સ્કંદ પુરાણ · અધ્યાય 6.60

॥ ઋષય ઊચુઃ ॥ ॥
માહિત્થેયં ત્વયાખ્યાતા યા પુરા સૂતનન્દન ॥
કેન સંસ્થાપિતા તત્ર વદ સર્વમશેષતઃ

॥ સૂત ઉવાચ ॥ ॥
શોષણીનામ યા વિદ્યા પુરાગસ્ત્યેન સાધિતા ॥
આથર્વણેન મન્ત્રેણ સ્વયં ચ પરમેશ્વરી ॥

તતઃ સંશોષિતસ્તેન સ સમુદ્રો મહાત્મના ॥
મિત્રાવરુણપુત્રેણ સા પ્રોક્તા પુરતઃ સ્થિતા

માહિત્થં સાધિતં યસ્માત્ત્વયા મે સકલં શુભમ્ ॥
માહિત્થાનામ તસ્માત્ત્વં દેવતા સંભવિષ્યસિ

ચમત્કારપુરક્ષેત્રે પૂજાં પ્રાપ્સ્યસ્યનુત્તમામ્ ॥
યસ્ત્વામાથર્વણૈર્મન્ત્રૈસ્તત્રસ્થાં ભક્તિસંયુતઃ

પૂજયિષ્યતિ વૃદ્ધિં ચ સર્વકાલમવાપ્સ્યતિ ॥
તસ્માત્તત્ર દ્રુતં ગચ્છ મયા સાર્દ્ધં પુરોત્તમે

દ્વિજાનાં રક્ષણાર્થાય નિત્યં સંનિહિતા ભવ ॥
એવં સા તત્ર સંભૂતા માહિત્થા વરદેવતા

યયાઽયં ચલિતઃ શૈલઃ સ્વશક્ત્યા નિશ્ચલીકૃતઃ ॥
સ્કન્દેનેહ દ્વિજશ્રેષ્ઠાઃ શક્ત્યા વિદ્ધસ્તદગ્રતઃ ॥ ॥
નરાદિત્યસ્તતશ્ચાન્યો યો નરેણ પ્રતિષ્ઠિતઃ ॥
ષષ્ઠ્યાં તં સૂર્યવારેણ દૃષ્ટ્વા પાપાત્પ્રમુચ્યતે

ન શત્રૂણાં પરાભૂતિં પ્રયાસ્યતિ યથાર્જુનઃ ॥
રોગી વિમુચ્યતે રોગાદ્દરિદ્રો ધનમાપ્નુયાત્

તથા ગોવર્ધનધરં તત્ર દેવં જનાર્દનમ્ ॥
યઃ પશ્યેત્કાર્તિકે શુક્લે સંપ્રાપ્તે પ્રથમે દિને॥
તસ્ય ગાવઃ પ્રભૂતાઃ સ્યુર્નીરોગા દ્વિસત્તમાઃ

નરસિંહવપુઃ સાક્ષાત્તથા દેવો હરિઃ સ્વયમ્ ॥
તથા વિનાયકસ્તત્ર સર્વકામપ્રદાયકઃ ॥
સર્વવિઘ્નહરશ્ચૈવ સ્થાપિતશ્ચાર્જુનેન હિ

યસ્તં પૂજયતે ભક્ત્યા ચતુર્થ્યાં મોદકાશનૈઃ ॥
સ સર્વવિઘ્નનિર્મુક્તો લભતે વાંછિતં ફલમ્ ॥
તત્ર સ્થિતો દ્વિજેંદ્રાણાં હિતાય દ્વિજસત્તમાઃ ૪૧૩ ॥
યસ્તમાથર્વણૈર્મંત્રૈઃ પૂજયેદ્દ્વાદશીદિને ॥
કાર્તિકસ્ય સિતે પક્ષે સ યાતિ પરમાં ગતિમ્

તથા તત્ર દ્વિજશ્રેષ્ઠા નરનારાયણાવુભૌ ॥
દેવૌ પરમતેજસ્વી યસ્તૌ પશ્યતિ ભક્તિતઃ

પૂજયેચ્ચ દ્વિજશ્રેષ્ઠા દ્વાદશ્યા દિવસે સ્વયમ્ ॥
સ યાતિ પરમં સ્થાનં જરામરણવર્જિતમ્

તીર્થયાત્રાકૃતારંભઃ કુન્તીપુત્રો ધનંજયઃ ॥
હાટકેશ્વરજે ક્ષેત્રે સમાયાતો દ્વિજોત્તમાઃ

દૃષ્ટ્વા તત્પાવનં ક્ષેત્રં તીર્થપૂગપ્રપૂરિતમ્॥
આદિત્યં સ્થાપયામાસ પ્રાસાદે સુમનોહરે

નરનારાયણૌ દેવૌ તસ્યાગ્રે સ્થાપિતૌ તતઃ ॥
તથા ગોવર્ધનધરસ્તત્ર દેવઃ પ્રતિષ્ઠિતઃ

નરસિંહં તથૈવાન્યં શ્રદ્ધયા પરયા યુતઃ ॥
એવં સંસ્થાપ્ય કૌંતેયો દેવગૃહસુપંચકમ્

તતો વિપ્રાન્સમાહૂય સર્વાંસ્તાન્પુરસંભવાન્ ॥
પ્રોવાચ પ્રણતો ભક્ત્યા ધનં દત્ત્વા સુપુષ્કલમ્

મયા સંસ્થાપિતઃ સૂર્યઃ સર્વરોગક્ષયાવહઃ ॥
તથાર્પિતશ્ચ યુષ્માકં ચિંતનીયં સદૈવ તુ

॥ વિપ્રા ઊચુઃ ॥ ॥
ગચ્છ ત્વં પાંડવશ્રેષ્ઠ સુવિશ્રબ્ધઃ સ્વમાલયમ્ ॥
વયં સર્વે કરિષ્યામસ્તવશ્રેયોઽભિવર્ધનમ્

તતોઽર્જુનઃ પ્રહૃષ્ટાત્મા તેભ્યો દત્ત્વા ધનં બહુ॥
તાનામંત્ર્ય નમસ્કૃત્ય જગામ સ્વપુરં પ્રતિ

॥ સૂત ઉવાચ ॥ ॥
એતદ્વઃ સર્વમાખ્યાતં નરાદિત્યસ્ય સંભવમ્ ॥
માહાત્મ્યં બ્રાહ્મણશ્રેષ્ઠાઃ શૃણ્વતાં પાપનાશનમ્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં ષષ્ઠે નાગરખણ્ડે હાટકેશ્વરક્ષેત્રમાહાત્મ્યે નરાદિત્યમાહાત્મ્યવર્ણનંનામ ષષ્ટિતમોઽધ્યાયઃ