Skanda Purana · Chapter 6.68

// sūta uvāca // //
atha te śabarā yatnādraktaṃ taddhaihayodbhavam //
tatra ninyuḥ sthitā yatra gartā sā pitṛsaṃbhavā

bhārgavo'pi ca taṃ hatvā raktamādāya kṛtsnaśaḥ //
tataḥ saṃpreṣayāmāsa yatra gartā'tha paitṛkī

na sa bālaṃ na vṛddhaṃ ca parityajati bhārgavaḥ //
yauvanasthaṃ viśeṣeṇa garbhasthaṃ vātha kṣatriyam

svayaṃ jaghāna bhūpānsa teṣāṃ pārśve tathā parān //
vidhvaṃsāyayati kruddhaḥ sainikaiśca samantataḥ

tathaivāsṛkpragṛhṇāti gṛhṇāpayati cādarāt //
teṣāṃ pārśvaistatastūrṇaṃ preṣayāmāsa tatra ca

evaṃ niḥkṣatriyāṃ kṛtvā kṛtsnāṃ pṛthvīṃ bhṛgadvahaḥ //
hāṭakeśvaraje kṣetre jagāma tadanantaram

tatastai rudhiraiḥ snātvā samādāya tilānbahūn //
apasavyaṃ samādhāya pracakre pitṛtarpaṇam

pratyakṣaṃ sarvaviprāṇāṃ tathānyeṣāṃ tapasvinām //
pratijñāṃ pūrayitvā'tha viśokaḥ sa babhūva ha

tato niḥkṣatriye loke kṛtvā hayamakhaṃ ca saḥ //
prāyacchatsakalāmurvīṃ brāhmaṇebhyaśca dakṣiṇām

atha labdhavarā viprāstamūcurbhṛgusattamam //
nāsmadbhūmau tvayā stheyameko rājā yataḥ smṛtaḥ

so'pi bāḍhamiti procya harṣeṇa mahatānvitaḥ //
mahīparyaṃtamāsādya provācātha nadīpatim //////
āropya sumahaccāpamāgneyāstraṃ prayujya ca //
triśikhāṃ bhrukuṭīṃ kṛtvā kopena mahatānvitaḥ ///२//
// rāma uvāca // //
mayā niḥkṣatriyā bhūmiḥ kṛtā śailavanānvitā //
brāhmaṇebhyastato dattā vājimedhe mahāmakhe ///३//
tasmāttvaṃ dehi me sthānaṃ kṛtvā'pasaraṇaṃ svayam//
na hi dattvā grahī ṣyāmi viprebhyo medinīṃ punaḥ

na karoṣyathavā vākyaṃ mamādya tvaṃ nadīpate //
sthalarūpaṃ kariṣyāmi vahnyastrapariśoṣitam

// sūta uvāca // //
tasya tadvacanaṃ śrutvā samudro bhayasaṃkulaḥ //
apasāraṃ tataścakre yāvattasyābhivāṃchitam

tataścakāra tatraiva vasatiṃ sa bhṛgūdvahaḥ //
tapaścaryāsamāyuktaḥ piturvadhamanusmaran///७//
tataḥ sarvānpulindāṃśca śavarānmedasaṃyutān //
bhūmyante dhārayāmāsa parvateṣu sa bhārgavaḥ ///८//
iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye paraśurāmakṛtamahīdānapūrvakasamudrāpasāraṇavṛttāntavarṇanaṃnāmā ṣṭāṣaṣṭitamo'dhyāyaḥ