Skanda Purana · Chapter 6.64

// sūta uvāca // //
camatkārī purā devī tatraivāsti dvijottamāḥ //
camatkāranareṃdreṇa sthāpitā śraddhayā purā

yayā sa mahiṣaḥ pūrvaṃ nihato dānavo raṇe //
kaumāravratadhāriṇyā māyāśatasahasradhṛk

yadā tannirmitaṃ tatra puraṃ tena mahātmanā //
tasya saṃrakṣaṇārthāya tadā sā sthāpitā dvijāḥ

purasya tasya rakṣārthaṃ tathā tatpuravāsinām //
sarveṣāṃ brāhmaṇeṃdrāṇāṃ bhaktyā bhāvitacetasām

yastāmabhyarcayetsamyaṅmahānavamivāsare //
kṛtsnaṃ saṃvatsaraṃ tasya na bhayaṃ jāyate kvacit

bhūtapretapiśācebhyaḥ śatrutaśca viśeṣataḥ //
rogebhyastaskarebhyaśca duṣṭebhyo'nyebhya eva ca

yaṃyaṃ kāmamabhidhyāyañchuklāṣṭamyāṃ naraḥ śuciḥ //
tāṃ pūjayati sadbhaktyā sa tamāpnotyasaṃśayam

niṣkāmaḥ sukhamāpnoti mokṣaṃ nāstyatra saṃśayaḥ //
tasyā devyāḥ prasādena satyametanmayoditam

tāmārādhya gatāḥ pūrvaṃ siddhiṃ bhūrirmahībhujaḥ //
brāhmaṇāśca tathānye'pi yoginaḥ parameśvarīm

yastasyāḥ śraddhayopetaḥ prakaroti pradakṣiṇām //
nityaṃ saṃvatsaraṃ yāvattiryagyonau na sa vrajet

tasyā āyatane pūrvamāścaryamabhavanmahat //
yattadvaḥ kīrtayiṣyāmi śṛṇudhvaṃ susamāhitāḥ

āsīccitrarathonāma pūrvaṃ pārthivasattamaḥ //
daśārṇādhipatiḥ khyātaḥ sarvaśatrunibarhaṇaḥ

śuklāṣṭamyāṃ sadā bhaktyā sa tasyāḥ śraddhayānvitaḥ //
aṣṭottaraśataṃ yāvatpracakāra pradakṣiṇām

tataḥ praṇamya tāṃ devīṃ saṃprayāti punargṛham //
sainyena caturaṃgeṇa samaṃtātparivāritaḥ

evaṃ tasya nareṃdrasya pradakṣiṇaratasya ca //
jagāma sumahānkālo devyā bhaktiratasya ca

kasyacittvatha kālasya sa rājā tatra saṃgataḥ //
apaśyadbrāhmaṇaśreṣṭhāndevīgṛhasamāśritān

tataḥ pradakṣiṇāṃ kṛtvā tāṃ devīṃ sa mahīpatiḥ

agrasthāṃstāndvijānsarvānnamaścakre samāhitaḥ

tatastaiḥ sahitaistatra sahāsīnaḥ kathāḥ śubhāḥ //
rājarṣīṇāṃ purāṇānāṃ viprarṣīṇāṃ cakāra ha

tataḥ kasminkathāṃte sa pṛṣṭastairdvijasattamaiḥ //
kautūhalasamopetairvinayāvanataḥ sthitaḥ //

rājanpṛcchāmahe sarve tvāṃ vayaṃ kautukānvitāḥ //
tasmātkīrtaya cedguhyaṃ na tattava vyavasthitam

māsimāsi sadāṣṭamyāṃ tvaṃ śuklāyāṃ sudūrataḥ //
āgatya devatāyāśca prakaroṣi pradakṣiṇām

yatnenānyāḥ parityajya sarvāḥ pūjādikāḥ kriyāḥ //
nūnaṃ vetsi phalaṃ kṛtsnaṃ yatpradakṣiṇasaṃbhavam

// rājovāca // // satyametaddvijaśreṣṭhā yadbhavadbhirudāhṛtam //
rahasyamapi vaktavyaṃ yuṣmākaṃ sāṃprataṃ mayā

ahamāsa śukaḥ pūrvamasminnāyatane śubhe //
devyāḥ paścimadigbhāge kulāyakṛtasaṃśrayaḥ

tatra nirgacchato nityaṃ kurvataścapraveśanam //
pradakṣiṇābhavaddevyā nityameva dvijottamāḥ

tataḥ kālena me mṛtyuḥ saṃjāto'traiva maṃdire //
tatprabhāveṇa saṃjāto rājā jātismaro'tra hi //

etasmātkāraṇāddūrātsamabhyetya pradakṣiṇām //
karomyasyā dvijaśreṣṭhā devatāyāḥ samāhitaḥ

purā bhaktivihīnena kulāye vasatā mayā //
kṛtā pradakṣiṇā devyāstena jāto'smi bhūpatiḥ

adhunā śraddhayā yukto yatkaromi pradakṣiṇām //
kiṃ me bhaviṣyati śreyastanna vedmi dvijottamāḥ

// sūta uvāca // //
tacchrutvā tasya te viprā vismayotphullalocanāḥ //
sādhuvādaṃ tathā cakrustasya bhūpasya harṣitāḥ //

tataḥ sa pārthivaḥ sarvānpraṇamya dvijasattamān //
anujñāpya yayau tūrṇaṃ svagṛhāya sasainikaḥ

adhunā śraddhayā yukto yaḥ karoti pradakṣiṇām //
sarvapāpavinirmukto labhate vāṃchitaṃ phalam

tataḥ prabhṛti te viprāḥ sarve bhaktipuraḥsarāḥ //
tasyāḥ pradakṣiṇāṃ cakrustathānye muktihetave

prāptāśca paramāṃ siddhiṃ vāṃchitāṃ tatprabhāvataḥ //
iha loke pare caiva durlabhāṃ tridaśairapi

tasmātsarvaprayatnena tāṃ devīmiha saṃśrayet //
sarvakāmapradāṃ nṛṇāṃ tasminkṣetre vyavasthitām

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe śrīhāṭakeśvarakṣetramāhātmye camatkārīdurgāmāhātmyavarṇanaṃnāma catuḥṣaṣṭitamo'dhyāyaḥ