Skanda Purana · Chapter 6.5

sūta uvāca/
tacchrutvā brahmaṇo vākyaṃ viśvāmitro ruṣānvitaḥ/
pitāmahamuvācedaṃ paśya me tapaso balam

yājayitvā triśaṃkuṃ taṃ vidhivaddakṣiṇāvatā/
yajñenātrā(?) nayiṣyāmi paśyataste pitāmaha

evamuktvā drutaṃ gatvā viśvāmitro dharātalam/
cakāra yājane yatnaṃ triśaṃkoḥ sumahātmanaḥ

dadau dīkṣāṃ samāhūya brāhmaṇānvedapāragān/
yatrakarmocite kāle tasminneva vane śubhe

babhūva sa svayaṃ dhīmānadhvaryuryajñakarmaṇi/
tasminhotā ca śāṃḍilyo brahmā gautama eva ca

āgnīdhraścyavano nāma maitrāvaruṇaḥ kārmikaḥ/
udgātā yājñavalkyaśca pratihartā ca jaiminiḥ

prastotā śaṃkuvarṇaśca tathonnetā ca gālavaḥ/
pulastyo brāhmaṇācchaṃsī hotā gargo munīśvaraḥ

neṣṭā caiva tathātristu acchāvāko bhṛguḥ svayam/
tānsarvānṛtvijaścakre triśaṃkuḥ śraddhayānvitaḥ

vāsobhirmukuṭaiścaiva keyūraiḥ samalaṃkṛtān/
kṛtvā keśaparityāgaṃ dadhatkṛṣṇājinaṃ tathā

aiṇaśṛṅgasamāyuktaḥ payovrataparāyaṇaḥ/
dīrghasatrāya tānsarvānyojayāmāsa vai tataḥ

evaṃ tasminpravṛtte ca dīrghasatre yathocite/
ājagmurbrāhmaṇā divyā vedavedāṃgapāragāḥ

tathānye tārkikāścaiva gṛhasthāḥ kautukānvitāḥ/
dīnāṃdhakṛpaṇāścaiva ye cānye naṭanartakāḥ

dīyatāṃ dīyatāmāśu eteṣāmetadeva hi/
bhujyatāṃbhujyatāṃ lokāḥ prasādaḥ kriyatāmiti

ityeṣa ninadastatra śrūyate satataṃ mahān/
yajñavāṭe sadā tasminnānyaścaiva kadācana

tatra sasyamayāḥ śailā dṛśyaṃte parikalpitāḥ/
suvarṇasya ca rūpyasya ratnānāṃ ca viśeṣataḥ

dānārthaṃ brāhmaṇeṃdrāṇāmasaṃkhyāścāpi dhenavaḥ/
tathaiva vājino dāṃtā madonmattā mahāgajāḥ

samaṃtātkalpitāstatra dṛśyaṃte parvatopamāḥ/
vartamāne mahāyajñe tasminneva suvistare

āhūtā yajñabhāgāya nābhigacchaṃti devatāḥ/
kevalaṃ vahnivaktreṇa tasya gṛhṇaṃti taddhaviḥ

evaṃ dvādaśavarṣāṇi yajatastasya bhūpateḥ/
vyatītāni na saṃprāptamabhīṣṭaṃ manasaḥ phalam

tataścāvabhṛthasnānaṃ kṛtvā satrasamāptijam/
ṛtvijastarpayitvā tāndakṣiṇābhiryathārhataḥ

visasarja samastāṃśca tathānyānapi saṃgatān/
saṃbaṃdhino vayasyāṃśca triśaṃkurmunisattamāḥ

tataḥ provāca vinato viśvāmitraṃ munīśvaram/
sa bhūpo vrīḍayā yuktaḥ praṇipātapuraḥ saram

tvatprasādānmayā prāptaṃ dīrghasatrasamudbhavam/
paripūrṇaphalaṃ brahmandurlabhaṃ sarvamānavaiḥ

tathā jātiḥ punarlabdhā bhūyo naṣṭāpi sanmune/
tvatprasādena viprarṣe caṃḍālatvaṃ praṇāśitam

paraṃ me duḥkhamevaikaṃ hṛdi śalyamivārpitam/
anenaiva śarīreṇa yanna prāptaṃ triviṣṭapam

upahāsaṃ kariṣyaṃti vasiṣṭhasya sutā mune/
adya vyartha śramaṃ śrutvā māmaprāptaṃ triviṣṭapam

tathā tadvacanaṃ satyaṃ vasiṣṭhasya vyavasthitam/
yattenoktaṃ na yajñena sadehairgamyate divi

so'haṃ tapaḥ kariṣyāmi sāṃprataṃ vanamāśritaḥ/
na kariṣyāmi bhūyo'pi rājyaṃ putraniveditam

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye triśaṃkūpākhyāne viśvāmitreṇa triśaṃkoḥ saśarīrasvargārohaṇāya dvādaśavārṣikayajñakaraṇaṃnāma pañcamo'dhyāyaḥ