Skanda Purana · Chapter 6.7

// sūta uvāca // //
evaṃ dhyāyamānena jalamāviśya kāmyayā //
sṛṣṭaṃ saṃdhyādvayaṃ tacca dṛśyate'dyāpi vai dvijāḥ

tato devagaṇāḥ sarve sṛṣṭāstena mahātmanā //
vaimānikāśca ye kecinnakṣatrāṇi grahāstathā

manuṣyoragarakṣāṃsi vīrudho vṛkṣasaṃyutāḥ //
saptarṣayo dhruvādyāśca ye cānye gaganecarāḥ

evaṃ hi bhagavānsṛṣṭvā viśvāmitraḥ sa manyumān //
svakīyeṣvatha kṛtyeṣu yojayāmāsa tāṃstataḥ

etasminneva kāle tu dvau sūryo yugapaddivi //
uditau rātrināthau ca jātāśca dviguṇā grahāḥ //
dviguṇāni ca bhānyeva saha saptarṣibhirdvijāḥ

evaṃ viyati te sarve sparddhamānāḥ parasparam //
dṛśyaṃte dviguṇībhūtā janavibhramakārakāḥ

etasminnantare śakraḥ saha sarverdivālayaiḥ //
jagāma tatra yatrāste bhagavānkamalāsanaḥ // ७
provācātha praṇamyoccaiḥ kṛtāṃjalipuṭaḥ sthitaḥ //
stutiṃ kṛtvā suraiḥ sārdhaṃ vedoktaiḥ stavanairdvijāḥ

sṛṣṭiḥ kṛtā suraśreṣṭha viśvāmitreṇa sāṃpratam //
manuṣyayakṣasarpāṇāṃ devagaṃdharvarakṣasām

tasmādvāraya taṃ gatvā svayameva pitāmaha //
yāvanna vyāpyate sarvaṃ tatsaṣṭyedaṃ carācaram // १०
tasya tadvacanaṃ śrutvā tenaiva sahito vidhiḥ //
gatvovāca jaganmitraṃ viśvāmitraṃ munīśvaram

nivṛttiṃ kuru viprarṣe sāṃprataṃ vacanānmama //
sṛṣṭairyāvanna naśyaṃti sarve devāḥ savāsavāḥ

//
viśvāmitra uvāca // //
anenaiva śarīreṇa triśaṃkurnṛpasattamaḥ//
yadi gacchati te loke tatsṛṣṭiṃ na karomyaham

// brahmovāca // //
eṣa gacchatu bhūpālo mayā saha triviṣṭapam //
anenaiva śarīreṇa tvatprasādānmunīśvara // १४
virāmaṃ kuru sṛṣṭestvaṃ naitadanyaḥ kariṣyati //
na kṛtaṃ kenacilloke tatkarma bhavatā kṛtam

// viśvāmitra uvāca // //
yanmayā kopayuktena kṛteyaṃ sṛṣṭirabjaja //
tatkṣatavyaṃ tvayā deva sarvalokapitāmaha ///६//
tathā'kṣayāstu me deva sṛṣṭistava prasādataḥ //
yā kṛtā na kariṣyāmi bhūyo 'nyāṃ padmasaṃbhava

// vrahmovāca // //
bhaviṣyati dhruvā vipra sṛṣṭiryā bhavatā kṛtā //
paraṃ sarveṣu kṛtyeṣu yajñārhā na bhaviṣyati

???
evamuktvā samādāya triśaṃkuṃ prapitāmahaḥ //
brahmalokaṃ gato hṛṣṭo munistatraiva saṃsthitaḥ

iti skānde mahāpurāṇa ekāśītisāhasryāṃ saṃhitāyāṃ ṣaṣṭhenāgarakhaṃḍe hāṭakeśvarakṣetramāhātmye triśaṃkūpākhyāne triśaṃkusvargaprāptivarṇanaṃnāma saptamo'dhyāyaḥ