સ્કંદ પુરાણ · અધ્યાય 6.6

સૂત ઉવાચ।
તચ્છ્રુત્વા વચનં તસ્ય ત્રિશંકોર્મુનિપુંગવઃ।
વિશ્વામિત્રોઽબ્રવીદ્વાક્યં કિંચિલ્લજ્જાસમન્વિતઃ

મા વિષાદં મહીપાલ વિષયેઽત્ર કરિષ્યસિ।
અનેનૈવ શરીરેણ ત્વાં નયિષ્યામ્યહં દિવમ્

તત્તત્કર્મ કરિષ્યામિ સ્વર્ગાર્થે નૃપસત્તમ।
તવાભીષ્ટં કરિષ્યામિ કિં વા યાસ્યામિ સંક્ષયમ્

એવમુક્ત્વા પરં કોપં કૃત્વોપરિ દિવૌકસામ્।
ઉવાચ ચ તતો રૌદ્રં પ્રત્યક્ષં તસ્ય ભૂપતેઃ

યથા મયા દ્વિજત્વં હિ સ્વયમેવાર્જિતં બલાત્।
તથા સૃષ્ટિં કરિષ્યામિ સ્વકીયાં નાત્ર સંશયઃ

તતસ્તં સ સમાલોક્ય શંકરં શશિશેખરમ્।
પ્રણમ્ય વિધિવદ્ભક્ત્યા સ્તુતિં ચક્રે મહામુનિઃ

વિશ્વામિત્ર ઉવાચ।
જય દેવ જયાચિંત્ય જય પાર્વતિવલ્લભ।
જય કૃષ્ણ જગન્નાથ જય કૃષ્ણ જગદ્ગુરો

જયાચિંત્ય જયામેય જયાનંત જયાચ્યુત।
જયામર જયાજેય જયાવ્યય સુરેશ્વર

જય સર્વગ સર્વેશ જય સર્વસુરાશ્રય।
જય સર્વજનધ્યેય જય સર્વાઘનાશન

ત્વં ધાતા ચ વિધાતા ચ ત્વં કર્તા ત્વં ચ રક્ષકઃ।
ચતુર્વિધસ્ય દેવેશ ભૂતગ્રામસ્ય શંકર

યથા તિલસ્થિતં તૈલં યથા દધિગતં ઘૃતમ્।
તથૈવાધિષ્ઠિતં કૃત્સ્નં ત્વયા ગુપ્તેન વૈ જગત્

ત્વં બ્રહ્મા ત્વં હૃષીકેશસ્ત્વં શક્રસ્ત્વં હુતાશનઃ।
ત્વં યજ્ઞસ્ત્વં વષટ્કારસ્ત્વમિન્દુસ્ત્વં દિવાકરઃ

અથવા બહુનોક્તેન કિં સ્તવેન તવ પ્રભો।
સમાસાદેવ વક્ષ્યામિ વિભૂતિં શ્રુતિનોદિતામ્

યત્કિંચિત્ત્રિષુ લોકેષુ સ્થાવરં જંગમં વિભો।
તત્સર્વં ભવતા વ્યાપ્તં કાષ્ઠં હવ્યભુજા યથા

શ્રીભગવાનુવાચ।
પરિતુષ્ટોઽસ્મિ ભદ્રં તે વરં પ્રાર્થય સન્મુને।
યત્તે હૃદિ સ્થિતં નિત્યં સર્વં દાસ્યામ્યસંશયમ્

વિશ્વામિત્ર ઉવાચ।
યદિ તુષ્ટોસિ દેવેશ યદિ દેયો વરો મમ।
તન્મે સ્યાત્સૃષ્ટિમાહાત્મ્યં ત્વત્પ્રસાદાન્મહેશ્વર

એવમસ્ત્વિતિ તં ચોક્ત્વા ભગવાન્વૃષભધ્વજઃ।
સર્વૈર્ગણૈઃ સમાયુક્તસ્તતશ્ચાદર્શનં ગતઃ

વિશ્વામિત્રોઽપિ તત્રૈવ સ્થિતો ધ્યાનપરાયણઃ।
ચક્રે ચતુર્વિધાં સૃષ્ટિં સ્પર્દ્ધયા હંસગામિનઃ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં ષષ્ઠે નાગરખણ્ડે હાટકેશ્વક્ષેત્રમાહાત્મ્યે ત્રિશંકૂપાખ્યાને વિશ્વામિત્રવરલબ્ધિર્નામ ષષ્ઠોઽધ્યાયઃ