Skanda Purana · Chapter 6.61

// ṛṣaya ūcuḥ // //
śarmiṣṭhātīrthamityuktaṃ tvayā yacca mahāmate //
kathaṃ jātaṃ mahābhāga kiṃprabhāvaṃ tu tadvada

// sūta uvāca// //
āsīdrājā vṛkonāma somavaṃśa samudbhavaḥ //
brahmaṇyaśca śaraṇyaśca sarvalokahite rataḥ

tasya bhāryā'bhavatsādhvī prāṇebhyo'pi garīyasī //
sarvalakṣaṇasaṃpannā pativrataparāyaṇā //

atha tasyāṃ samutpannā prāpte vayasi paścime //
kanyakā divase prāpte sarvaśāstravigarhite

tata ānīya viprānsa jyotirjñānavicakṣaṇān //
papraccha kīdṛśī kanyā mameyaṃ saṃbhaviṣyati

// brāhmaṇā ūcuḥ // //
yā kanyā prāpnuyājjanma citrāsaṃsthe divākare //
caṃdre vāpi caturdaśyāṃ sā bhavedviṣakanyakā

yastasyāḥ pratigṛhṇāti pāṇiṃ pārthivasattama //
ṣaṇmāsābhyaṃtare mṛtyuṃ sa prāpnoti naro dhruvam

yasminsā jāyate harmye ṣaṇmāsābhyaṃtare ca tat //
karoti vibhavairhīnaṃ dhanadasyāpyasaṃśayam

seyaṃ tava sutā rājanyathoktā viṣa kanyakā //
paitṛkaṃ śvāśurīyaṃ ca haniṣyati gṛhadvayam

tasmādimāṃ parityajya sukhī bhava narādhipa //
śraddadhāsi vaco'smākaṃ hita muktaṃ yadi prabho

// rājovāca // //
tyakṣyāmi yadi nāmaitāṃ dhārayiṣyāmi vā gṛhe //
anyadehodbhavaṃ karma phaliṣyati tathāpi me

śubhaṃ vā yadi vā pāpaṃ na tu śakyaṃ prarakṣitum //
tasmātkarma puraskṛtya naiva tyakṣyāmi kanyakām

yenayena śarīreṇa yadyatkarma karoti yaḥ //
tenatenaiva bhūyaḥ sa prāpnoti sakalaṃ phalam

yasyāṃ yasyāmavasthāyāṃ kriyate'tra śubhāśubham //
tasyāṃ tasyāṃ dhruvaṃ tasya phalaṃ tadbhujyate naraiḥ

na naśyati purākarma kṛtaṃ sarveṃdriyairiha //
akṛtaṃ jāyate naiva tasmānnāsti bhayaṃ mama

āyuḥ karma ca vittaṃ ca vidyā nidhanameva ca //
pañcaitāni hi sṛjyante garbhasthasyaiva dehinaḥ

yathā vṛkṣeṣu vallīṣu kusumāni phalāni ca //
svakālaṃ nātivartaṃte tadvatkarma purākṛtam

yenaiva yadyathā pūrvaṃ kṛtaṃ karma śubhāśubham //
sa eva tattathā bhuṃkte nityaṃ vihitamātmanaḥ

yathā dhenusahasreṣu vatso vindati mātaram //
tathaivaṃ koṭimadhyasthaṃ kartāraṃ karma vindati

anyadehakṛtaṃ karma na kaścitpuruṣo bhuvi //
balena prajñayā vāpi samarthaḥ kartumanyathā

anyathā śāstragarbhiṇyā dhiyā dhīro mahīyate //
svāmivatprākkṛtaṃ karma vidadhāti tadanyathā

svakṛtānyupatiṣṭhaṃti sukhaduḥkhāni dehinām //
hetubhūto hi yasteṣāṃ so'haṃkāreṇa badhyate

suśīghramabhidhāvantaṃ nijaṃ karmānudhāvati //
śete saha śayānena tiṣṭhantamanutiṣṭhati

yathā chāyātapau nityaṃ susaṃbaddhau parasparam //
tathā karma ca kartā ca nātra kāryā vicāraṇā

yena yatropabhoktavyaṃ sukhaṃ vā duḥkhameva vā //
naraḥ sa baddho rajjveva balāttatraiva nīyate

pramāṇaṃ karmabhūtānāṃ sukhaduḥkhopapādane //
sāvadhānatayā yacca jāgratāṃ svapatāmapi

tailakṣaye yathā dīpo nirvāṇamadhigacchati //
karmakṣaye tathā jaṃturnirvāṇamadhigacchati

na mantrā na tapo dānaṃ na tīrthaṃ na ca saṃyamaḥ //
samarthā rakṣituṃ jaṃtuṃ pīḍitaṃ pūrvakarmabhiḥ

saṃgatyā jaṭhare nyasto retobinduracetanaḥ //
ṛtukāle manuṣyeṇa vṛddhiṃ gacchati karmataḥ

annapānāni jīryaṃti yatra bhakṣyaṃ ca bhakṣitam //
tasminnevodare garbhaḥ kathaṃ nāma na jīryati

tasmātkarmakṛtaṃ sarvaṃ dehināmatra jāyate //
śubhaṃ vā yadi vā pāpamiti me niścayaḥ sadā

arakṣitaṃ tiṣṭhati daivarakṣitaṃ surakṣitaṃ daivahataṃ vinaśyati //
jīvatyanātho'pi vane visarjitaḥ kṛtaprayatno'pi gṛhe na jīvati

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe śrīhāṭakeśvarakṣetramāhātmye viṣakanyakotpattivarṇanaṃnāmaikaṣaṣṭitamo'dhyāyaḥ