Skanda Purana · Chapter 6.6

sūta uvāca/
tacchrutvā vacanaṃ tasya triśaṃkormunipuṃgavaḥ/
viśvāmitro'bravīdvākyaṃ kiṃcillajjāsamanvitaḥ

mā viṣādaṃ mahīpāla viṣaye'tra kariṣyasi/
anenaiva śarīreṇa tvāṃ nayiṣyāmyahaṃ divam

tattatkarma kariṣyāmi svargārthe nṛpasattama/
tavābhīṣṭaṃ kariṣyāmi kiṃ vā yāsyāmi saṃkṣayam

evamuktvā paraṃ kopaṃ kṛtvopari divaukasām/
uvāca ca tato raudraṃ pratyakṣaṃ tasya bhūpateḥ

yathā mayā dvijatvaṃ hi svayamevārjitaṃ balāt/
tathā sṛṣṭiṃ kariṣyāmi svakīyāṃ nātra saṃśayaḥ

tatastaṃ sa samālokya śaṃkaraṃ śaśiśekharam/
praṇamya vidhivadbhaktyā stutiṃ cakre mahāmuniḥ

viśvāmitra uvāca/
jaya deva jayāciṃtya jaya pārvativallabha/
jaya kṛṣṇa jagannātha jaya kṛṣṇa jagadguro

jayāciṃtya jayāmeya jayānaṃta jayācyuta/
jayāmara jayājeya jayāvyaya sureśvara

jaya sarvaga sarveśa jaya sarvasurāśraya/
jaya sarvajanadhyeya jaya sarvāghanāśana

tvaṃ dhātā ca vidhātā ca tvaṃ kartā tvaṃ ca rakṣakaḥ/
caturvidhasya deveśa bhūtagrāmasya śaṃkara

yathā tilasthitaṃ tailaṃ yathā dadhigataṃ ghṛtam/
tathaivādhiṣṭhitaṃ kṛtsnaṃ tvayā guptena vai jagat

tvaṃ brahmā tvaṃ hṛṣīkeśastvaṃ śakrastvaṃ hutāśanaḥ/
tvaṃ yajñastvaṃ vaṣaṭkārastvamindustvaṃ divākaraḥ

athavā bahunoktena kiṃ stavena tava prabho/
samāsādeva vakṣyāmi vibhūtiṃ śrutinoditām

yatkiṃcittriṣu lokeṣu sthāvaraṃ jaṃgamaṃ vibho/
tatsarvaṃ bhavatā vyāptaṃ kāṣṭhaṃ havyabhujā yathā

śrībhagavānuvāca/
parituṣṭo'smi bhadraṃ te varaṃ prārthaya sanmune/
yatte hṛdi sthitaṃ nityaṃ sarvaṃ dāsyāmyasaṃśayam

viśvāmitra uvāca/
yadi tuṣṭosi deveśa yadi deyo varo mama/
tanme syātsṛṣṭimāhātmyaṃ tvatprasādānmaheśvara

evamastviti taṃ coktvā bhagavānvṛṣabhadhvajaḥ/
sarvairgaṇaiḥ samāyuktastataścādarśanaṃ gataḥ

viśvāmitro'pi tatraiva sthito dhyānaparāyaṇaḥ/
cakre caturvidhāṃ sṛṣṭiṃ sparddhayā haṃsagāminaḥ

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvakṣetramāhātmye triśaṃkūpākhyāne viśvāmitravaralabdhirnāma ṣaṣṭho'dhyāyaḥ