Skanda Purana · Chapter 6.59

// sūta uvāca // //
tasminkṣetre raviḥ pūrvaṃ vidureṇa pratiṣṭhitam //
śivaśca parayā bhaktyā tathā viṣṇurdvijottamāḥ

yastānpūjayate bhaktyā mānuṣo bhaktitastataḥ //
sa yāsyati paraṃ sthānaṃ yajñairapi sudurlabham

hastināpurasaṃsthena vidureṇa purā dvijāḥ //
gālavo muniśārdūlaḥ pṛṣṭaḥ svagṛhamāgataḥ

aputrasya gatirloke kīdṛksaṃjāyate pare //
etanme pṛcchato brūhi kṛtvā sadbhāvamuttamam

// gālava uvāca // //
aputrasya gatirnāsti mṛtaḥ svargaṃ na gacchati //
dvādaśānāmapi tathā yadyeko'pi na vidyate

aurasaḥ kṣetrajaścaiva krayakrītaśca pālitaḥ //
paunarbhavaḥ punardattaḥ kuṃḍo golastathā paraḥ //
kānīnaśca sahoḍhaśca aśvattho brahmavṛkṣakaḥ

eteṣāmapi yadyekaḥ puruṣāṇāṃ na jāyate //
tannūnaṃ narake vāsaḥ puṃsaṃjñe vai prajāyate

//
// sūta uvāca // //
tacchrutvā vacanaṃ tasya gālavasya mahātmanaḥ //
aputratvātparaṃ duḥkhaṃ jagāma vidurastadā

taptastaṃ gālavaḥ prāha mā tvaṃ duḥkhapadaṃ vraja //
madvākyātputrakaṃ vṛkṣaṃ viṣṇusaṃjñaṃ drutaṃ kuru

tasmātprāpsyasi niḥśeṣaṃ phalaṃ putrasamudbhavam //
gatvā puṇyatame deśe raktaśṛṃgasya mūrdhani

hāṭakeśvaraje kṣetre sarvavṛddhiśubhodaye //
tasya tadvacanaṃ śrutvā vidurastatkṣaṇādyayau

tatsthānaṃ gālavoddiṣṭaṃ harṣeṇa mahatānvitaḥ //
tatrāśvatthataruṃ sthāpya putratve cābhiṣecya ca

vaivāhikena vidhinā kṛtakṛtyo babhūva ha //
tato babhrāma tatkṣetraṃ tīrthayātrāparāyaṇaḥ

kīrtitāni vicitrāṇi rājarṣīṇāṃ mahātmanām //
śrutvā sthānāni gatvā ca dadarśa sthānadevatāḥ///४ //
sa dṛṣṭvā kuruvṛddhasya kīrtanāni mahātmanaḥ //
tataścakre matiṃ tatra divyaprāsādakarmaṇi

tato māheśvaraṃ liṃgaṃ vaṭādhastādvidhāya saḥ //
viṣṇuṃ ca sthāpayāmāsa aśvatthasya taroradhaḥ

niveśya ca tathā divyaṃ brāhmaṇebhyo nyavedayat //
etaddevatrayaṃ kṣetre yuṣmākaṃ hi mayā kṛtam //
bhavadbhiḥ sakalā cāsya cintākāryā sadaiva hi

// brāhmaṇā ūcuḥ // //
vayamasya kariṣyāmo yātrādyāḥ sakalāḥ kriyāḥ

tathā vaṃśodbhavā ye ca putrāḥ pautrāstathāpare //
kariṣyaṃti kriyāḥ sarvāstvaṃ gaccha svagṛhaṃ prati

tato jagāma viduraḥ svapuraṃ prati harṣitaḥ //
kṛtakṛtyo dvijāste ca cakrurvākyaṃ tadudbhavam

māghamāsasya saptamyāṃ sūryavāreṇa yo naraḥ //
pūjayedbhāskaraṃ tatra sa yāti paramāṃ gatim

śivaṃ vā somavāreṇa śuklāṣṭamyāṃ viśeṣataḥ //
śayane bodhane viṣṇuṃ samyakchraddhāsamanvitaḥ

tasmātsarvaprayatnena devānāṃ tattrayaṃ śubham //
pūjanīyaṃ viśeṣeṇa naraiḥ svargatimīpsubhiḥ

tatra siddhiṃ gatāḥ pūrvaṃ munayaḥ saṃśitavratāḥ //
vidureśvaramārādhya śataśo'tha sahasraśaḥ

tatastatsiddhidaṃ jñātvā liṃgaṃ vai pākaśāsanaḥ //
pāṃsubhiḥ pūrayāmāsa yathā kaścinna budhyate

kasyacittvatha kālasya vidurastatra cāgataḥ //
dṛṣṭvā lopagataṃ liṃgaṃ duḥkhena mahatānvitaḥ

etasminneva kāle tu vāguvācāśarīriṇī //
mā tvaṃ kuru viṣādaṃ hi liṃgārthe vidurādhunā

/
yo'yaṃ sa dṛśyate vālo vaṭastasya tale sthitā //
devadroṇiḥ sureśena pāṃsubhiḥ paripūritā

tato gajāhvayāttūrṇaṃ samānīya dhanaṃ bahu //
śodhayāmāsa tatsthānaṃ divārātramatandritaḥ

tato vilokya tāndevānharṣeṇa mahatānvitaḥ //
prāsādaṃ nirmame teṣāṃ yogyaṃ sādhvabhisaṃsthitam //

kailāsaśikharākāraṃ bhāskarārthe mahāmuniḥ //
jaṭāmadhyagataṃ dṛṣṭvā vaṭasya ca maheśvaram

prāsādaṃ nākarottatra liṃgaṃ yāvanna cālayet //
vāsudevasya yogyāṃ ca kṛtvā śālāṃ bṛhattarām

dattvā vṛttiṃ ca saṃhṛṣṭo brāhmaṇebhyo nivedya ca //
jagāma svāśramaṃ bhūyo viprānāmaṃtrya tāṃstataḥ

iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye vidurakṛtadevaprāsādavṛttānta varṇanaṃnāmaikonaṣaṣṭitamo'dhyāyaḥ