Skanda Purana · Chapter 6.60

// ṛṣaya ūcuḥ // //
māhittheyaṃ tvayākhyātā yā purā sūtanandana //
kena saṃsthāpitā tatra vada sarvamaśeṣataḥ

// sūta uvāca // //
śoṣaṇīnāma yā vidyā purāgastyena sādhitā //
ātharvaṇena mantreṇa svayaṃ ca parameśvarī //

tataḥ saṃśoṣitastena sa samudro mahātmanā //
mitrāvaruṇaputreṇa sā proktā purataḥ sthitā

māhitthaṃ sādhitaṃ yasmāttvayā me sakalaṃ śubham //
māhitthānāma tasmāttvaṃ devatā saṃbhaviṣyasi

camatkārapurakṣetre pūjāṃ prāpsyasyanuttamām //
yastvāmātharvaṇairmantraistatrasthāṃ bhaktisaṃyutaḥ

pūjayiṣyati vṛddhiṃ ca sarvakālamavāpsyati //
tasmāttatra drutaṃ gaccha mayā sārddhaṃ purottame

dvijānāṃ rakṣaṇārthāya nityaṃ saṃnihitā bhava //
evaṃ sā tatra saṃbhūtā māhitthā varadevatā

yayā'yaṃ calitaḥ śailaḥ svaśaktyā niścalīkṛtaḥ //
skandeneha dvijaśreṣṭhāḥ śaktyā viddhastadagrataḥ // //
narādityastataścānyo yo nareṇa pratiṣṭhitaḥ //
ṣaṣṭhyāṃ taṃ sūryavāreṇa dṛṣṭvā pāpātpramucyate

na śatrūṇāṃ parābhūtiṃ prayāsyati yathārjunaḥ //
rogī vimucyate rogāddaridro dhanamāpnuyāt

tathā govardhanadharaṃ tatra devaṃ janārdanam //
yaḥ paśyetkārtike śukle saṃprāpte prathame dine//
tasya gāvaḥ prabhūtāḥ syurnīrogā dvisattamāḥ

narasiṃhavapuḥ sākṣāttathā devo hariḥ svayam //
tathā vināyakastatra sarvakāmapradāyakaḥ //
sarvavighnaharaścaiva sthāpitaścārjunena hi

yastaṃ pūjayate bhaktyā caturthyāṃ modakāśanaiḥ //
sa sarvavighnanirmukto labhate vāṃchitaṃ phalam //
tatra sthito dvijeṃdrāṇāṃ hitāya dvijasattamāḥ ४१३ //
yastamātharvaṇairmaṃtraiḥ pūjayeddvādaśīdine //
kārtikasya site pakṣe sa yāti paramāṃ gatim

tathā tatra dvijaśreṣṭhā naranārāyaṇāvubhau //
devau paramatejasvī yastau paśyati bhaktitaḥ

pūjayecca dvijaśreṣṭhā dvādaśyā divase svayam //
sa yāti paramaṃ sthānaṃ jarāmaraṇavarjitam

tīrthayātrākṛtāraṃbhaḥ kuntīputro dhanaṃjayaḥ //
hāṭakeśvaraje kṣetre samāyāto dvijottamāḥ

dṛṣṭvā tatpāvanaṃ kṣetraṃ tīrthapūgaprapūritam//
ādityaṃ sthāpayāmāsa prāsāde sumanohare

naranārāyaṇau devau tasyāgre sthāpitau tataḥ //
tathā govardhanadharastatra devaḥ pratiṣṭhitaḥ

narasiṃhaṃ tathaivānyaṃ śraddhayā parayā yutaḥ //
evaṃ saṃsthāpya kauṃteyo devagṛhasupaṃcakam

tato viprānsamāhūya sarvāṃstānpurasaṃbhavān //
provāca praṇato bhaktyā dhanaṃ dattvā supuṣkalam

mayā saṃsthāpitaḥ sūryaḥ sarvarogakṣayāvahaḥ //
tathārpitaśca yuṣmākaṃ ciṃtanīyaṃ sadaiva tu

// viprā ūcuḥ // //
gaccha tvaṃ pāṃḍavaśreṣṭha suviśrabdhaḥ svamālayam //
vayaṃ sarve kariṣyāmastavaśreyo'bhivardhanam

tato'rjunaḥ prahṛṣṭātmā tebhyo dattvā dhanaṃ bahu//
tānāmaṃtrya namaskṛtya jagāma svapuraṃ prati

// sūta uvāca // //
etadvaḥ sarvamākhyātaṃ narādityasya saṃbhavam //
māhātmyaṃ brāhmaṇaśreṣṭhāḥ śṛṇvatāṃ pāpanāśanam

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye narādityamāhātmyavarṇanaṃnāma ṣaṣṭitamo'dhyāyaḥ