Skanda Purana · Chapter 6.69

// sūta uvāca // //
tato niḥkṣatriye loke kṣattriṇyo vaṃśakāraṇāt //
kṣetrajānbrāhmaṇebhyaśca suṣuvustanayā nvarān/////
te vṛddhiṃ ca samāsādya kṣetrajāḥ kṣatriyopamāḥ //
jagṛhurmedinīṃ vīryātsaṃnirasya dvijottamān

tataste brāhmaṇāḥ sarve paribhūtipadaṃ gatāḥ//
procurbhārgavamabhyetya duḥkhena mahatānvitāḥ

rāmarāma mahābāho yā tvayā vasudhā ca naḥ //
vājimedhe makhe dattā kṣatriyaiḥ sā hatā balāt//
tasmānno dehi tāṃ bhūyo hatvā tānkṣatriyādhamān //
kuru śreyo'bhivṛddhiṃ tāṃ yadyasti tava pauruṣam

tato rāmaḥ krudhāviṣṭo bhūyastaiḥ śavaraiḥ saha //
pulindairmedakaiścaiva kṣatriyāṃtāya niryayau

tatraiva kṣatriyānhatvā raktamādāya tadbahu //
tāṃ gartāṃ pūrayāmāsa cakāra pitṛtarpaṇam

pradadau brāhmaṇebhyaśca vājimedhe dharāṃ punaḥ //
taiśca nirvāsitastatra jagāmodadhisaṃnidhau

evaṃ tena kṛtā pṛthvī sarvakṣattravivarjitā //
triḥsaptavāraṃ vipreṃdrā dvijebhyaśca niveditā

tarpitāḥ pitaraścaiva rudhireṇa mahātmanā //
pratijñā pālitā tasmādvikopaśca babhūva saḥ

ekaviṃśatime prāpte tataśca pitṛtarpaṇe //
aśarīrā'bhavadvāṇī khasthā pitṛsamudbhavā

rāmarāma mahābhāga tyajaitatkarma garhitam //
vayaṃ te tuṣṭimāpannāḥ svavākyaparipāla nāt

yattvayā vihitaṃ karma naitadanyaḥ kariṣyati //
na kṛtaṃ kenacitpūrvaṃ pitṛvairasamudbhavam

tasmāttuṣṭā vayaṃ vatsa dāsyāmaścitta vāṃchitam/
prārthayasva drutaṃ tasmāddurlabhaṃ tridaśairapi

rāma uvāca/
pitaro yadi tuṣṭā me yacchaṃti yadi vāṃchitam/
tasmāttīrthamidaṃ puṇyaṃ mannāmnā lokaviśrutam/
raktadoṣavinirmuktaṃ sevitaṃ varatāpasaiḥ

pitara ūcuḥ/
pitṛtarpaṇajā gartā tvayā yeyaṃ vinirmitā/
rāmahrada iti khyātiṃ prayāsyati jagattraye

yatra bhaktiyutā lokāstarpayiṣyaṃti vai pitṝn //
te'śvamedhaphalaṃ prāpya prayāsyaṃti parāṃ gatim///१७//
kṛṣṇapakṣe caturdaśyāṃ māsi bhādrapade naraḥ//
kariṣyati ca yaḥ śrāddhaṃ bhaktyā śastrahatasya ca///१८//
api pretatvamāpannaṃ narake vā samāśritam//
uddhariṣyati sa pretamapi pāpasamanvitam///१९//
sūta uvāca//
evamuktvā tu rāmaṃ te viremustadanaṃtaram//
rāmo'pi ca tapastepe tatraiva krodhavarjitaḥ

tasmātsarvaprayatnena tatra śastrahatasya ca//
tasmindine prakartavyaṃ śrāddhaṃ śraddhāsamanvitaiḥ

/
upasarga mṛtānāṃ ca sarpāgniviṣabandhanaiḥ//
tatra muktipradaṃ śrāddhaṃ dine tasminnudāhṛtam

yaḥ pitṝṃstarpayettatra pretapakṣe jalairapi//
sa teṣāmanṛṇo bhūtvā pitṛloke mahīyate

etadvaḥ sarvamākhyātaṃ rāmahradasamudbhavam//
māhātmyaṃ brāhmaṇaśreṣṭhāḥ sarvapātakanāśanam

śrāddhakāle naro bhaktyā yaścaitatpaṭhati svayam//
sa gayāśrāddhajaṃ kṛtsnaṃ phalamāpnotyasaṃśayam

parvakāle 'thavā prāpte paṭhedbrāhmaṇasaṃnidhau//
pitṛmedhasya yajñasya sa phalaṃ labhate 'khilam

śṛṇuyādvāpi yo bhaktyā kīrtyamānamidaṃ naraḥ//
sautrāmaṇau kṛte kṛtsnaṃ phalamāpnotyasaṃśayam

iti śrīskāṃde mahāpurāṇa ekāśītisāhasryā saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye rāmahradotpattivṛttāntavarṇanaṃnāmaikonasaptatitamo' dhyāyaḥ