Skanda Purana · Chapter 6.67

// sūta uvāca // //
etasminnaṃtare prāpto rāmo bhrātṛbhiranvitaḥ //
phalāni kandamūlāni gṛhītvā''śramasammukhaḥ

sa dṛṣṭvā svāśramaṃ dhvastaṃ pulindairbahuśo vṛtam //
lakuṭāśmaprahāraistu tāṃ dhenuṃ jarjarīkṛtām

papraccha kimidaṃ sarvaṃ vyākulatvamupāgatam //
āśramāspadamābhīraiḥ pulindaiśca samāvṛtam

kenaiṣā māmikā dhenuḥ prahārairjarjarīkṛtā //
tāpasyastāpasāḥ sarve kasmādete rudanti ca

kva sa me'dya pitā vṛddho mātā ca sutavatsalā //
na māmadya yathāpūrvaṃ snehāccāyāti sammukhī

atha tasya samācakhyurvṛttāṃtaṃ sarvatāpasāḥ //
yathādṛṣṭaṃ suduḥkhārtā sahasrārjunaceṣṭitam

tataste bhrātaraḥ sarve vajrapātopamaṃ vacaḥ //
śrutvā dṛṣṭvā ca taṃ śastraiḥ khaṃḍitaṃ janakaṃ nijam

mātaraṃ kṣatasarvāṅgīṃ prāṇaśeṣāṃ vyathānvitām//
ruruduḥ śokasantaptā muktvā rāmaṃ mahābalam

ruditvātha ciraṃ kālaṃ vipralapya muhurmuhuḥ //
antyeṣṭiṃ cakrire tasya vedoktavidhinā tataḥ

atha dāhāvasāne te kṛtvā gartāṃ yathocitām//
muktvā rāmaṃ dadustoyaṃ pituḥ putrāstilānvitam

athānyaistāpasaiḥ prokto rāmaḥ śastrabhṛtāṃ varaḥ //
na prayacchasi kasmāttvaṃ pretapitre jalāṃjalim

athāsau bahudhā pro ktastāpasairjamadagnijaḥ //
prahārāngaṇayanmātuḥ śitaśastravinirmitān

tatastānabravīdrāmo viniḥśvasya munīśvarān //
niṣedhastoyadānasya śrūyatāṃ yanmayā kṛtaḥ

aparādhaṃ vinā tātaḥ kṣatriyeṇa hatomama //
ekaviṃśatiḥ prahārāṇāṃ māturaṃge sthitā mama

tasmānniḥkṣatriyāmurvīṃ yadyahaṃ na karomi vai //
prahārasaṃkhyayā viprāstanme syātsarvapātakam

pitṛmātṛvadhājjātaṃ yatkṛtaṃ tena pāpmanā //
kṣatriyāpasadenātra tathānyadapi kutsitam

tatastasyaiva cānyeṣāṃ kṣatriyāṇāṃ durātmanām //
rudhiraiḥ pūrayitvemāṃ gartāṃ pitṛjalocitām //
tarpayiṣyāmi raktena pitaraṃ nāhamaṃbhasā

// sūta uvāca // //
śrutvā te dāruṇāṃ tasya pratijñāṃ tāpasottamāḥ //
paraṃ vismayamāpannā nocuḥ kiṃcittataḥ param

athāśaucāṃtamāsādya rāmaḥ krodhasamanvitaḥ //
tīkṣṇaṃ paraśumādāya māhiṣmatyunmukhaṃ yayau

sarvaistaiḥ śabaraiḥ sārdhaṃ pulindairmedakaistathā //
baddhagodhāṃgulitrāṇairvarabāṇadhanurdharaiḥ

tathā'rjuno'pi taṃ śrutvā samāyātaṃ bhṛgūttamam //
sainyena mahatā yuktaṃ pratijñādhāriṇaṃ tathā

tatastu sammukho dṛṣṭo yuddhārthaṃ sa viniryayau //
sārdhaṃ nānāvidhairyodhaiḥ sarvairdevāsuropamaiḥ

athābhavanmahāyuddhaṃ pulindānāṃ dvijottamāḥ //
haihayādhipateryodhaiḥ sārdhaṃ devāsuropamaiḥ

tataste haihayāḥ sarve śarairāśīviṣopamaiḥ //
vadhyante śabaraiḥ saṃkhye garjamānairmuhurmuhuḥ

brahmahatyāsamutthena pātakena tataśca te //
jātā nistejasaḥ sarve prapataṃti dharātale

na kaścitpauruṣaṃ tatra saṃpradarśayituṃ kṣamaḥ //
palāyanaparā sarve vadhyante niśitaiḥ śaraiḥ

atha bhagnaṃ balaṃ dṛṣṭvā haihayādhipatiḥ krudhā //
svacāpaṃ vāñchayāmāsa sajyaṃ kartuṃ tvarānvitaḥ //
śaknoti nāropayituṃ suyatnamapi cāśritaḥ

tataścākarṣayāmāsa khaṅgaṃ kośātsunirmalam //
ākraṣṭuṃ na ca śakroti vailakṣyaṃ paramaṃ gataḥ

gadayā nirjito raudro rāvaṇo lokarāvaṇaḥ //
yayā sāpyapataddhastāttatkṣaṇātpṛthivītale

narmadāyāḥ pravāho yaiḥ sahasrākhyaiḥ karaiḥ śubhaiḥ //
vidhṛtastena te sarve babhūvuḥ kampavihvalāḥ

na śastraṃ śekuruddhartuṃ daivayogātkathaṃcana //
divyāstrāṇāṃ tathā sarve mantrā vismṛtimāgatāḥ

etasminnaṃtare rāmaḥ saṃprāptaḥ krodhamūrchitaḥ //
tīkṣṇaṃ paraśumudyamya tatastaṃ prāha niṣṭhuram

haihayādhipate pāpa yaiḥ karairjanako mama //
tvayā vinihatastānme śīghraṃ darśaya sāṃpratam

brahmatejohataḥ so'pi proktastena suniṣṭhuram //
novāca cottaraṃ kiṃcidālekhye likhito yathā

tato bhujavanaṃ tasya rāmaḥ śastrabhṛtāṃ varaḥ //
muhurmuhurvinirbhartsya pracakarta śanaiḥśanaiḥ

tataśchittvā śirastasya kuṭhāreṇa bhṛgūdvahaḥ //
jagrāha rudhiraṃ yatnātprahārebhyaḥ svayaṃ dvijāḥ

pūrayitvā mahākumbhāñchabarebhyo dadau tataḥ //
mlecchebhyo lubdhakebhyaśca tataḥ provāca sādaram

hāṭakeśvaraje kṣetre gartā me bhrātṛbhiḥ kṛtā //
pitṛsaṃtarpaṇārthāya salilena pariplutā

prakṣipadhvaṃ drutaṃ gatvā tasyāṃ raktamidaṃ mahat //
pāpasyāsya sapatnasya mamādeśādasaṃśayam

yena tātaṃ nijaṃ bhaktyā tarpayitvā vidhānataḥ //
ṛṇasya muktirbhavati yena me paitṛkasyaca

iti śrīskāṃde mahāpurāṇa ekāśātisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye sahasrārjunavadhavarṇanaṃnāma saptaṣaṣṭitamo' dhyāyaḥ