃ kṛtvā nivartanam

atha skandena saṃvīkṣya dūrasthaṃ tārakaṃ raṇe //
samāhūya tato muktā sā śaktistasya mṛtyave

athāsau hṛdayaṃ bhittvā tasya daityasya dāruṇā //
camatkārapuropāṃte patitā rudhirokṣitā

tārakastu gato nāśaṃ muktaḥ prāṇaiśca tatkṣaṇāt //
tato devagaṇāḥ sarve saṃhṛṣṭāstaṃ mahābalam

stotrairbahuvidhaiḥ stutvā procustasminhate sati //
gatāśca tridivaṃ tūrṇaṃ saha śakreṇa nirbhayāḥ /१ ६.७१.२० //
skando'pi tāṃ samādāya śaktiṃ tatra purottame //
sthāpayāmāsa yenaiva raktaśṛṃgo'bhavaddṛḍhaḥ //

ṛṣaya ūcuḥ // //
raktaśṛṃgaḥ kathaṃ tena niścalo'pi dṛḍhīkṛtaḥ //
kasya vākyena no brūhi vistareṇa mahāmate

// sūta uvāca // //
yadā vai bhūmikampastu saṃprajātaḥ sudāruṇaḥ //
raktaśṛṅgaḥ pracalitaḥ svasthānādativegataḥ

tasya daityasya pātena yathānye parva tottamāḥ //
atha harmyāṇi sarvāṇi camatkārapure tadā

śīrṇāni calite tasminparvate vyathitā dvijāḥ //
prāyaśo nidhanaṃ prāptāstathā'nye mūrchayārditāḥ

hataśeṣāstato viprā gatvā skandaṃ krudhānvitāḥ //
procuśca kimidaṃ pāpa tvayā kṛtamabuddhinā

nāśaṃ nītā vayaṃ sarve saputrapaśubādhavāḥ //
tasmācchāpaṃ pradāsyāmo vayaṃ duḥkhena duḥkhitāḥ

// skanda uvāca // //
hitāya sarvalokānāṃ mayaitatsamanuṣṭhitam //
yaddhato dānavo raudro nānyathā dvijasattamāḥ

prasādaḥ kriyatāṃ tasmānmānyā me brāhmaṇāḥ sadā //
mṛtānapi dvijānsarvānahaṃ tānamṛtāśrayāt

punarjīvitasaṃyuktānkariṣyāmi na saṃśayaḥ //
tathā suniścalaṃ śailaṃ kariṣyāmi svaśaktitaḥ

evamuktvā samādāya tāṃ śaktiṃ rudhirokṣitām //
cakre sthāpanamasyāstu raktaśṛṅgasya mūrdhani

tataḥ provāca saṃhṛṣṭo devatānāṃ catuṣṭayam //
āṃbavṛddhāṃ tathaivāmrāṃ māhitthāṃ ca camatkarīm

yuṣmābhirniścalaḥ kāryo bhūyo'yaṃ nagasattamaḥ //
pralaye'pi yathā sthānādraktaśṛṅgaścalennahi

sadaiva khyātimāyātu mannāmnā puramuttamam

yuṣmākaṃ brāhmaṇāḥ sarve pūjāṃ dāsyaṃti sarvadā

bāḍhamityeva tāḥ procya caturdikṣu tataśca tam//
śūlāgraiḥ sudṛḍhaṃ cakruḥ skandavākyena harṣitāḥ//
tataścāmṛtamādāya mṛtānapi dvijottamān//
skando jīvāpayāmāsa dvijabhaktiparāyaṇaḥ

tataste brāhmaṇāstatra saṃhṛṣṭā varamuttamam //
dadustasya sa ca prāha mannāmaitatpurottamam //
sadaiva khyātimāyātu etanme hṛdi vāṃchitam

// ṛṣaya ūcuḥ // //
etatskandapuraṃnāma tava nāmnā bhaviṣyati //
camatkārapuraṃ tadvatsāṃprataṃ surasattama

pūjāṃ tava kariṣyāmaḥ kṛtvā prāsādamutta mam //
tathaiva devatāḥ sarvāścatasro'pi tvayā dhṛtāḥ

sarvāḥ saṃpūjayiṣyāmaḥ sarvakṛtyeṣu sādaram//
etāṃ caṃ tāvakīṃ śaktiṃ sadā suravarottama //
viśeṣātpūjayiṣyāmaḥ ṣaṣṭhyāṃ śraddhāsamanvitāḥ

// sūta uvāca // //
evaṃ sa brāhmaṇaiḥ prokto mahāseno mahābalaḥ //
sthitastatraiva tadvā kyājjñātvā tatkṣetramuttamam

yastaṃ pūjayate bhaktyā caitraṣaṣṭhyāṃ subhāvataḥ //
śuklāyāṃ tasya saṃtuṣṭiṃ kurute barhivāhanaḥ

tasyāṃ śaktau naro yaśca kuryātpṛṣṭhinigharṣaṇam//
pūjayitvā tu puṣpādyaiḥ samyakchraddhāsamanvitaḥ //
sa na syādrogasaṃyukto yāvatsaṃvatsaraṃ dvijāḥ

evaṃ tatra dhṛtā śaktistena skandena dhīmatā //
raktaśṛṃgasya rakṣārthaṃ tatpurasya viśeṣataḥ

iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye skandasthāpitaśaktimāhātmyavarṇanaṃnāmaikasaptatitamo'dhyāyaḥ